Guti 2
2
Magana ya va nya guvivbedwa khu myonyo
1Vathu nya guvivbedwe khu monyo, va gu ganela,
mugupimisani gwawe nya guwegele, khavo:
“Guvbanya mafuni gu rode,
bwelo khavbo gu tala khu sigaradzo.
Gumwalo rendre gikhati li vbohago lufu.
Gambe mwalo muthu a tidwago na wide khu tigoni nya vafi.
2Khu guralo, hi dzude mafuni momu ha sa dzi vegisela gukhethu hi nata,
na wu vbede womi wowu,
gu na gira gukhwatshi gima kha ha nga manega mafuni.
Hefemulo wa mudzithonvuni gwathu, wutshi basi,
ni gupimisa gwathu, tshahe nya gudagate nya monyo wathu!
3Gikhati tshahe yi tshimegago,
givili gyathu gya gu bwelela gi khala kudzudzwane,
liphuvbo lathu li mwalalega kha nga lipfhi.
4Khu matshigu madugwanana, lina lathu li na divadwa;
mwalo a na alakanyago mithumo hi giridego.
Guvbanya gwathu gu na vbindra kha nga lipfhi, nyamba tshiya hweha;
gu na mwalalega kha nga thondrwane, yi vbiswago khu lihani,
yi banga khu guvbisa gwaye.
5Guvbanya gwathu mafuni kha nga mutsa wu vbindrago,
ni mahegiso gwathu gu mwalo guthindrekiswa,
kholu guvbanya gu vegidwe gitambo, gumwalo guwuya hwane.
6Khu guralo, deluni hi ta londrola dzithomba dza egi gikhati,
hi londrole sivangwa khu tshivba nya wudzaha wathu!
7Hi na lewe khu vbinyu nya lisima
ni mafura nya gunungele, hi nga digi gu vbindra senge nya guphele nya maronga!
8Hi na ambale dzihari nya dzithunguta nya senge,#2:8 Thunguta nya senge gu thudwa butawu mwendro phota nya senge na si si wuni!#2:8 Vagreki ni Varoma mibuzoni gwawe nya yikhongolo, va diri ni giolovedzo nya gutole mafura nya gunungule ngudzu, va gu ambala dzihari nya gugirwe khu dzithunguta nya senge nya guphele.
9Gu nga hamugegi muthu ga mihagano yathu.
Maphuvbo yatshavbo hi na vege siyeyedzo nya gutsake gwathu.
Eyi khiyo thomba ni makategwa yathu.
10Hongoleni hi tshanise
muthu nya gululame muwusiwanani gwaye,#2:10 muthu nya gululame wusianani gwaye: guthudwa mukhodwa wule a ngamba dzumela gu diga wukhodwa waye khu gufela gu landrisela mahedheni, ni guyedzedzela vale nya guvivbedwe khu monyo. Umo nya Milowo nya Guage gululama nya muthu gwa gu wonega khu githawo ni mithumo ya lihaladzo ni wuhindzi ga dzinoni, dzikhulungu ni sikhosane, ni vawuyi va nyenywago ni gu hembuludwa khu va nya guvivbedwa khu monyo. Wona Isa 1:17
hi nga tsetsi noni,
gambe hi nga ningi githawo dzinvi dza muthu a gumbidego!
11Ga ethu, tshivba khiyo yi ganelago igyo gi lulamidego,
kholu igyo nyambana tshivba kha gi sizi gilo.
12Hi na riye mazinga ga muthu nya gululame,
kholu a ngu hi tsulupetela,
a gu hambana ni esi hi girago.
A ngu hi kawuka gukhuye hi ngu hambanisa nayo,
ni gu hi thuledza gukhuye hi ngu hambana ni silayelo hi hevbudzidwego.
13Uye wari khuye a ngu muti Nungungulu
ni gukhuye gyanana gya Pfhumu.
14A gu dzi gira mukawuki nya mavbanyelo yathu;
khu gu mu wona basi a gu hi rera,
15kholu guvbanya gwaye gu ngu hambana ni ugo ga vambe vathu,
dzindzila dzaye nidzo dzi hambanide ngudzu.
16Uye a gu hi wona kha nga ndzilo,
a gu ndreya hwindzo ni dzindzila dzathu
gukhwatshi gilo nya gunyenyeze.#2:16 Mavbanyelo ya muthu nya gululame a khodwago, a landrisago ndzila nya lisine, ma gu gorosa ngudzu va nya guvivbedwa khu monyo. Kholu gukhodwa ni gululama nya mavbanelo yawe, ambari va si ganeli gilo khu magana, ma gu kawuka wuvivbi ni guwegela ga vathu nya guvivbedwe khu monyo.
A gu ganela gukhuye lufu nya muthu nya gululame litsako,
a dzi zundza khu gu rana Nungungulu khuye babe waye.
17Khu guralo, hi na wone mwendro magana yaye khya lisine kamwe;
gambe hi na wone ginani gi na mu dugelelago guhegisani nya guvbanye gwaye.
18Kholu muthu nya gululame a gu bani nari gyanana gya Nungungulu khu lisine,
Nungungulu a na mu phasedza, a mu vbulugisa mandzani ga valala vaye.
19Hi na mu linge khu gu mu vala ni gu mu tshanisa,
gasi hi khodza gu wona gurula gwaye, hi khodwa khu guaga nya monyo waye.
20Hi na mu ninge gufa khu mafelo nya dzitshoni,
kholu uye wari khuye,
Nungungulu a na mu vbanyisa.”
21Eyi khiyo mipimiso yawe,
aholu va gu dzi pfhadza, kholu guvivba gwawe gu ngu va gira sikhumu.
22Va ngu hangwa khu misihalo nya makungo ya Nungungulu,#2:22 Va nya guvivbedwa khu monyo, khu kotani nya guvbwete basi dzithomba dza mafuni momu, kha va dzi kodzi gu pima lisine, kholu mapimo yawe ma segegide khu kotani nya silo sa mafuni basi.
kha va lindreli tshatshazelo nya wuwadi,
gambe kha va khodwi gukhavo va nya mihefemulo yi agidego va na hakha tshatshazelo.
23Khu lisine,
Nungungulu vangide muthu gasi a sifi,
kholu a mu vangide khu giemo ni mufananiso waye.
24Lufu li bede mafuni, khu kotani nya lidiwo la Sathane;
va na linga lufu avo va lumbago Sathane.
Currently Selected:
Guti 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.