Bheni Siraki 7
7
Gudwana ni makolo ni malipha
1U nga giri guvivba,
gasi u si fumedwi
khu guvivba monyoni gwago.
2Ndreya ga mithumo nyamba lulama,
iyo niyo yi na ndreya hwindzo nago.
3Mwanangu, u nga yali musikhowoni
nya wudambane,
gasi u si haveli wuvivbi livbandre na dzimbili dzinyondro.
4U nga lombi wufumu ga
Pfhumu Nungungulu,
ambari gu lomba giemo nya guthavisege
ga mufumeli nya mafu.
5U nga dwaneli gu dzi gira muthu nya gululame
mbeli ga Nungungulu,
ambari gu dzi randra muthu nya guti
mbeli ga mufumeli.
6U nga zami gu khala mulamuli,
nuri mwalo tshivba nya gudwane
ni wudambane,
u nga khala hwanga mbeli ga
muthu nya gitetema,
u hegisa khu gu ghohela gulamula
nya nayo.
7U nga ghoheli vathu nya lidhoropa rumba,
u nga dzi tshisi vbavbatshi,
vbakari nya tshangano nya vathu.
8U nga engedzeli gighoho nya wuvili,
kholu ambari khu
gighoho gimwegyo basi khu na vbuluga gu tsayiswa.
9U nga ganeli gukhuwe: “Nungungulu
a na wona gutala nya miningelo yangu,
nya gudusa ndruwo ga Nungungulu
a Khusegidego, Uye a na yi hakha.”
10Monyo wago wu nga vbeli tshivba wa
gu lombelela,
ambari gu khala ligungo gu
ninga zomola.
11U nga tseketseli muthu a guromo sigaradzoni,
kholu womo Uye a poyilago ni gu zundza.
12U nga lugi malipha u singedza ndriyago,
ambari gu girela kharato pari yago.
13Dzi wonele gumba ganela malipha,
kholu guolovela gu ganela malipha,
gilo gi vivbidego.
14U nga dzi giri muthu nya mambwaga tshanganoni
nya madhota,
ambari gu wuyedzela magana nya gilombo gyago.
15U nga swiregi khu mithumo nya gulemele,
ambari khu ya mahangeni, yi giridwego khu Oyu
a Khusegidego Ngudzu.
16U nga dzi bedzi tsawani nya sighohi,
dundruga gukhuwe likhulo kha li na hwela
gu vboha.
17Dzi nogise khu guvbelela monyoni gwago,
kholu nilo ni siwungu, si na khala tsayiso
wa muthu nya guvivbedwe khu monyo.
18U nga rengisi pari yago khu dzitsapawu,
ambari ndriyago nya lisine gu mu rengisa
khu ndralama ya Ofiri.
Dzifanelo dza babe nya ndranga
19U nga hambani ni nyamayi nya mapimo
ni wuwadi,
kholu wuhigo nya makhalelo yaye nya ndruda,
wu ngu phasa ngudzu guvbindra ndralama.
20U nga tshanisi githumi gi thumago gwadi,
ambari githumi gi dzi ningedzelago khu tshivba yaye yatshavbo.
21Gola githumi nya mapimo,
u nga bombi gu gi tshula.
22U na ni mitshambi? Yi sayise gwadi;
wa gu yi wona na yiri ni giphaso, yi vegedze.
23U na ni sanana? Si hevbudze;
si olevedze gu yingela gukhugela
wananani gwawe.
24U na ni vanyamahegyane? Sayisa giyemo gyawe,
u nga va yeyedzi ngudzu khovbe nya wudzaha.
25Lowodzisa gyanana gyago nya nyamahegyane,
u na bani nu giride gilo nya gyadi ngudzu,
khu gu mu ninga mwama nya mapimo.
26U na ni mwangadzi nya gu mu gole khu monyo
wago?
U nga mu huli, u tumba uye nyamba mu gola.
27Rungudza babe wago, khu monyo wago
watshavbo,
u nga divaledwi khu guketa ga mayi wago.
28Alakanya gukhuwe khavo va nga guvelega,
u na va bweledzela kharini iso va gu giredego?
Dzifanelo ga vaphasi nya mhamba
29Ninga githawo Pfhumu Nungungulu khu
hefemulo wago watshavbo,
u ninga githawo vaphasi nya mhamba.
30Gola khu tshivba yago yatshavbo wule
a nga gu vangago,
u nga hambani ni vathumegeli vaye.
31Ninga githawo Pfhumu Nungungulu,
u rungudza muphasi nya mhamba.
Mu ninge gipandre gi mu lumbago,
kha nga idzo gu lovidwego khidzo:
mihandro nya guhegule, ni phaso nya gudzi laye,
miningelo nya litundru nya girengo,
phaso nya guagiswe ni mihandro nya guhegule
nya silo nya gukatege.
Dzifanelo ga sisiwana
32Thawuludza mandza yago ga gisiwana
gasi u tiyisa makategwa yago.
33Ningela khu monyo nya wadi ga vatshavbo
va vbanyago,
u nga digi gu girela wuwadi uye a fudego.
34U nga digi gu tangadzisa avo va lilago,
ni gu bangaladza avo va tshanisekago
35U nga khali mihuni guya wusela mudwali,
kholu khidzo kharato u na mu ranedzelago
khidzo wupari.
36Mithumoni gwago gwatshavbo alakanya
mahegiso gwago,
khu kharato, gima khu na ghoha.
Currently Selected:
Bheni Siraki 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.