Bheni Siraki 40
40
Wusiwana wa vathu
1Gigaradzo nya gikhongolo ngudzu gi
vangedwe vathu vatshavbo
ni rwalo nya gulemele wu rwegidwe sanana
sa Adhamu,
gukhugela litshigu va dugago khu ndrani
ga mayi wawe,
kala litshigu va bwelelago mafuni, ndrani ga mayi wa
vatshavbo.
2Va tade khu mahingigedzo ni hwanga myonyoni gwawe,
va gu lirela khu wuvi matshigu ya mbeli,
khu gu pimisela litshigu nya gufe gwawe.
3Gukhugela uye a khadego vbagikhalotunu
nya wudhumo,
kala ga uye a puluwundridego mafuni
ni ngumani;
4gukhugela uye a ambadego dzingandzu nya
giwunguwungu ni gu dzi mburisela khu
gihugu nya wufumu,
kala ga wule a fenengelago basi
mwendra nya dzindzowo;
gu wonega basi likhulo, wufu,
gugaradzega, ghudzeghudze,
hwanga nya lufu, guvbisega nyamba vbela ni
mayunga.
5Gikhati uye aya hefemulago dawuni,
ligovbe nya wutshigu la guta dzuwungela
gupimisa gwaye.
6Uye gikhati gidugwana a lalago,
ambari guhamuga ni gikhati nya
gulale a hefemula,
ni muligovbeni nya wutshigu a gu garadzega
gukhwatshi vbakari nya mihani,
khu siwoniso sa monyoni gwaye,
gufana ni mwama a thavago khu
nyimbitunu.
7A gu dzi hingigedza nari wulangani nya gukhalege
gwadi na tiyide,
a gu khendzuga bwelo khavbo a liwuga khu hwanga waye nyambana gighelo.
8Esi si ngu dugelela ga sivangwa satshavbo,
gukhugela ga vathu kala
ga sirengo.
Aholu ga sighohi, sa gu vbisa ngudzu
guvbindra livbandre na dzimbili dzinyondro.
9Lufu, novba, mayunga, matshari, dzitshanisa,
ndzala, gumbembiswa ni mitungu;
10satshavbo sesi si vangedwe vathu nya
guvivbedwe khu monyo,
khu kotani gwawe
gu manegide talo nya mati.
Dzithomba dza vathu nya guvivbedwe khu monyo
11Satshavbo si dugago khu mafuni si na
bwelela mafuni,
niso si dugago khu matini si na bwelelela
phwani.
12Gurengelela gwatshavbo ni wudambane si
na fuviswa,
aholu gululama gu na vbanya kala
gupindruga.
13Dzithomba dza vakalaveli
dzi na banga kha nga tshengeledzo nya mati nya ndzadzi;
dzi vbindra nga libara li pandrago ya guwa
ndzadzi.
14Mulamuli nya guvivbedwe khu monyo a
gu nengela khu gu rengeledwa,
aholu guhegisani, avo va thumisago
wudambane wowo, va na mbembiswa.
15Livelego la avo nya guvivbedwe khu monyo
kha li na thela matamo,
ni mikhamba nya gunyenyeze yomo
mavbalani nya siwindri.
16Simbo wu dandrago vbafuvbi ni mati,
bambe nya tsongo,
wu na sigudwa na yi si gu bangi mitongwe yatshavbo ya khabini.
17Wuwadi wa gu fanana ni lithembwe nya gutale khu makategwa,
ni wuhindzi wu na simama kala gupindruga.
Guvbanya nya gukhalege
18Gu ngu lombela guvbanya ga muthu wule a tshulegidego
ni ga wule a vbanyago khu mihandro nya thumo waye;
aholu, gu ngu tsakisa ngudzu guvbindrisa,
guvbanya ga wule a manago thomba.
19Guvelega sanana ni guvbaha lidhoropa si ngu ninga ndruma nyamba vbela;
aholu satshavbo sesi sa gu vbindrwa khu gu mana nyamayi
nyambana gihoso.
20Wadwa ni wutsendze, sa gu tsakisa monyo;
aholu lihaladzo nya guti, li ngu dzi yeyedza
vbatshani ga silo sesi satshavbo.
21Sengele ni gitendre sa gu thela litembo nya
gumbure,
aholu lidimi li ganelago silo nya gutshambe,
li ngu vbindra satshavbo
sa sivili.
22Guyedwa ni wumburi sa gu tsakisa maho,
aholu misimbo ya mahangeni yi ngu
tsakisa guvbindra silo sesi satshavbo.
23Pari nya yadi ya gu phasedzela pari yaye
khu gikhati gi vbwetegago;
aholu esi si vbindrago ava va vavili,
khu nyamayi ni mwama waye.
24Vandruye ni vaphasedzeli, va ngu
vbwetega gikhati nya sigaradzo,
aholu wuhindzi, wu na gu vbanyisa ngudzu
guvbindra avo.
25Ndralama ni parata gitiyiso nya migondro,
aholu gilayelo nya gyadi khigyo gi phasago
guvbindra satshavbo.
26Dzithomba ni tshivba sa gu khusedza monyo,
aholu gu ninga githawo Pfhumu
Nungungulu gu ngu vbindra silo satshavbo.
Uye a thavago Pfhumu kha keneledwi khu gilo,
uye a gu ni githawo ga Pfhumu kha vbweti gambe gimbe giphaso.
27Guninga githawo Pfhumu Nungungulu,
gu fanana ni lithembwe nya makategwa
nya gutale khu sikategiso;
li ngu gu vhikela gwadi guvbindra wumbe
wuzundzo.
Gulomba zomola
28Mwanangu, u nga tshuki u vbanya khu
gu lomba zomola;
i tshukwana gufa guvbindra gu
lomba zomola.
29Muthu a khedzago khu guvbisega guhodza
ga mumbe muthu,
a gu vbanya khu mavbanyelo nyambasi yadi;
a gu dzi nyenyezisa khu guhodza gu si mu lumbigo.
Aholu muthu a layidwego ni gu hevbudzwa gwadi
a ngu dzi vegedza gumba gira silo nya
nga esi.
30Khanani ga muthu nyambasi wadi, gu ngu
tshamba gu lomba zomola,
aholu mahembeni gwaye gu ngu khondra
nga nilo.
Currently Selected:
Bheni Siraki 40: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.