Gizimba 3
3
1 Mwangadzi —Wutshigu watshavbo
na nyi lade dawuni gwangu,
nyi di vbweta wule a godwago khu monyo wangu,
nyi mu vbwetide,
aholu kha nya mu mana.
2Olu nyi na wuga nyi dzundrulugela ni lidhoropa,
nyi gimbila mudzindzilani
ni malangani nya mitshangano;
nyi vbweta wule a godwago khu hefemulo
wangu;
Nyi mu vbwetide, aholu kha nya mu mana.
3Nyi di manwa khu dzighadhi,
dzi ghadhago lidhoropa.
Nyi va wudzisa, kheni: “Kha mwa gi wonani
gigodwa nya hefemulo wangu, gani?”
4Na nyi ngari gu hambana navo,
nyi di dzegela gu mana wule a godwago
khu hefemulo wangu.
Nyi di mu wugarela nyamba mu diga gambe,
kala nyi bela naye nyumbani ga mayi wangu
makhuvini ya wule a nga nyi velega.
5 Mwama —Nyi ngu sambanya gwanu
enu vanyamahegyane va Jerusalema,
khu dzitshesi ni dzimbavala dza khabini
kheni, mu nga wusini gigodwa gyangu,
uye mune na si gu vbweti gu wuga.
III. NDZIMO NYA WURARU
6 Wuyelelo —Gasi ginani egi gi tago khu giwulani
nya nga madingo nya wutshi,
nya nga gunungela nya mafura ni libani,
nya gufanane ni mafura yatshavbo ya varengisi.
7Eli khu litsira la Solomoni
li randredwego khu livbandre na limwedo magumi
dzindrena dzi dugago vbakari nya dzindrena
dza tigoni gwatshavbo ga Israyeli.
8Vatshavbo va ngu kodza gu thumisa matshari,
dzindrena nya nyimbi;
moyo ni moyo nari ni litshari giwununi gwaye,
gasi a dzi vhikela khilo vbawutshigutunu.
9Mufumeli Solomoni a di dzi girela matsira
khu misimbo ya Libhanoni.
10A di gira madingo khu parata,
gikhighetelo a gira khu ndralama,
gikhalo a di gi sona khu giwunguwungu,
ndrani gulugedwa khu dzikhindra nya wumburi,
gu yeyedza lihaladzo la vanyamahegyane
va Jerusalema.
11Enu vanyamahegyane va Siyoni, dugani!
Deluni mu ta wona mufumeli Solomoni!
Uye ambade gihugu nya wufumu,
gihugu nya wufumu a ambagisidwego
khu mayi waye
khu litshigu nya dzegano waye,
litshigu monyo waye wu tsakidego ngudzu.
Currently Selected:
Gizimba 3: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
