Bheni Siraki 50
50
Simoni
(Levhi 9:12-13,16; Nehemiya 6:23-27; 10:2-10)
1Simoni, mwamana wa Oniya,
khongolo nya muphasi nya mhamba,
gikhatini nya guvbanye gwaye vbahedzide
Nyumba ya Pfhumu Nungungulu,
matshiguni gwaye gambe tiyiside nyumba ya
Nungungulu.
2Matshiguni gwaye gambe khuye a nga tsitsago
siseketelo nya nyumba ni libhiyo nya gulaphe
nya dzindzari dzimbili,
tsitside madingo nya gulaphe nya likhokhola nya Nyumba ya Nungungulu.
3Gikhati gyaye gu kembidwe lidhamo nya
mati,
nya gukhwatshi yiphwa, khu wukhongolo waye.
4A dzi garadzide khu gu sayisa vathu vaye
va si yiswi gumbembani,
bhiyide lidhoropa khu likhokhola gasi gu
dzi wonela ga valala.
5Idzo a nga bani a gu zundega khidzo
vbakari nya vathu vaye,
gikhati a nga bani a gu duga khu Wulangani
nya Guage Ngudzu!
6A di gira gukhwatshi khu thandra nya guge vbakari
nya mapfhi,
a fanana ni ngima avbo wu selago liduwa;
7a fanana ni lidambo li wenengedzago vbatshani
nya Nyumba ya Nungungulu a Khusegidego Ngudzu,
a fanana ni wulaho wa nyazimu wu
wenengedzago mapfhini nya gungangamele;
8gu fanana ni genge nya simbo nya senge
gikhatini nya maronga,
kha nga senge bambe ni tsongo nya mati,
kha nga litamo nya simbo nya libani,
matshiguni nya maronga;
9kha nga nilo nya libani gyomboni nya
guvbisedwe umo libani,
kha nga kanvu nya ndralama nya gudhimbe na wu
mburisedwe khu siwindri;
10kha nga simbo nya olivha wu tadego khu
mihandro,
kha nga simbo nya zulameti wu laphago kala
mapfhini.
11Avbo Simoni a nga bani na gu ambala gifenengelo nya
wudhumo nya wuphasi,
ni gu ambala simburiselo nya wugulu waye;
avbo a nga bani na gu gwela
vbagiluvelotunu nya gukatege
a di tadza khu wudhumo wulangani nya miphaso;
12avbo a nga bani na gu hakha sipandre si mu
lumbago khu mandzani ga vaphasi nya
mhamba,
a diya ema bambe nya nilo nya giluvelo,
vandriyaye va mu randrela kha nga hari,
kha nga lithembwe nya misedhari gigomoni gya
Libhanoni,
kha nga makuti nya migokho;
13Sanana satshavbo sa Aroni wumburini gwawe gwatshavbo,
si di ema gumogo naye,
na si pharide mandzani gwawe miningelo nya
guluve khiyo Pfhumu Nungungulu,
mbeli nya tshangano watshavbo wa na Israyeli,
14kala uye a vbedza gu gira thumo nya wuphasi
vbagiluvelotunu;
a vegedzela gwadi miningelo nya gubikele ga Uye a
Khusegidego Ngudzu, Mune nya Tshivba Yatshavbo;
15A thawuludza mandza a gu dzega gikombe
a gira ningelo nya wadwa nya dziuvha,
a wu vbaladza vbavbatshi nya giluvelo,
ningelo nya mahema nya gusalalegise Uye a Khusegidego Ngudzu,
Mufumeli nya litigo latshavbo.
16Khavbo avbo, vaphasi nya mhamba a gu sanana sa Aroni si di khusa
malito yawe
si womba mipundru nya dzisimbi,
gupwala ligwaha nya likhongolo ngudzu,
kha nga gialakanyiso mbeli ga Uye a
Khusegidego Ngudzu.
17Gikhati gya gimwegyo, vathu vatshavbo va di
dzegela gu khidzima, va thega khu khovbe vbavbatshi,
gasi gu khozela Pfhumu,
Nungungulu nya Tshivba Yatshavbo a
Khusegidego ngudzu.
18Vaembeleli va di khusedza malito yawe
va embelela dzindzimo;
gu pwala gudzuma nya
litembo nya gutshambe.
19Vathu va di lombelela ga Pfhumu a
Khusegidego Ngudzu, va lila mbeli ga Uye nya
Wuhindzi watshavbo,
kala guvbela mhamba yatshavbo nya
gugiredwe Pfhumu
ni guvbedza thumo nya guage.
20Khavbo avbo, uye a di relela a gu khusedzela
mandza
vbatshani nya tshangano watshavbo wa na
Israyeli,
gasi gu va ninga gikategiso gya Pfhumu Nungungulu khu lito nya gukhugege,
ni gu mana wuzundzo nya guganele lina
laye nya guage.
21Vathu va di engedza gambe gu kidzima,
gasi gu hakha gikategiso gya Uye a
Khusegidego Ngudzu.
Guhegisa
22Gasi olu, rungudzani Nungungulu nya silo
satshavbo,
a girago silo nya sikhongolo tigoni
gwatshavbo.
A ngu khusedza matshigu yathu, gukhugela ndrani
ga vamayi vathu,
ni gu hi phasedzela gukhedza khu wuhindzi
waye.
23Uye a na hi ninge gunengela ga monyoni
matshiguni nya guvbanye gwathu,
gu fume gurula tigoni ga Israyeli kha nga ga matshigu ya gale.
24Wuhigo waye wu na simame khu gu
tumbega ga ethu,
gasi gu hi vbulugisa matshiguni yathu.
25Momo mahundzu mavili ma gorosago
hefemulo wangu,
eli nya wuraru ne khandri lihundzu:
26Avo va vbanyago gigomoni ga Seyiri ni
Vafilisitiya,
ni lifumbu nya vathu nya guvivbedwe khu monyo va
vbanyago tigoni ga Sikemi.
27Sihevbudzo nya guti ni wugengeli,
khiso si nga tshidwago na silovetedwe
libhukuni momu, khu
Jesu, mwamana wa Siraki, mwamana wa
Eliyazari, wa Jerusalema, a nga guhulago guti
gwa monyoni gwaye kha nga ndzadzi.
28Kategide uye a alakanyelago silo sesi!
Uye a na si vegedzago monyoni gwaye,
a na khala muthu nya guti.
29Oyu a na si landrisago guvbanyani gwaye, a na mana
tshivba nya gupale satshavbo,
kholu wenengedzo wa Pfhumu wu na
gimbidzisa migondro yaye.
Vathu va gu ni githawo uye a gu va ninga guti.
A na Bongwe Pfhumu Nungungulu kala
gupindruga!
Amen! Amen!
Currently Selected:
Bheni Siraki 50: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.