Bheni Siraki 36
36
Nombelo nya gulombe guwusedzwa ga Israyeli
1Hi pwele wusiwana, uwe Pfhumu,
Nungungulu nya silo satshavbo, hi wone,
u phalalegisa githawo gyago ga mayigo yatshavbo.
2Khusedza libogo lago u wugela mayigo nya valombo,
gasi va kodze gu wona tshivba yago.
3Kha nga olu U wonegisidego khavbo gwathu guaga gwago mbeli gwawe,#36:3 Nungungulu agide ngudzu (Isa 6:3), a gu wonegisa guaga gwaye khavbo ga va na Israyeli, khu gumba dzumela guvivba, ni gu tsayisa Israyeli khu kotani nya guvivbe (Ezek 20:41). Khu magirelo ya mamowo Nungungulu a gu wonegisa tshivba yaye vbakari nya mayigo khu gu tshisa vbavbatshi ni gu mbembisa mayigo nya Mahedheni ma tshanisago Israyeli.
kharato nugo, yeyedza wugulu wago,
vbatshani gwawe, na hi gu va wona khu maho yathu.
4Gasi va kodze gu dziti, kha nga ethu nethu hi
dzitigo,
gukhethu vbavbandze gwago, uwe Pfhumu,
mwalo mumbe Nungungulu.
5Wusedza sisamadziso sago, gira siliwugiso
nya siphya,
dhumisa mandza ni libogo lago la nyamudye,
6wusa khorodza yago, u guhula likhulo lago;
pfhungumula avo va hi vengago u
mbembisa nala.
7Rodzisa gikhati, u alakanya gisambanyo gyago,
gasi va huwelele sisamadziso sago.
8Uye a tshadego, a na dagarele khu nilo nya
likhulo lago,
va na mbembiswe vale va tshanisago
vathu vago.
9Pfara mihungo ya vathangeli ya valala va
gukhavo:
“Mwalo nya gufanane ni ethu!”
10Tombanisa mahundzu yatshavbo ya Jakobe,#36:10 Gutshanganiswa nya mahundzu yatshavbo nya sanana sa Jakobe a diri giyeyedzo nya guvbanyiswe gu reswago khu Mesiya. Wona: Isa 11:11-13; Jer 31:10; Ezek 37:15-28.
ma phare kha nga thomba yago, kha nga
guhegulani.
11Pfhumu, pwela gisiro, vathu vago,
va ranidwego khu lina lago,
ni Israyeli, u mu giridego matiwula yago.
12Pwela gisiro lidhoropa nya miphaso yago,
Jerusalema, wulanga u khalago avbo.
13Tadza Siyoni khu wuzundzo nya
sisamadziso sago,
ni vathu vago va na tale khu wudhumo wago.
14Gira wufakazi nya guemele vale
va gu sivangwa sago, gukhugela guhegulani.
Tadzisa wuprofeti wu ganedwego khu lina lago.
15Ninga tshatshazelo#36:15 Tshatshazelo gu thudwa guvbanyiswa ga Israyeli khu Mesiya a liredwago khu gukhodwa ni gitumbo gupwani a na rumedwa khu Nungungulu gasi guta tshula vathu vaye wugumbini. avo va gu lirelago khu
gutimisela,
gasi vaprofeti vago va tidwa nari va lisine.
16Pfhumu, yingisa, nombelo wa sithumi sago,
gukhedza khu gikategiso u ningidego Aroni
gasi gu kategisa vathu vago.
17Vathu vatshavbo va mafuni, va na dziti gukhavo
Uwe khuwe Pfhumu,
Nungungulu nya gupindruge ni
gupindruga.
Mahathelo nya nyamayi
18Gisusu gya gu hakha mafumbu yatshavbo
nya guhodze,
aholu, vbakari nya guhodza gogu, gomo nya
gwadi guvbindra gumbe.
19Lidimi khilo li pwago guhambana nya matshambelo nya nyama,
ni monyo wutigo, wu ngu hambanisa magana nya malipha.
20Monyo nya guvivbe, givangelo nya wuvi,
aholu muthu nya guti a na dzi vhikela.
21Nyamayi a ngu dzi kodza gu dzegwa khu
wevbini mwama,
aholu vbakari nya vanyamayi, moyo khwadi guvbindra vambe.
22Wumburi nya nyamayi wa gu tsakisa khovbe,
wu ngu vbindra gunavela gwatshavbo gwa mwama.
23Wuwadi ni gurula sa gu bani siromo sihofuni gwaye,
mwama waye a na bani ari uye a kategidego
ngudzu guvbindra watshavbo.
24Wule a gu na ni nyamayi a na ni thomba
nya guhegule,
a na ni giphaso nya nga lidingo.
25Avbo gu gu mwalo libhiyo, dzithomba gu khala
tshandzala dzi virela gu bidwa,
avbo gu gu mwalo nyamayi, mwama a gu
vbanya gulegalegani na gu dilela.
26Khu mani a tumbago mbafa yi
kodzago ngudzu guba,
yi legalegago khu lidhoropa ni lidhoropa?
27Kharato nugo mwama a hamugago ndranga,
a gu lala avbo a vbohedwago avbo khu wutshigu.
Currently Selected:
Bheni Siraki 36: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.