Bheni Siraki 34
34
Guhandruga nya dzindroro
1Gitumbo gya vathu nya guvivbedwe khu monyo
khya wukanganyisi, kha gi phasi gilo,
dzindroro dzawe dza gu ninga mambapi sipumbu.
2Gufanana ni muthu a zamago gu mola mutsa
ni gulandra liphuvbo,
kharato nugo ga uye a tumbago dzindroro.
3Libona ni dzindroro silo si fananago,
Igyo gi wonegago avbo
khandri gya lisine.
4Gilo muni nya guage gi dzi kodzago gu duga
khu ga muthu nya gunyenyeze?
Lisine muni li dzi kodzago gu duga khu ga
muthu nya malipha?
5Wuloli, gudhumba ni dzindroro, silo si si
phasigo gilo,
gu fanana ni iso si hingigedzedwago khu
nyamayi nya mimba.
6Uwe u nga theli kota khu dzindroro,
vbavbandze basi nya gudzipwe nu gu endredwa khu Uye a Khusegidego Ngudzu.
7Khu kotani nya dzindroro, nya vangi va pengisidwe,
va dzimede khu gu vega gitumbo gyawe dzindroroni.
8Magana nya Nayo ma na landriswa yatshavbo,
guti khugo guvbelela kanani ga muthu nya gutumbege.
Lisima nya malendro
9Wule a giridego malendro, a nguti silo nya singi,
ni wule a hevbudzidwego khu guvbanya a gu ganela khu guti, ave ni mawonelo
nya mangi nya guti.
10Wule a ngamba hevbudzwa khu guvbanya, khati silo nya singi,
aholu uye a giridego malendro, fumide
khu guti mavbanyelo nya mangi.
11Malendroni gwangu nyi wonide silo nya singi,
ni guti gwangu gu ngu vbindra magana
yangu.
12Dzomo dzinyondro nyi manidego dzimhango nya guhadza gufa,
aholu nyi vbulugide khu kotani nya
guhevbudzwe khu guvbanya.
Nungungulu a ngu vbulugisa avo va mu ningago githawo
13Hefemulo wa avo va ningago githawo
Nungungulu wu na mana guvbanya,
kholu gitumbo gyawe va gi vegide ga wule a va
vbanyisago.
14Wule a ningago githawo Nungungulu kha
thavi gilo,
ambari gu khala hwanga, kholu gitumbo
gyaye khu Pfhumu.
15Kategide uye a ningago
githawo Pfhumu!
Khu mani a na mu tumbago, ni gu, khu mani a na gu mu vhikelago?
16Maho ya Pfhumu Nungungulu ma gu
khedza vale va mu golago,
uye khuye muvhikeli nya tshivba,
muphasedzeli nya gutiye, a ningago wulanga nya gusihale lihani,
muvhikeli gikhati nya guvbise ni lithonga.
Musayisi wa gu tshunganela,
muphasedzeli wa gu hadza guthega.
17Uye a ngu khusedza hefemulo, a gu wenengedza maho,
a ngu ninga womi, guvbanya ni gikategiso.
Miphaso nya gutsakise Nungungulu
18Yi nyenyezide mhamba ya wule a ningelago ga Nungungulu
miphaso nya gu yi mane khu
wudambane,
miningelo va ningelago vathu nya wukalaveli ni
wudambane,
kha yi tsakisi Nungungulu.
19Uye a Khusegidego Ngudzu kha salalegiswi
khu siningwa sa vathu nya guvivbedwe khu monyo;
gambe khandri khu gutala nya miphaso a dzi kodzago
gu tsetselela sighoho.
20A gu songa gyanana mbeli ga babe waye,
wule a ningelago miphaso khu silo nya
guphangwe ga sisiwana.
21Guhodza gwa vale nya guhamuge womi nya sisiwana;
wule a gu dusago gighevenga, musongi.
22Uye a wandrelago muthu guhodza nya lithonga laye,
a gu fanana ni uye a songago muthu kwawe;
ni uye a kanganyisago muholo wa githumi,
a gu vbaladza novba.
23Moyo a gu vbaha, mumbe
a gu pfhungumula,
kha va wuyedwi khu migaralo basi, gani?
24Mumbe a gu gira nombelo,
mumbe a wu vala,
Nungungulu a na yingisa lito la mani?
25Muthu a gu dzi handza khu gu bani a
khuhide girumbi,
bwelo khavbo aya gi kuha gambe,
gudzihandza gwaye gu mu phaside ginani?
26Khidzo kharato a girago muthu a halago
khu kotani nya sighoho saye,
a wuya a ghoha gambe.
Khu mani a na gu yingisago nombelo waye?
Si mu phaside ginani gudzithesa gwaye
vbavbatshi?
Currently Selected:
Bheni Siraki 34: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.