Gizimba 8
8
Gipimaniso nya lihaladzo
1Nari gupwani u diri ndriyangu,
na hi mamide libele limwedo,
nya gu tshangana nago ndzilani, nyi di hadza
gu gu bhejari
nyamba sodwa khu muthu.
2Nyi gu dzega nyi gu bedza
nyumbani ga mayi wangu,
u ta nyi hevbudza iso u sitigo;
eni nyi di hadza gu gu sedza dosi nya dziuvha nya gutshambe
nya gugirwe khu dzikhure dzangu nyi dzi gamedego.
3Libogo lago la nyambade
li di hadza gu khighedwa khu hungo wangu,
nyi wugaredwa khu mandza ya nyamudye gwago.
4Nyi ngu mi lombani enu vanyamahegyane va Jerusalema,
kheni mu nga wusini ni gu khendzugisa gigodwa gyangu,
kala a dzina abune.
VI. NDZIMO NYA LIVBANDRE NA MWEYO
5 Wuyelelo—Gasi khu mani oyu a gwelago
giwulani
na wugaredwe magatani ya gigodwa gyaye?
6 Mwama—Nyi bethe nga gitambo monyoni
gwago,
u nyi betha gambe bogoni gwago,
kholu lihaladzo li na ni tshivba kha nga lufu,
ni gigaha ni wufu kha nga lithowo,
gu vbisa ga ilo gu fanana ni guvbisa nya
malavbelavbe nya nilo.
7Ma mwalo mati nya gutale
ma dzi kodzago gu tshima lihaladzo leli,
ambari milondrwa nya guete, gu li dzamisa.
Ambari nari pwani muthu a ngu ningela
thomba yatshavbo ya ndrangani gwaye
gasi gu renga lihaladzo,
guhegisani a di vbweta gu nyenywa.
8 Vandruye—Hi na ni ndriyathu a ngarigu
gyanana, a si gu dugigo mavele.
Gasi hi na khethu ginani khuye,
litshigu va na gu lombago gu a dzegwa?
9Naripwani uye a diri ndzari hi di hadza guvbaha
vbatshani gwaye likhokhola nya parata;
a gu bani ari mwanya
hi na wu sega khu mapulangu
nya sedhari.
10 Mwangadzi—Eni nyi ndzari,
ni mavele yangu momo nga siwindri
nya gulaphe.
Avbo gwaye eni nyi wonidwe nga wule
a manidego gurula.
11 Vandruye—Solomoni a diri ni lithembwe
Bhahali-Hamoni.
A nga li pharisago va lireli:
Moyo ni moyo wawe a di yela gu livba
likhumi mazana singerengere nya parata
khu mihandro yaye.
12 Mwangadzi—Lithembwe leli lomo mandzani
gwangu;
uwe Solomoni u na hakha likhumi mazana
singerengere,
gasi mazana mavili ma na lumba avo va li sayisago
ni gu havela mihandro.
13 Mwama—Uwe u khalago mahangeni,
dzipari dzago dzi dembide ndzeve gasi gupwa
lito lago,
eni neni nyi ngu gola gu lipwa
14 Mwangadzi—Gigodwa gyangu,
delu khu guvbiredza,
tutuma nga tshesi mwendro yisya,
yi vbindrago khu vbatshani nya sigomo
nya misimbo nya gunungele.
Currently Selected:
Gizimba 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
