Guti 14
14
Gumba khodwa nya vagimbidzisi nya dzingalava
1Mumbe muthu, na gu vbweta gu endra khu ngalava,
a gu dzi dongisela gutsemakanya mavimbi nya makhongolo nya guthise,
a gu lombelela ga lipulango nya fava ngudzu guvbindra ngalava yi mu dzegago;
2khu magirelo yoyo, manavelo nya bhindzu ma tumbulugiside paketi,
meseri moyo a wu giride khu wugengeli waye.
3 # Wona gambe: Isa 44:17; Jer 2:37. Aholu, guti gwago, uwe Baba, khugo gu pharago lemi nya ngalava, kholu u tude ndzila phwani,
ndzila mweyo nya gutiye vbakari nya mavimbi.
4Khu magirelo yaya, u ngu yeyedza gukhuwe u ngu kodza gu vbanyisa ga dzimhango dzatshavbo;
hi ngu dzi kodza gu bela ngalavani hi gimbidzisa ambari na hiri mwalo wugengeli nya wumeseri wa matini.
5Khu vbweti gukhuwe mithumo nya guti gwago yi khale nyamba phasa gilo.
Khu guralo, vathu va endrago, nyamba thava gufa, va ngu tiya gu bela gingalavanani nya gidugwana nya mapulango,
va gu tsemakanya mavimbi khu gisatho,#14:5 Vambe Vatonga khavo “gitataro.” na va tiyide, va vboha guvbulugani.
6Matshiguni nya guhegule,
gikhati va nga bani va gumbembiswa vadandrangulu nya matshandza, gitumbo nya litigo latshavbo
gi di thavela litaroni #14:6 Gu thudwa litaro la Nowa, Gen 7:1-5. nya gugimbidziswe khu mandza yago,
gu vbanyiswa kharati mbewu nya melana nya wuphya nya vathu mafuni.
7Khu guralo, li na rungudzwe lipulango hi resedwego khilo wululamo!
8Aholu, gi na vadwe gifananiso, thumo nya mandza nya muthu, gu vadwa gambe ni wule a nga gi girago;
mugiri a na vadwe, kholu a gi giridego; gifananiso gi na vadwe, kholu, nari gilo gi hinago, gya gu ranwa pwani nungungulu.
9Khu lisine, Nungungulu a ngu venga idzosaye wule a vivbedwego khu monyo gumogo ni guvivba gwaye,
10thumo nya guvivbe gumogo ni mugiri wakone, vatshavbo va na mana tsayiso wa wumowo.
11 # Wona gambe: Eks 12:12; Isa 2:18-20; Jer 10:11,15. Khu givangelo gyogyo,
si na lamudwa sifananiso sa va nya mayigo,
kholu ambari na si giridwe khu silo nya guvangwe Nungungulu,
si vbindrugedzide si gu khala gilo nya gunyenyeze,
gikhunguvanyiso nya mihefemulo nya vathu, ni naphwi migondroni nya sipumbu.
12Mapimo nya gugire vanungungulu nya malipha, ma khade litshina nya mavbanyelo nya gunyenyeze;
ni gutugudwa nya wukhozeli wowo nya guvivbe gu ghohide guvbanya.
13Iso, khu lisine, si diri mwalo guhegulani gambe kha si na nga manega kala gupindruga.
14 # Wona gambe: Rom 1:24-32; Efes 4:17-19. Si bedzidwe tigoni khu kotani nya wupumbu nya vathu,
kotani nya ugo, Nungungulu wonide gu va mbembisa nyamba hwela.
Gutumbuluga nya nombelo ga sivangwa nya vathu
15Hi na pimise khu babe moyo a khuvekidego khu gufa gyanana gi ngari gu velegwa,
a rumago gu girwa gifananiso gya gyanana gyaye gi nga wandrwago khu guvbiredza.
Khu hwane, a di phela gu thava ni gu khozela kha nga nungungulu, gile
gi nga bani giri gifananiso nya gyanana nya gufe;
a di vega sihena ni miphaso nya gisihaledza gasi gu landriswa khu sithumi saye.
16Khu guvbindra nya matshigu, sihena sesi nya guvivbe, si diya na si gu mana tshivba, si hegisa khu gu khala nayo.
