Bheni Siraki 6
6
Mhango nya matshandza
1Kholu ndruma nyamba yadi
yi ngu thela dzitshoni ni gipoyilo;
kharato nugo ga gighohi nya
lidiwo ni malipha.
2U nga dzi ningedzeli ga wudogodogo
wago,
wu nga tshuka wu dzi gira kha nga
mombe nya gigaha
wu pfhungumula womi wago;
3u nga thesa mahagane yago,
u hinisa mihandro yago,
gasi, khu hwane, uta fanana ni
simbo nya gubange.
4Misuwo nyamba yadi yi ngu luzisa
wule a gu naso,
yi khala givangelo nya litsako ga
valala vaye.
Wupari nya lisine
5Maganelelo nya lihaladzo,
ma gu engedzela dzipari,
magana nya yadi nya ndruda,
ma gu resa dziphindrulo nya gutsakise.
6Zama guvbanya gwadi ni vatshavbo,
aholu avbo nya likhumi mazana,
hatha moyo gu khala lidhota lago.
7Wa gu vbweta gu thangana wupari ni muthu,
hegula khu gu mu linga,
u nga dzegeli gu mu tumba khu
gu vbiredza.
8Kholu dzomo dzipari nya
gikhatinyana
dzi si tumbegigo dza gu wona
mhango.
9Yomo pari yi vbindrugedzago
yi khala nala,
yi zamago gu tugula mavbanyelo
yago,
yifela gu gu tshonigisa.
10Yomo pari nya guvbwete guhodza basi,
kha yi na khala pari yago litshigu
nya wuvi;
11wa gu bani u fumide silo, yi nata dzi pata,
yi dzi gira yi fanana nago,
yi ganela gwadi ni sithumi
sago khu ligolo;
12aholu ya gu wona nuri
mwalo gilo, nu tade khu sigaradzo,
ya gu gu wugela
yi bwelo khavbo, yi sihala, yi gu hanga.
13Dzi ndreyise ga avo a gu valala vago,
u bwelo khavbo u dzi wonela ga dzipari dzago.
Pari nya lisine thomba.
14Pari nya gutumbege, muvhikeli
nya tshivba;
oyu a yi manidego,
tugude thomba.
15Gimwalo gilo nya gu gi fananise ni
pari nya gutumbege,
gambe gimwalo gi fanago ni lisima laye.
16Pari nya gutumbege mafura nya womi;
avo va ningago githawo Pfhumu
Nungungulu,
va na yi mana pari
nya nga iyoyo.
17Uye a thavago Pfhumu Nungungulu
a na mana wupari nya wadi,
kholu pari yaye yi na fanana naye.
Gilayelo nya gumane guti
18Mwanangu, hakha wusingalagadzi
gukhugela wudzahani wago,
u na mana guti gu na gu phasago
kala wukhosaneni gwago.
19Vbweta guti gukhwatshi khu
wule a limago ni gu yala,
a lirela khu gutimisela gu hakha
mihandro nya yadi;
kholu gulimani gwago u napwa wuvi,
aholu khu hwane nya gikhatinyana
u na hodza mihandro yakone.
20Guti gwa gu wonega na gu garadza ni gu lemela ga
sipumbu!
Muthu nya guvivbedwe khu
monyo,
kha na simama gu khala
gumogo ni guti.
21Ugo gu na mu lemela kha nga giwindri
nya gilingo,
khu guralo, kha na hwela gu gu hotsha.
22Guti gu tumbegide linani gwaye,
ugo kha gu dzi yeyedzi ga vathu nya vangi.
23Yingisa, mwanangu, dzumela ni gupwa
mawonelo yangu,
nya gu gu kawuka, u nga kanyisi;
24bedza migondro yago giphilini nya guti,
ni thamo yago makhetsheni gwaye.
25Nogisa magata yago u vbagara guti,
u nga vbeli tshivba khu dzitshinga dzaye.
26Hidzimela vbafuvbi gwaye khu
monyo wago watshavbo,
vegedza dzindzila dzaye khu tshivba
yago yatshavbo.
27Landra migondro yaye, u gu vbwetedzela,
ugo gu na dzi wonegisa;
wa gu gu mana, u nga gu digi gambe,
28kholu khu guhegisa, u na mana avbo
guhefemula gwago, gambe
gu na vbindrugedza gu khala gunengela gwago.
29Khavbo avbo, makhetshe yaye ma na
vbindrugedza ma gu khala givhikelo
nya tshivba,
ni makhetshe yaye, ma na khala gifenengelo
nya wudhumo.
30Kanga waye wu na khala gimburiselo
nya ndralama,
ni milaphwi yaye, yi na khala mikeka
nya giwunguwungu.
31U na ambala guti kha nga gifenengelo nya wudhumo,
u na gu hunga kha nga hari nya gukhedzige.
32Mwanangu, wa gu dzina u na hevbudzwa;
wa gu thumisa gwadi mapimo yago,
u na khala muthu nya wugengeli.
33Wa gu yingisa khu monyo nya wadi,
u na mana sihevbudzo nya nayo,
wa gu pwisisa gwadi,
u na khala muthu nya guti.
34Olovela gubela mitshanganoni nya madhota;
wa gu mana moyo a gu na ni guti,
thangana naye wupari.
35Yingisa khu ligolo nya ladi magana
matago khu ga Nungungulu,
ayo ma ningago wugengeli nya guvbelele,
u nga ma digi ma vbindra phuvbo.
36Wa gu wona moyo a gu ni mapimo,
mu vindrugele uya wonana naye,
migondro yago yi na vbedze siwindri
sa nyangwani gwaye.
37Sileletelo sa Nungungulu si na khale
mapimoni gwago,
alakanyela gikhati gyatshavbo milayo
ya Nungungulu.
Uye kamwe a na tiyisa monyo wago,
u na ningwa guti u gu vbwetago.
Currently Selected:
Bheni Siraki 6: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.