Bheni Siraki 32
32
1Va gu vegide gu khala muthangeli?
U nga dzi gugumugisi khu isoso.
Khala vbakari ga vakwanu kha nga moyo nya avo,
uphela khu gu va thumela,
khu hwane nya isoso, khala vbavbatshi.
2Ninga moyo ni moyo egi gi vbwetegago,
khu gulandrela, khala vbavbatshi, gasi u
kodze gutsaka ni vakwanu,
u hakha gihugu nya wufumu khu wululamo nya wadi.
3Uwe lidhota, ganela gukhedza khidzo yi
lombago khidzo tanga yago,
aholu khu gwadi ni lisine,
nyamba degudza ndzimo.
4Va gu bani va yingisa u nga laphisi guganela.
Gambe u nga vbweti gu dzi wonegisa kha nga muthu nya guti,
khu gikhati gi si vbwetegigo.
5Gufanana ni giwindri nya rubi umo nya
gikhweletedzo nya ndralama,
khidzo kharato wutsendze vbakari nya buzo.
6Gufanana ni giwindri nya lisima nya
esmeralidha gi khwetedzidwego khu ndralama;
khidzo kharato nuwo wutsendze, wa gu bangaladzwa khu wadwa nya wadi.
7Uwe lidzaha ganela, sa gu lomba kharato,
va gu gurumedza gu gu wudzisa guvbindra nyondro mbili.
8Guganelani gwago, pwadzisela gwadi kha nga muthu nya
gukodze gu ganela,
ganela silo nya singi khu magana madugwana,
khala kha nga muthu nya guti, a patago
gambe ni gudegula.
9Vbakari nya vathu nya tshivba, u nga
manegi nu tshulegide ngudzu,
ni avbo ma guromo madhota, u nga ganeli ngudzu.
10Guphela khu gulasa gu wonega, gu si gu pandri libara,
kharato nugo, tshivba nya guthangele, gu yi
mana khu gu dzi nogisa.
11Gya gu vboha gikhati khuga, u nga hweli;
indra gaya gwago, u nga gimbili u legalega khu
dzimbe dzindzila.
12Nuri gaya gwago dzi hungatele,
gambe gira ni gevbini u gi golago,
aholu dzi wonele u nga ghohi khu gu ganela
magana nya gunyenyeze.
13Vbatshani nya satshavbo sesi, bonga Muvangi wago,
uye a gu tadzago khu makategwa yaye.
Githawo ga Nungungulu ni gugola Nayo
14Uye a ningago githawo Pfhumu
Nungungulu, a na dzumela guhevbudzwa khuye,
ni avo va mu vbwetago gukhugela gugyani,
va ngu mana sikategiso saye.
15Uye a vbwetago nayo, a na fumiswa khuwo,
aholu uye a wu vbanyago khu gupfhadzedzela,
a na mbembiswa khuwo.
16Avo va ningago githawo Pfhumu Nungungulu,
va na mana gululama,
mithumo yawe nya yadi, yi na ngangamela nga wenengedzo.
17Muthu nya gighohi kha dzumeli gululekwa,
a gu mana silo nya gudzivhikele,
gasi gu phasedzela iso si godwago khuye.
18Muthu nya gugengele gikhati gyatshavbo
a gu vbweta guhevbudzwa,
gasi uye nyambasi wadi ni matshandza, mwalo githawo.
19U nga giri gilo nyambana nayo,
kholu u na dzi laya, u dandza nyala nu vbide.
20U nga beli khu ndzila yi gu ni dzimhango,
kholu u na tshunganiswa khu siwindri.
21U nga tumbi ndzila yi si gu gimbidwigo khu muthu,
22dzi vegedze ambari ga sanana sago.
23Ga satshavbo u girago, dzi tumbe wabune,
kholu khu isoso, gomo gambe gu landrisa sirumo.
24Wule a tumbegago Nayo, a na landrisa sileletelo,
ni uye a tumbago Pfhumu Nungungulu,
gima kha na dugedwa khu mhango.
Currently Selected:
Bheni Siraki 32: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.