Gizimba 7
7
1 Mwama—Uwe nyamahegyane wa linganagana,
idzo yi mburidego khidzo migondro musilatoni gwago!
Ni dzinyonga dza giwununi gwago
dza gu fanana ni siwindri nya lisima,
esi si vatidwego khu wumeseri.
2Rugu wago wa gu fanana ni gikombe gi mburisedwego,
na gi tade khu dosi nya dziuvha nya gunungele,
rumbu wago giwungela nya tirigu
na gi randredwe khu senge.
3Mavele yago ya mavili ma gufanane
ni siyisyana sivili nya mavbaha.
4Thamo yago ya gu fanana ni likhokhola
nya magwaha nya ndzofu.
Maho yago gukhwatshi madhamu ya Hesibhoni,
vbafuvbi ni nyangwa ya Bhate-Rabimi,
thonvu yago ya gu fanana ni likhokhola la
Libhanoni
li khedzidego phuvbo ga Dhamasiko.
5Hungo wago, wa gu fanana ni gigomo gya Karameli;
ndzudzu wa hungoni gwago, wa gu vangamela
nga giwunguwungu
ambari ni mufumeli a di tshunganiswa
khu wumburi wago.
6 Mwama —U mburide u bwelo khavbo u tsakisa
uwe gigodwa gyangu nya gu nyi nengedzise.
7Giemo gyago, gya gu fanana ni ngindru,
ni mavele yago ma gu fanana ni sitsatsa nya dzikhindru.
8Nyi di ganela, kheni: “Nyi na lita ngindruni,
nyi ya phara matamo yaye.”
Mavele yago ma gu fanana
ni sitsatsa nya dziuvha,
ni gunungela nya guhefemule gwago, gu fanana ni
mahema nya likandzu
9besu ya kanani gwago ya gu lombela gufanana
ni vbinyu
yi theledwago gigodwa gyangu
yi goga khu vbakari nya gihofu gyaye ni magwaha yaye.
10 Mwangadzi —Eni nya gu lumba lidzaha
nyi li golago
uye nuye a gu suva eni,
11Gigodwa gyangu delu,
hongole mahangeni;
hi na ya lala mitalalani,
12Hongole hi vindruge hiya mahangeni
hi ya wona mwendro dzimbewu dzi rumbugide
dzi phela guvelega
ni gu wona gambe mwendro maromana ma ngu
pandra wenge.
Nyi naya gu ninga iyoyo lihaladzo langu.
13Mizulameti yi ngu dusa mahema
nya gunungele.
Dzinyangwani gwathu gu ni mafumbu nya mangi nya
mihandro nya yiphya ni ya gale,
nyi dongisedego uwe gigodwa gyangu.
Currently Selected:
Gizimba 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
