Guti 15
15
Gunengela ga dzipari dza Nungungulu
1Aholu uwe, Nungungulu wathu,
u wadi, u tumbegide ni gutimisela,
u ngu fumela satshavbo khu lihaladzo.
2Ambari gikhati hi ghohago, hi vathu vago, kholu hi ngu yiti tshivba yago,
aholu kha hi vbweti gu ghoha, na hi gu dziti gukhethu ha gu lumba Uwe.
3Guti Uwe gu ngu hi ninga gululama nya lisine, nya guvbelele, guti tshivba yago, khamba nya guvbanye nyamba vbela.
4Kha hi dzi digi hi pengiswa khu sigiro nya wumeseri nya vathu,
ambari khu thumo nyamba phasa gilo wa vapendri:
Sithombe nya mivala nya guhambanelane.
5Sifananiso soso sa gu wusedzela wuvi nya gunavele nya sipumbu,
va tsakiswago khu gu wona githombe nyambana womi;
gifananiso nya gufe.
6Vatshavbo: Avo va girago sithombe, avo va si vbwetago ni avo va si khozelago;
vatshavbo vovo va gu gola esi si vivbidego, va fanedwa khu gu pfhadzwa khu gitumbo gyogyo nyamba phasa gilo.
Wupumbu wa avo va khozelago sifananiso
7Hi na pimise khu muwumbi nya dzikhali,
a sugago libumba nya guvbevbuge,
a gu wumba sombo nya guhambanelane, hi si thumisago muguvbanyani gwathu.
Khu libumba la limwedo a ngu gira mikanvu nya lisima nya mithumo nya wuzundzo,
ni yimbe nya gufanane, aholu yi thumiswago ga silo nya nyalidede;
Muwumbi a ngu dzi kodza gu gira guhaladza gwaye khu thumo wu yelago kanvu ni kanvu.
8Khu libumba la limwedo, a ngu haganisela tshivba yaye khu gu wumba gambe githombe nya nungungulu nya malipha nyamba phasa gilo.
Uye gikhatinyana hwane, a giridwego khu kudzudzwane nya mafu,
gambe khu guvbiredza a na bwelelago mafuni a nga duswago khumo,
gikhati a na wudziswago khu guvbanya gwaye.
9Aholu uye kha theli kota khu gu dziti gukhuye li na vboha litshigu nya gufe,
ambari khu gu dziti gukhuye guvbanya gwaye mafuni gu rode.
Aholu, uye a gu gira mapalisana ni vameseri nya ndralama ni parata,
a gu yedzedzela avo va thumisago sugu,
a gu dzi khusedza khu gu gira sithombe nya wukanganyisi.
10Monyo waye nguma,
gitumbo gyaye khya nyalidade ngudzu guvbindra mafu,
ni womi waye, wu nyenyezide ngudzu guvbindra libumba.
11Kholu a ngu hangwa khu Muwumbi waye,
wule a mu ningidego hefemulo ni tshivba ni gu mu furugedza liphuvbo nya guvbanye.
12A gu wona womi wathu kha nga gihungato,
ni gumanega gwathu kha nga bazari nya bhindzu.
A gu pimisa gukhuye gu vbwetega gu mana bhindzu
ga satshavbo, ambari khu esi nya guvivbe.
13Gambe muthu yoyu a ngu dziti gwadi gukhuye a gu ghoha,
khu gu gira khu libumba la limwedo mikanvu nya guvbevbuge
ni sithombe nya vanungungulu nya malipha.
Tsayiso wa Vagipiti
14Valala va vathu vago, vale va nga va tshanisago,
va midwe gukatega,
gambe va vbungugide ngudzu mapimo guvbindra gyanana.
15 # Wona gambe: Gen 3:14-15; Dzind 115:4-8; 135:15-18. Kholu va dzegide sifananiso satshavbo sa va nya mayigo,
va si gira vanungungulu vawe,
va si kodzigo gu thumisa maho gasi gu wona,
ambari thonvu gasi gu hefemula,
ambari dzindzeve gasi gu yingisa,
ambari dzinyala dza mandzani gasi gu phuphutela,
ni migondro yawe yi si dzi kodzigo gu gimbila.
16 # Wona gambe: Gen 2:7; Dzind 104:28-30. Khu lisine, muthu nya gukari a si giridego,
si wumbidwe khu liphuvbo nya gulombiswe ga muthu.
Mwalo muthu a na kodzago gu gira nungungulu,
ambari nya gufanana naye.
17Kha nga ulo, uye a gu muthu a emedwego khu gufa, satshavbo a girago khu mandza yaye nya gunyenyeze, si fude.
Khu lisine, uye a na ni lisima ngudzu guvbindra sombo a si khozelago;
kholu uye a na ni womi gasi iso si mwalo nawo.
Gukhozela sirengo
18Valala va vathu vago va gu vboha avbo nya gukhozele sirengo nya gunyenyeze ngudzu,
nya sipumbu ngudzu guvbindra simbe sirengo satshavbo.
19 # Wona gambe: Gen 1:21-22. Sirengo soso si mwalo wumburi mwendro gugolega,
kha nga simbe sirengo si gu ni makhalelo nya gumbure,
kholu kha sa ningwa gikategiso mwendro wuzundzo wa Nungungulu.
Currently Selected:
Guti 15: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.