Bheni Siraki 51

Nombelo wa Jesu, mwamana wa Siraki

1Nyi ngu gu bonga, uwe Pfhumu ni

Mufumeli,

nyi ngu gu rungudza uwe Nungungulu,

Muvbanyisi wangu.

Nyi ngu bonga lina lago.

2Kholu uwe u khade muvhikeli ni wuthavelo

wangu,

u vbulugiside givili gyangu gumbembiswa,

milaphwini nya malimi nya guvivbe

ni ga magana ma dusago malipha.

Mbeli ga valala vangu, u khade muvhikeli

wangu;

u nyi vbulugiside.

3Khu wugulu nya wuhindzi wago

ni wa lina lago, u nyi vbulugiside

ga magwaha ya avo va nga bani va gu ngurangura, na

va dzi dongisede gu nyi vbadzulela,

ni mandzani ga vale va zamago gu dusa womi

wangu,

ni ga sigaradzo nya singi si nyi

tshanisidego.

4U nyi vbanyiside ga pfilupfilu nya nilo wu

nga bani wu nyi randrede, wu nyi hevbela,

nilo nyi ngamba wu khondrisa eni.

5U nyi vbulugiside gumbemba guetani nya liphala nya vafi,

ga malimi nya gunyenyeze,

ni ga magana nya malipha;

6ga milembo nya lidimi nyamba

lulama, vbafuvbi ni mufumeli.

Hefemulo wangu wu diri vbafuvbi nya gufe,

guvbanya gwangu gu diri vbafuvbi ni gu

thega

guetani nya liphala nya vafi.

7Va di nyi randrela khu maphuvbo

yatshavbo,

gu diri mwalo ni moyo nya gu nyi phasedzele;

nyi di gu lirela giphaso nya vathu,

aholu kha gya wonega gilo.

8Khu guralo, nyi dundrugide wuhindzi wago

Pfhumu,

ni mithumo yago gukhugela matshiguni ya gale,

kholu u ngu vbanyisa avo va gu tumbago

ni gu va vbulugisa mandzani ga valala.

9Khu guralo, nyi khusedzide nombelo wangu

gukhugela mafuni,

nyi lomba gukheni u nyi vbulugisa lufu.

10Nyi ranide Pfhumu Nungungulu, babe

wa Mune wangu,

gasi a si nyi digi matshiguni nya

sigaradzo, olu nyi

hamugago wangu nya gu nyi phase gikhati nyi sokhovedzwago

khu va nya matshandza.

Nyi na rungudza lina lago nyamba garala;

nyi na gu dhumisa nyi embelela dzindzimo

nya gubonge.

11Ni nombelo wangu wu pwidwe,

kholu u nyi vbulugiside gufa,

gikhatini nya guvivbe.

12Khu guralo, eni nyi na gu dhumisa, nyi

embelela rungudzo wago,

nyi bonga lina la Pfhumu Nungungulu.

Ndzila nya guvbwete guti

13Gikhati eni nyi nga bani nyi ngari lidzaha, nyi si

gu giri malendro,

nyi vbwetide guti, na nyi tshulegide, umo nya milombelo yangu.

14Nyi lombide ga Nungungulu mbeli nya nyumba ya Pfhumu,

wulangani nya guage, na nyi gu zama gu

gu landrisela kala mahegiso nya guvbanye gwangu.

15Guti gu ningide senge kha nga simbo nya wuvha wu

rumbugago,

monyo wangu wu di tsakiswa khugo;

ni migondro yangu yi di gimbila khu ndzila

nya gululame;

gukhugela wudzahani wangu, kha nga uvha yi vidzidwego, nya

gulandrisela mihweha yaye.

16Nyi kangetede vbadugwana ndzeve yangu nyi yingisa,

nyi di gu tugula nyamba hwela;

nyabune nyi di mana guti.

17Khu kotani nya ugo, nyi dugelede ga silo nya

sikhongolo,

khu guralo, nyi na mu rungudza wule a nga

nyi ningago guti,

18kholu nyi dzi dongisede gu gu thumisa,

nyi khathalede gu gira iso nya sadi

gima kha nyi na nga khala dzitshoni.

19Hefemulo wangu wu dwanede guti,

mapimo yangu yatshavbo nyi ma

vegisede gu landrisa Nayo.

Nyi di khusedzide mandza yangu vbatshani nyi gira nomdelo,

nyi dzi sode khu wupumbu wangu khu

guhangwa khugo.

20Hefemulo wangu nyi wu thendregedzide wu khedzisa guti,

nyi gu manide kholu nyi tengide.

Khu kotani nya ugo, nyi manide wugengeli

gukhugela guhegulani;

khu guralo, gima kha nya digwa.

21Mahembe yangu ma di dzura khu gu dogolela gu gu

mana;

khu guralo, nyi manide thomba nya yadi nya gutsakise.

22Pfhumu Nungunuglu a di nyi tshatshazela

khu gu nyi ninga lidimi

nyi na mu rungudzago khilo.

23Hidzimelani eno gwangu, enu mu si gu manigo

sihevbudzo,

deluni muta vbanya nyumbani gwangu nya sihevbulo.

24Khu ginani mu vbwetago gu dzi himbedzela

gu mana guti,

lugo mihefemulo yanu ya gu khondra khu lidora nya ugo?

25Nyi di tula likana langu nyi va embela, kheni:

Ghanyani khu guti,

nyamba vbwetega dzitsapawu;

26nogisani dzithamo dzanu mu hakhe rwalo nya guti,

hefemulo wanu wu na hakhe sihevbudzo,

Guti gomo vbafuvbi ga uye a gu vbwetago!

27Wonani khu maho yanu gukhenu,

nyi thumide vbadugwana,

aholu nyi manide gurula nya gungi.

28Vbwetani guti, ambari nari khu tengo nya

parata,

khu ugo, mu na manani ndralama nya yingi;

29hefemulo wanu wu na nengele wuhindzini

gwa Pfhumu,

gambe mu nga khali dzitshoni khu gu mu

rungudza.

30Girani mithumo yanu gi si gu vbohi gikhati

gi vegisidwego,

Nungungulu a na mi

ninga tshatshazelo khu gikhati gyaye.

NDIMO NYA RUNGUDZO

Guti gwa Jesu, mwamana wa Siraki.

Rungudzani Pfhumu kholu uye khwadi,

kholu wuhindzi waye wu ngu simama

kala gupindruga.

Rungudzani Nungungulu nya wudhumo,

kholu wuhindzi waye wu ngu simama

kala gupindruga.

Rungudzani muemeli wa Israyeli,

kholu wuhindzi waye wu ngu simama

kala gupindruga.

Rungudzani muvangi nya silo satshavbo,

kholu wuhindzi waye wu ngu simama

kala gupindruga.

Rungudzani uye a tombanisago avo

va phalalegidego va Israyeli,

kholu wuhindzi waye wu ngu simama

kala gupindruga.

Rungudzani uye a vbahedzago lidhoropa laye

ni nyumba yaye nya miphaso,

kholu wuhindzi waye wu ngu simama

kala gupindruga.

Rungudzani uye a wusedzago wufumu wa

Dhavhidhe,