Bheni Siraki 44
44
WUZUNDZO GA VAKOKWE VATHU
(Bheni Siraki 44:1—50:21)
1Hongoleni hi zundze vathu va zundzegidego
nya vababe vathu,
gu khedza khu mimela ni mimelana yawe.
2Pfhumu a va ningide wudhumo nya
wukhongolo nya gukhugege,
gukhugela guhegulani nya litigo.
3Avo va fumede mifumuni gwawe,
vathu nya ndruma khu kotani nya tshivba
yawe;
vathu nya wusingalagadzi, khu kotani nya mapimo
yawe,
ni vahuweleli nya siwoniso nya wuprofeti.
4Vagimbidzisi nya vathu, khu silayelo sawe,
vathangeli nya vathu, khu wugengeli wawe,
vathu nya guti gu sawutela matimo khu
sihevbudzo sawe,
5vagiri nya matembo nya wutsendze
ni vaembeleli nya sithokhozelo nya
gulovetedwe.
6Vama nya sitetema, nya gutale khu tshivba,
va nga vbanyago khu gurula dzindrangani
gwawe.
7Avo vatshavbo va manide wudhumo vbakari
nya vathu nya melana wawe,
va khala wuzundzo gikhatini nya guvbanye gwawe.
8Vbakari gwawe womo a tshidego lina,
li na gu simamago gusawutela wuzundzo wawe.
9Ni vambe nya gu ambari gu dundrugwa kha
va ngu dundrugwa gambe;
va fuvide nya gukhwatshi ni
gu menega kha va nga manega mafuni.
Va velegidwe gukhwatshi kha va nga
velegwa gilo,
khidzo nugo kharato ni sanana sawe, si giride niso
kharalo hwane gwawe.
10Aholu, avo va diri vathu nya
wuhindzi,
avo mithumo yawe nya wuhindzi, gima kha yi na
divadwa.
11Sigiro sawe nya sadi si ngu simama
livelegoni gwawe,
ni thomba yawe ya gu simama ga
situgulwana sawe.
12Situgulwana sawe si simamide gutumbega
umo nya Gidzumeledzwano,
ni sanana sawe niso, khu kotani gwawe.
13Situgulwana sawe si na simama kala
gupindruga,
ni wudhumo wawe kha
wu na vbela.
14Sirumbi sawe si dzingidwe mugurulani,
malina yawe ma na vbanya khu mimela ni
mimelana.
15Mayigo ma na huwelela guti gwawe,
ni tshangano wu na embelela wuzundzo wawe.
Henoki ni Nowa
(Genesi 5:18-24; 6:9-10; 8:21-22; Vahebheru 11:5-7)
16Henoki a di tsakisa Pfhumu
Nungungulu, a gu khusedzedwa guya ndzadzini;
khade giwonelo nya guvbindrugedze mavbanyelo
ga mayigo yatshavbo nya mimelana ni mimelana.
17Nowa wonidwe kha nga mwama nya guvbelede ni gululama,
gikhatini nya likhulo, khade uye
mutshanganisi nya wuyelelano.
Khu kotani gwaye, gu tshidwe vathu nya gukari
mafuni,
gikhati gu nga talago ndrambi.
18Khavbo gwaye Nungungulu giride
gidzumeledzwano nya gupindruge,
a sambanya gukhuye mwalo muthu a na gu
mbembiswago gambe khu ndrambi.
Abrahama, Isaki ni Jakobe
(Genesi 12:1-4; 26:3-5; Varoma 4:13-25; Vahebheru 11:8-10,17-21)
19Abrahama khuye babe nya vathu nya
vangi nyambana tengo,
mwalo a mu manelago khu wuzundzo.
20Vegiside Nayo wa Uye a Khusegidego
Ngudzu, a gira Naye gidzumeledzwano.
Pfhumu Nungungulu lovide
gidzumeledzwano gegi nyamani gwaye;
khu gikhati nya gulingwe, manegide na
tumbegide.
21Khu guralo Pfhumu a mu tumbiside khu
gusambanya,
gukhuye mayigo ma na kategiswa khavbo
nya melego waye,
ni livelego laye li na andra kha nga
kudzudzwane nya mafu,
ni gukhuye a na khusedza situgulwana saye kha
nga dzinyeledzi,
ni thomba nya litigo laye yi na ladza gukhugela
mahegiso nya yiphwa kala ga yimbe yiphwa,
ni gukhugela tsongoni kala mahegiso nya
litigo.
22Giride idzosaye gambe ni Isaki khu
lihaladzo la babe waye Abrahama.
23Uye handzegide hungoni ga Jakobe,
gikategiso gya vathu vatshavbo ni gidzumeledzwano.
A mu tiyiside ga sikategiso saye,
a mu ninga litigo gu khala thomba yaye;
a li kabanisede khu sipandre,
a gu li kavedzela ga likhumi na mavili
mahundzu.
Currently Selected:
Bheni Siraki 44: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.