Bheni Siraki 42
42
1U nga khali dzitshoni khu silo nyi vbwetago gu
gu embela,
gambe u nga digi gu si thuma khu
gu thava vathu.
2U nga khali dzitshoni khu Nayo wa Uye a Khusegidego Ngudzu ni
Gidzumeledzwano,
ni gululama gu lamulago khu nayo nya lisine, ambari ni muthu nya
guvivbedwe khu monyo,#42:2 Avba muhevbudzi a gu hi embela gukhuye vathu vatshavbo va fanede gu lamudwa khu lisine ambari ni vale nya guvivbedwe khu monyo ni sighohi, a ngu yela gu lamudwa khu nayo ni lisine.
3khu gu ningana tshamuselo nya mitengo ni githumi gikwanu,
ni vabangaladzi liendroni,
khu giningwa nya thomba gi lumbago dzipari
dzago,
4khu gu thumisa gikalo nya gululame ni pimo
nya lisine,
khu gu vbweta dzithomba nya dzidugwana mwendro nya dzingi,
5khu gumba dwanela gu wuyedwa khu bhindzu thumoni nya wugwewo ni
varengisi,
khu gukawuka sanana sago
gikhati gyatshavbo,
ni gupfhurugisa novba hwamboni ga
githumi gyago nya guvivbedwe khu monyo,
6ni gu vega gitambo mwanyani nya nyumba
a khalago umo nyamayi nyambasi
wadi,
ni gukhotela satshavbo khu pfhungulo, avbo ma belago
mandza nya mangi.
7U nga khali dzitshoni gu sayela ni gu pima khu gikalo satshavbo u
ningelago,
ni gulovetela umo nya libhuku
satshavbo u hakhago ni gu ningela.
8U nga khali dzitshoni khu gukawuka muthu nya
guvivbedwe khu monyo ni gipumbu,
ni lidhota nya gugumbe ni gurereka li
ganedzisanago ni vathu vaphya, mwendro gu thuledzwa khu wubhayi;
khu kharato, u na dzi yeyedza khu lisine nuri
muthu nya guti, u zundzega ga vatshavbo.
Lisayiso la babe ga nyamahegyane waye
9Nyamahegyane gigaradzo gi sihadego monyoni
ga babe waye,
gu mu wonelela gwaye kha gu mu ningi
ligovbe.
Gya gu bani gi ngari gyagadzyana, uye a gu thava gukhuye gi
nga vbindredwa khu tanga yaye gi si gu dzegwi;
gya gu bani gi dzegidwe, uye a gu thava gukhuye gi ngamba godwa khu mwama waye;#42:9 Khu nayo nya tumbunugo wa Vajudha, nyamayi a gumba godwa khu mwama waye, gu di dzumedziswa mwama gu ninga musi nya hulano nyamayi a mu tutumisa a bwelela gaya gwawe.
10A ngu thava gambe gukhuye gi nga
sagedwa wukendzi waye,
gi mana mimba na gi ngari gaya ga vavelegi vaye;
ni gukhuye gya gu dzegwa gi si yi tumbega ga mwama waye,
mwendro ni gu khala gyumba nyamba velega.
11Khedzisela khu tshivba nyamahegyane wago
nya gugwaruge,
gasi a si gu khadzisi gihegiso ga valala vago,
ni gu bhudwa khuwe dhoropani va gu dusa
lisima,
ni gu u si khali dzitshoni vbakari nya gidzemo nya
vathu.
Vanyamayi
12U nga vegi maho yago ga wumburi wa muthu,
ambari gu gira wupari nya wukhongolo ni vanyamayi,
13kholu kha nga khu guambalani gu dugago
mavbele,
kharato nugo khu ga nyamayi guduga guvivba ga vanyamayi.
14Mwama nyambasi wadi i tshukwana, a na gu ghohela vbadugwana,
guvbindra nyamayi nya wadi;
kholu nyamayi a ngu thela dzitshoni ni givalo.
GIPANDRE NYA WUVILI
(Bheni Siraki 42:15—50:29)
Wudhumo wa Nungungulu ga Sivangwa saye
15Olu nyi na dundrugela mithumo
ya Pfhumu Nungungulu,
gambe nyi na huwelela iso nyi si wonego.
Khu magana ya Pfhumu Nungungulu,
mithumo yaye yi di girega,
khu gugola gwaye nayo waye wu giregide.
16Lidambo li wenengedzago la gu wona
silo satshavbo;
mithumo ya Pfhumu Nungungulu yi tade
khu wudhumo waye.
17Va nya gukatega va Pfhumu kha va dzi kodzi gu
sayela siliwugiso saye satshavbo,
esi Pfhumu nya tshivba yatshavbo a si
vbahidego a si tiyisa,
gasi si simama na siromo wudhumoni
gwaye.
18Uye a ngu khedzisa a wona nondrwani ni monyoni
nya muthu,
a ngu yiti mipimiso yawe yatshavbo.
Pfhumu khu lisine a nguti wugengeli
watshavbo,
a nguti siyeyedzo nya sikhati si nga gutago.
19A ngu huwelela iso si vbindridego niso si
nga gutago,
a ngu tugula mihweha nya silo si sihadego.
20Yi mwalo mipimiso a gumba yi ti,
avbo gwaye li mwalo ni lito limwedo li mu
sihalelago.
21Vegedzede khu sasamedzo nya wadi sigiro
nya sikhongolo nya guti gwaye,
kholu, Uye womo gukhugela guhegulani na gu
si vangwi gilo kala gupindruga.
Gimwalo gi dzi kodzago gu engedzedwa gwaye, ambari gu
vbungudwa,
gambe kha vbweti wusingalagadzi wa muthu.
22Mithumo yaye yatshavbo yi ngu nengedzisa,
ambari nari tsahe yidugwanana basi
hi kodzago gu yi wona.
23Mithumo yeyi yi ngu vbanya ni gu simama
kala gupindruga,
yi ngu mu yingisa ga satshavbo
a si vbwetago.
24Silo satshavbo sa gu gimbila khu mipatwa, sivili sivili, nya guhambane,
gimwegyo ni gimwegyo gya gu thumela
gikwawe,
gimwalo a nga gi girago nyamba gi tshanganisa gi vbelela.
25Gimwegyo gya gu thumela wuwadi gimbe,
khu mani a na garalago khu gu alakanyela
wudhumo waye?
Currently Selected:
Bheni Siraki 42: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.