Bheni Siraki 37
37
Pari nya lisine neyi nya malipha
1Pari yatshavbo ya gu ganela, khiyo:
“Eni neni nyi thanganide nago wupari.”
Aholu, dzomo dzipari a gu dzipari basi nya lina.
2Ina esi kha si pwisi guvbisa kala gufani,
pari ya gu vbindrugedza yi khala nala, gani?
3Ama uwe, makhalelo nya guvivbe, gasi wa
gudugela evbini,
nya gukala u fenengedza litigo khu wuvivbi wago?
4Womo mungana a dzi girago
pari mihaganoni,
aholu wa gu bani nuri sigaradzoni a
vbindrugedza a khala nala.
5Yomo pari yi pwago gisiro khu gusaniseka
ga pari yaye,
khu gu vbweta gutsakisa girumbu gyaye;
gikhatini nya litunga ya gu phara
gitshangu.
6Monyoni gwago u nga divaledwi khu pari yago;
gikhati u ghanyago u nga digi gu mu dundruga.
Singalagadzi nya wadi nuye nyambasi wadi
7Singalagadzi watshavbo a gu dzi zundza khu
wusingalagadzi waye,
aholu vomo vasingalagadzi va
dwanelago basi gu tsakisa gugola gwawe.
8Dzi wonele wa gu bani nuri mbeli ga
singalagadzi,
gilo nya guphele khedza ginani a gi
vbwetago,
kholu uye a ngu dzi kodza gu gu ninga
wusingalagadzi nya gudwanele gu mana
khavbo gwago esi a si vbwetago uye;
a nga tshukha a gu rwega sigaradzo saye,
9a gu embela, khuye: “U womo ndzilani nya yadi,” uye a bela khu yimbe,
gasi gu wona ginani gi na gu dugelelago.
10U nga yi lomba wusingalagadzi ga uye a si
gu wonigo gwadi,
ni avo va gu girelago lidiwo u nga va yeyedzi
sihalo wago.
11U nga lombi mawonelo ga nyamayi
nya wufu khu mahungu ya wule a hengelago naye mwama,
ga muthu nya hwanga, khu mahungu nya nyimbi,
ga muthu nya wugwewo, khu mahungu nya
wurengisi,
ga murengi, khu gu vbweta gilo nya gurenge,
ga muthu nya lidiwo, khu gu vbweta gutsaka,
ga muthu nya makolo, khu gu vbweta
wuwadi,
ga muthu nya wugara, khu thumo nya gukari. U nga va tumbi vathu vava, gambe u nga tumbi wusingalagadzi wawe.
12Guhegula nya satshavbo, olovela gu bhula ni muthu a gu na ni
githawo ga Nungungulu,
u mutigo nari mulandrisi nya milayo,
a gu na ni monyo nya nga wago,
uye nya gu wa gu tshunganiswa
a na hengela nago wuvini.
13Yingisa gululeka ga monyo wago,
kholu, mwalo a tumbegidego nga uwo,
14Kholu, hefemulo wa muthu wu ngu
mu tangadzisa
guvbindra livbandre na dzimbili dzighadhi dzi kheviselago
khu vbatshani.
15Aholu ga silo satshavbo, lomba ga Uye a
Khusegidego Ngudzu,
a gu gimbidzisa khu ndzila nya lisine.
16Nu si gu pheli ni wevbini thumo, gu vbweta
gu pimisa gwadi,
gasi gu mana lisine.
17Monyo khuwo wu rumago
gu vbindrugedza mawonelo;
khavbo gwawe, gu ngu buga matamo mana nya
guhambanelane a gu aya:
18Guti wuwadi ni wuvivbi, guvbanya ni
gufa;
aholu, igyo gi fumago satshavbo sesi gikhati gyatshavbo khu
lidimi.
Guti nya lisine nugo nya malipha.
19Womo muthu nya gugengele a kodzago gu hevbudza vathu nya vangi,
aholu a si dzi kodzi gu dzi phasa abune.
20Womo muthu nya guti a dzi vengisago khu
magana yaye,
a na midwa guhodza silo satshavbo.
21Uye kha ningwa giphaso khu Pfhumu
Nungungulu,
khu kotani nya guhamuge guti gwatshavbo.
22Womo muthu nya guti, guti gwaye
gu thumelago uye mune
wurumba,
handro nya guti gwaye wu fanede
gu tumbega.
23Muthu nya guti a ngu hevbudza vathu va
tigoni gwaye,
ni mihandro nya guti gwaye khya gupindruga.
24Muthu nya guti a na tala khu makategwa,
ni avo va na mu wonago, va na mu zundza.
25Guvbanya nya muthu gu na ni matshigu
ma sayidwego,
aholu matshigu ya Israyeli, ma mwalo tengo.
26Muthu nya guti a na tumbega vbakari ga
vathu vaye,
ni lina laye li na vbanya kala gupindruga.
Gu dzi pimela
27Mwanangu, dzi linge wabune, guvbanyani
gwago,
wa gu wona gukhuwe gilo nya gukari gi na gu resela
gigaradzo, u nga gi dzegi.
28Kholu khandri silo satshavbo si gu sadi ga
vatshavbo,
gambe khandri vatshavbo va tsakiswago
khu silo sa simweso.
29U nga khali muthu nya makolo
vbabuzotunu,
ambari guvbweta satshavbo si guromo
vbamezatunu,
30kholu guhodza ngudzu u vbindrisa, gu ngu vanga madwali,
ni gumba dzi pimela si ngu vbisisa ndrani.
31Vangi va fudego khu gumba dzi pimela;
aholu muthu a gu ni guti, a ngu laphisa
matshigu yaye nya guvbanye.
Currently Selected:
Bheni Siraki 37: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.