Guti 17
17
Gidema ga Vagipiti ni wenengedzo nya nilo ga va na Israyeli
(Ekisodha 10:21-28; 13:21-22; Varoma 11:33-35)
1Gulamula gwago, Pfhumu Nungungulu, gu ngu samadzisa ni gumba manedwa;
khu kotani nya isoso, mihefemulo yi guromo gidemani nya wuhangi, yi ngu penga khu gukanganyiswa.
2Gikhati va nya guvivbedwa khu monyo#17:2 Avba guthudwa Vagipiti.
va nga pimisa gukhavo va ngu dzi kodza gutshanisa vathu vago nya guage,
va di khala dzikhumbi nya gidema,#17:2 gu ganedwa khu tsayiso nya gidema nya gikhongolo ngudzu gi nga fenengedza litigo latshavbo la Egipito, Eks 10:21-23. va gu khothedwa pasoni nya wutshigu nyamba vbela.
Na va segedwe mudzinyumbani gwawe,
va di khala hwindzo ni lihaladzo lago nya gupindruge.
3Va di pimisa gukhavo va na simama gu sihala ni sighoho sawe nya gugirwe mugusihalani,
vbavbatshi nya mutsa nya mwendra nya madiva,
va di thava sithusa, va tala khu hwanga nya wukhongolo ngudzu, va gu phalalegiswa, va hambaniswa ni vakwawe.
4 # Wona gambe: Eks 10:21-23. Ambari gusihalani va nga thavelago umo kha gwa va vhikela hwanga;
ligwaha nya guthurugise li di kanyuluga khu maphuvbo yatshavbo,
va di tumbulugedwa khu sithusa nya guthise nya dzikhovbe nya guthele hwanga.
5Gu diri mwalo mwenge,
nya tshivba nya gu dzi kodze gu va wenengedza,
ambari wenengedzo nya guphatime nya dzinyeledzi
wu di si dzi kodzi gu wenengedza wutshiguwule nya guthise.
6Va di woniswa basi gulasa nya nilo wu nga va tadza khu hwanga,
nilo nya guthise wu nga bani wu gu vbisa wabune; aholu, avbo giwoniso gi nga bani gi gu mwalalega,
avo va di tala khu rerema, khu gupimisa gukhavo sikono va si wonego si thiside gambe ngudzu guvbindrisa.
7Wugengeli nya wuloyi wawe wu di wonegisa wuphanga waye,
guti va nga bani va dzi gugumugisa khugo, gu wonegide nari gwa mahala.
8Vale va nga bani va tumbisa gu tutumisa madwali ni hwanga ga vathu va tshaniswago khu maphuvbo nya guvivbe,
avovo khavo kamwe va nga bayiswa khu hwanga nyambana gighelo.
9Ambari va sa thuswa khu gilo nya guthise ngudzu, nya guyele gu va thela hwanga,
va di thaviswa khu ligwaha nya sirengo si vbindrago, ni maswati nya dzinyoga nya dzikhongolo.
Va difa khu hwanga, va si
tiyeli ni gu khedzisa esi si va randredego,
a gu mwalo ni moyo nya gu si vhike.
10Guvivba, gu tade khu hwanga, gu ngu dzi kona gwabune khu wufakazi waye,
va nya guvivbedwa khu monyo, va gu vetwa khu mavhalo,#17:10 guvetwa khu mavhalo: gikhati nya guphele umo nya Bhibhiliya yatshavbo gu ganedwago khu mavhalo, na gu thudwa lito li pwalago khu ndrani nya muthu li mu kawuka guvivba a giridego.
gikhati gyatshavbo va gu pimisela gukhavo va na dugeledwa khu silo nya guvivbe.
11Khu lisine, hwanga wa gu vangwa
khu gubomba giphaso hi ningwago khu mapimo.
12Kholu, gwa gu vbunguga gutiya hefemuloni khu gumba pima gwadi lisine nya silo,
wa gu engedzelana ngudzu wuhangi nya esi si hi thelago hwanga.
13Vagipiti, va di modwa gidemani, vbakari nya wutshiguwule nyamba wu tiyela,
aholu wutshigu nyambana tshivba, kholu wu di gu dugela gusihalani nya lithowo.
Va di lala ligovbe la limwedo,
14aholu va di tshaniswa, va thedwa hwanga khu sithusa nya guthise ngudzu;
va gu vbela tshivba mihefemuloni gwawe, nyamba kodza ni gu tshunguhedza,
kholu, khu githugedza, va di tedwa khu hwanga nya wukhongolo va ngamba wu lindrela.
15Muthu ni muthu avbo a guromo, a di thega nyambana tshivba;
a di hungwa a gu khothedwa gukhwatshi gibotshwa pasoni nyambana sikwinyaro.
16Valimi, vahavisi nya dzinvuta
ni avo va thumago mithumo nya gulelmele marembweni,
khu githugedza, vatshavbo va di thegedwa khu tsayiso ya yimweyo,
va diri vatshavbo pasoni gumogo, va gu hungwa khu likhetshe la limwedo nya gidema.
17Gufurugedza nya phuvbo,
litembo nya sinyoni si embago
matamoni nya misimbo nya wuziva,
mwendro gudzumadzuma nya mati, ma tutumago khu tshivba;
mwendro ligwaha nya siwindri si wumbulugago si thega khu vbatshani ngudzu;
18mwendro sikingo nyamba wonega nya sirengo si ndragandragago;
mwendro gungurura nya sirengo nya likhabi,
mwendro gudzuma nya lito gu wuyedzelago
mavbalani nya sigomo,
esi satshavbo si di va songa khu hwanga.
19Litigo latshavbo li tshadego li di gu wenengedzwa khu wenengedzo nya guphatime gwa ndzadzini,
Vatshavbo va di dzi ningedzela nyamba tshunganiswa khu gilo mithumoni gwaye;
20wutshigu nya gusivbale wu di dzi ladza vbatshani ga avo basi,
giwonegiso nya gidema gi nga bani gi va virela.
Aholu avo va di dzi lemedza ngudzu vabune guvbindra gulemela nya gidema.
Currently Selected:
Guti 17: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.