Guti 4
4
1I tshukwana gu vbanya nyambana sanana,
aholu nu tade khu wuwadi ni ndruda.
Gupindruga ni gumbafa gu girwa khu gualakanywa ndruda,
ni gutidwa khu Nungungulu ni vathu.
2Ya gu bani yi romo ndruda vathu vatshavbo va gu yi pimedzela;
ya gu bani yiri mwalo, va gu yi suva, va yi vbwetedzela;
gupindrugani nya dzinango, ndruda yi na thanga mbeli, yi ambagiswa gihugu nya gupale,
kholu yi nga pala nyamba dzi nyenyezisa mayungani.
3Talo nya livelego la vathu nya guvivbedwe khu monyo
kha wu na nga phasa gilo;
kha wu na nga thela mikhamba nya guete,
gambe kha wu na nga mana matshina nya gutiye,
Kholu wa gu duga khavbo nya handro nya mirembwa.
4Ambari ma gu dandra matamo yaye khu gikhati gidugwana,
olu wu ngamba tiya gwadi, wu na kutsungwa khu phuvbo,
wu sigudwa khu tshivba nya gingulu.
5Matamo yaye ma nata fanyeledzedwa ma ngari matenvura,
mihandro yaye kha yi na nga siza gilo,
khu gu bani na yi ngari yimbihu ngudzu, nyamba dzi kodza gu yi hodza, ambari gu yi thumisa gimbe gilo.
6Sanana si velegidwego khu patano wa vbavbandze nya nayo,
litshigu nya gulamudwe, si na khala dzifakazi nya wuvivbi wa vavelegi vawe.
Lufu nya guvbiredze la muthu nya gululame
7Khu guralo, muthu nya gululame
ambari a gu vbiredzela gufa, a na mana guhefemula.#4:7 Gufa nya guvbiredze ga muthu nya gululame gu ngu wusa siwudziso nya sikhongolo gukhodwani nya muthu, kholu guvbanya matshigu nya gulaphe a diri giwonegiso nya gikategiso gya Nungungulu (Wona Eks 20:12; Dhet 5:16; Dzind 21:5). Mulovi avba a gu hi embela gukhuye mahoni ga Nungungulu ndruda ni guvbanya nya gululame gu na ni lisima ngudzu guvbindra myaga nya gulaphe.
8Wuzundzo nya muthu a gumbidego khandri khu kotani nya guvbanye matshigu nya gulaphe,
gambe kha wu pimwi khu tengo nya myaga.
9Aholu wuzundzo nya dzinvi nya muthu womo mapimoni gwaye
ni guvbanyani gwaye nya lisine nyamba nyenyeza.
10Muthu nya gululame tsakiside Nungungulu,
khu kharato, Nungungulu a mu gode.
Khu kotani nya olu a nga bani na gu vbanya vbakari nya sighohi, Nungungulu a mu duside mafuni momu.
11A di dzegwa khu guvbiredza, gasi guvivba gu si vbindrugedzi mapimo yaye
ni wukanganyisi wu si mbembisi hefemulo waye.
12Kholu wuphatiphati nya guvivbe wu ngu dzi kodza gu tshira esi nya sadi,
ni guvbandza nya gudogorele nya nyama gu ngu vivbisa hefemulo wa muthu nya gululame.
13Uye khu matshigu madugwana a ngu tadzisa wuwadi nya guvbanye, wu dzegago myaga nya gulaphe gu wu enedza.
14Hefemulo waye wu di tsakisa Pfhumu Nungungulu;
khu kharato, uye a di vbiredzela gu mu dusa wulangani nya vathu nya guvivbe.
Mahundzu ma si wone, aholu kha ma pima gilo, gambe gima kha ma pimisa gukhayo
15wuhigo ni wuhindzi wa Nungungulu a gu girela sihathwa saye,
ni gukhavo uye a na wuga a vhikela va nya guaga vaye.
16Ambari hwane nya gu na fude, muthu nya gululame,
a ngu simama gu kona a ninga nandru va nya guvivbedwa khu monyo va nga gu vbanyago;
ni vathu vaphya va tadzisago,
khu guvbiredza gululama gwawe, va ngu kona gighohi gi vbanyago myaga nya gulaphe.
17Avo va na wona mahegiso ya muthu nya guti,
aholu kha va na nga tugula gikungo gya Pfhumu Nungungulu ga uye,
gambe kha va tuguli gukhavo khu ginani Nungungulu a mu vegidego wulangani nya gutiye.
18Va na mu wona, va mu nyenya,
aholu Pfhumu Nungungulu a na va poyila.
19Gikhati va nafago, sirumbi sawe si na poyidwa nyamba dzingwa;
tigoni nya vafi va na khala kha nga gyombo nya gunyenyeze kala gupindruga.
Pfhumu Nungungulu, a na va gikha vbavbatshi khu mihungo,
va tandrega gu ganela gilo,
a na va kutsunga musiseketeloni gwawe, va thegela muphelo.
Va na vbanya mugutshanisekani, gambe kha va na nga alakanywa.
20Litshigu nya gulamudwe sighoho sawe, va na vboha na va tade khu hwanga,
va na konwa khu guvivba gwawe gu va mbembisa.
Currently Selected:
Guti 4: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.