Bheni Siraki 39
39
Guzundza mulovi
1Khandridzo kharato ga oyu a dzi vegiselago gu alakanyela
Nayo wa Uye a Khusegidego Ngudzu.
Uye a gu hevbula gwadi guti gwa vagale ni gu
dzi vegisela ga sihevbulo nya wuprofeti.
2A gu vegedza sihevbudzo sa vathu va
zundzegidego, a etisa misihalo nya sipimaniso
nya mavingu.
3A gu wudzisela gwadi misihalo nya mavingu,
a dzi garadza khu gu vbweta tshamuselo
wu sihadego nya sipimaniso.
4A gu gira thumo waye vbakari ga vathu nya
guthavisege,
ni gu dzi wonegisa mbeli ga vafumeli.
A ngu gimbila gimbila mayigoni nya mangi ya
vbavbandze,
a ngu siti khu gu si vbanya, iso nya sadi niso nyamba sadi si guromo
vbakari nya vathu.
5Gukhugela gukhugani nya lidambo, a gu wuyisa
monyo waye ga Pfhumu
Nungungulu a nga mu vangago,
a gira nombelo mbeli ga Uye a Khusegidego Ngudzu.
A gu tula likana khu nombelo, a lomba gutsetseledwa sighoho.
6A gu bani nari gugola ga Pfhumu, Mune wa Satshavbo,
uye a na tadzwa khu liphuvbo nya wugengeli;
khavbo avbo, uye a na wisa
magana nya guti, gu fanana ni ndzadzi;
nombeloni gwaye a na rungudza Pfhumu
Nungungulu.
7A na kodza gulamula khu gululama
ni wugengeli;
a na alakanyela misihalo ya
Nungungulu.
8Uye mune kamwe a na hevbudza sihevbulo a
hevbudego,
a na vega wuzundzo waye
Nayo nya Gidzumeledzwano gya Pfhumu
Nungungulu.
9Nya vangi va na zundza guti gwaye
ugo nya gu gima kha gu na divadwa.
A na alakanywa gikhati gyatshavbo
ni lina laye li na vbanya li dundrugwa khu
mimela ni mimela.
10Mayigo ma na huwelela guti gwaye,
ni tshangano wu na pwadza wuzundzo waye.
11A gu vbanya myaga nya gutale, a na mana
ndruma nya yikhongolo guvbindra likhumi
mazana vambe,
gambe a gufa, iso a na gu bani giride si na
bani si enede.
Sigiro satshavbo sa Nungungulu khyadi
12Nyi na ganela gambe khiso nyi nga si pimisago
kholu nyi tade khapha, gufana ni ngima nya gutale.
13Nyi yingiseni, enu, sanana mu gu ni githawo ga Nungungulu,
thelani senge gu fanana ni simbo nya senge wu
dandrago bambe nya mati;
14gu fanana ni libani, phalalegisani mahema
nya gunungele gwadi,
rumbugani nga senge nya wumburi,
dusani mahema nya gunungele, mu embelela
dzindzimo.
Bongani Pfhumu khu sigiro saye satshavbo.
15Huwelelani wugulu nya lina laye,
khu dzindzimo dza maganani gwanu ni
sitendre sanu,
tivisani wuzundzo waye.
Ganelani kharato khu gu mu zundza.
16Sigiro satshavbo sa Pfhumu khyadi, si ngu
samadzisa,
satshavbo a si tivisidego si na girega khu
gikhati gyakone.
Mwalo a dzi kodzago gu ganela, khuye:
“Ginani egi? Khu ginani gile?”
Kholu satshavbo si na hevbudwa khu gikhati gyakone.
17Khu lito laye, mati ma gu ema ma gu patana;
khu guruma nya lito laye, mati ma gu
manega madhamoni.
18Khu guruma gwaye, sa gu girega
satshavbo iso Uye a si vbwetago;
gambe mwalo a dzi kodzago gu himbedzela
giphaso gyaye.
19Mithumo yatshavbo nya vathu, yomo mbeli gwaye
gimwalo gi sihadego mahoni gwaye.
20Maho yaye ma gu khedzisa ma wona guthawuluga nya
mazanazana nya myaga,
ga Uye gimwalo gi liwugisago.
21Kha gu yeli gu ganedwa gupwani:
“Ginani egi? Gya gu thuma ginani
gile?”
Kholu silo satshavbo si giredwe thumo waye.
22Gikategiso gyaye gya gu goga gu fanana ni
tsongo,
gya gu fanana ni talo nya mati wu langaladzago
mafuni gwatshavbo.
23Likhulo la Pfhumu li na thegela mayigo ma
si dzumeligo gu mu vbweta,
kha nga idzo Uye a nga vbindrugedzago khidzo
mati ma gu khala munyu.
24Ga avo va agidego, dzindzila dzaye dzi
lulamide,
aholu, ga avo nya guvivbedwe khu monyo, dzi tade khu
sikidinga.
25Gukhugela guhegulani silo nya sadi si
giredwe vathu nya vadi;
gasi silo nya guvivbe si giredwe sighohi.
26Silo si vbwetegago ngudzu guvbanyani
nya muthu, khesi:
Mati, nilo, simbi, munyu, wuguvbi nya
mavbila,
mahwe ni wulombe, wadwa nya dziuvha, mafura ni
guambala.
27Silo sesi satshavbo, khyadi ga vathu nya
vadi,
gasi ga vale nya guvivbedwe khu monyo sa gu khala silo nyamba sadi.
28Dzomo dziphuvbo dzi vangidwego gasi
guphodza khidzo,
dzi di engedzela guthisa gwawe khu kotani
nya likhulo.
Gikhati nya gumbembiswe, dzi na thumisa
dzitshivba dzawe,
dzi rudzisa likhulo la wule a dzi vangidego.
29Nilo, maralala, ndzala ni lufu, silo sesi
satshavbo si giredwe gu tsayisa khiso.
30Magwaha nya sirengo sa khabini, dzihume,
dzinyoga,
litshari nya gusasele, si vegedwe gumbembisa
va nya guvivbedwa khu monyo.
31Silo sesi satshavbo sa gu nengela khu gu gira
guruma ga Pfhumu,
gambe si na khala na si dongide mafuni,
gasi gu mu thumela gikhatini gi vbwetegago,
gasi avbo gi na gu vbohago gikhati, si
yingisa khu githawo guruma gwaye.
32Khu guralo, gukhugela guhegulani,
eni nyi tiyide, heni ndre, ga mipimiso yangu, nyi yi alakanyelago nyi bwelo khavbo nyi yi lova.
33Mithumo yatshavbo ya Pfhumu khyadi;
avbo gi na vbohago gikhati, satshavbo si
na landrisa guruma nya tumbunugo wawe.
34Gu mwalo lisine nya guganele, khethu:
“Egi gi vivbide guvbindra gile.”
Kholu silo si na wonwa nari sadi gikhatini
gyakone.
35Gasi olu rungudzani ni gu bonga lina la
Pfhumu Nungungulu,
khu magana ni monyo wanu watshavbo.
Currently Selected:
Bheni Siraki 39: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.