17Khu guruma ga vafumeli gu di khozedwa sifananiso nya guwumbwe.
Vale va nga bani va gu vbanyela hwindzo ni mufumeli, va di si dzi kodzi guya mu khozela khovbe ni khovbe.
Va di pimisela idzo a khadego khidzo, va gira githombe nya guwonegise gifananiso gyaye gi nga bani giri hwindzo.
Va di vega wulangani nya guwonege gifananiso gya mufumeli va mu dhumisago,
gasi gu zundza khu tshivba uye a guromo hwindzo, gukhwatshi womo vbafuvbi.
18Lidora nya ndruma la meseri li phasedzede ngudzu gu dandrisa wukhozeli wowu,
ambari vbakari nya vale va nga bani va si muti mufumeli.
19Kholu, meseri khu gu vbweta gu tsakisa mufumeli,
a di pangamisa wumeseri waye gasi gifananiso gi mbura ngudzu guvbindra uye muthu wakone.
20Gidzemo, na gi kotodwe khu gumbura nya thumo, kha gya hwela
gu wona mufumeli kha nga moyo a gu ni fanelo nya gukhozedwe; va gira nungungulu uye muthu wa moyo guphela va nga bani va mu thava kha nga muthu basi.
21 # Wona gambe: Eks 3:14-15; Levh 24:11. Esi satshavbo si khade wudembeli ga vathu, kholu vathu khu gulemedwa khu wusiwana mwendro khu tshivba ya mufumeli,
va di dzega silo nya guvatwe khu siwindri mwendro mapulango va si ninga lina li fanedego gu ningwa Nungungulu basi, nasiri mumbe muthu.
Sigaradzo sa vanungungulu nya malipha
22Gudiga nya olu va nga phazamago, mayelano khu guti Nungungulu,
vathu vovo va gu vbanya pfilupfiluni nya nyimbi nya wuhangi,
va dzegide guvivba gogo nya gukhongolo ngudzu va gu rana khavo gurula.
23Khu magirelo yaya, gu giridwe mithumo nya gusihale,
va di songetela sanana sawe va girela miphaso sifananiso,
va gu dzi ningedzela ga mibuzo nya sihena sa va nya mayigo ni mikhuwo yawe nya sihonohono.
24Olu kha va nga gu vegisa gambe guaga nya guvbanye gwawe,
ambari guaga nya lidahu lawe nya dzegano, aholu va gu songana khu gyawe khu gu logovedzana,
mwendro gu ghohelana, va dzi nyenyezisa khu wubhayi.
25Maphuvbo yatshavbo gu wonega novba,
wusongi, wuvafa ni wukanganyisi, wudambane, gumbana nayo, pfilupfilu, wurengeleli,
gu wugelana ni gu sambanya malipha,
26gumba kodza gu hambanisa iso nya sadi niso nyamba sadi,
gudivaledwa khu gubonga wuwadi u giredwego,
gunyenyeza nya mihefemulo, guvivbisa tshangano nya mwama ni nyamayi,
gupfhungumuga nya mapango, wubhayi ni satshavbo nya dzitshoni.
27 # Wona gambe: Rom 1:26-32; 2:13-16. Kholu, gukhozela sithombe nyambana lina khugo guphela,
givangelo ni mahegiso nya guvivbe gwatshavbo.
28Avo va khozelago vanungungulu nya malipha, va gu gira silo nya guhandruge mibuzoni gwawe, va dzi vangela madwali khu gu dzi hungata.
Va gu gira wuprofeti nya malipha,
va gu vbanya guvivbani,
nya wudambane ni malipha nyamba kanakana.
29Kha nga va tumbago sifananiso si gu mwalo guvbanya,
va gu sambanya malipha nyamba thava gilo.
30Khu satshavbo sesi,
gu nata tsayiso nya wukhongolo vbatshani gwawe kholu va hangidwe khu Nungungulu,
va gu khozela sifananiso, gambe va sambanyide malipha, va venga lisine ni gululama, va gu yeyisa Nungungulu a Agidego.
31Khandri tshivba nya sifananiso si khozedwago,
aholu, gulamudwa gu vegisedwego sighohi,
khugo gu landriselago gikhati gyatshavbo sihoso sa va nya guvivbedwa khu monyo.
Currently Selected:
Guti 14: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.