Bheni Siraki 31
31
Thomba
1Gupilekelana khu gu vbweta gughanya gu ngu
vbedza mili nya muthu;
sigaradzo gu resago, sa gu vbedza ligovbe.
2Sigaradzo nya guvbanye kha si tangadzisi,
ni madwali nya makhongolo kha ma gu ningi ligovbe.
3Gitetema gya gu thumela gu
wungeledzela dzithomba,
avbo giyago guhefemulani, gya gu londrola
handro nya dzithomba dzaye.
4Gisiwana gya gu thuma gi vbedza tshivba yaye,
gya guya guhefemulani, gya gu hamuga satshavbo.
5 # Wona gambe: Mav 28:20. Wule a golago ndralama, kha na vbuluga
gubela gighohoni,
ni wule a vbwetago wudambane, a na tala
khuwo.
6Nya vangi va mbembide khu gugola ndralama
va thega muwusiwanani.
7Ndralama gikhunguvanyiso
ga avo va dzi garadzago khu gu yi vbweta.
Muthu nyambasi wadi, a nafa khu kotani nya iyo.
8Gi kategide gitetema gi ngamba manwa ni gihoso,
gi ngamba landrisela ndralama.
9Khu mani muthu yoyu, gasi hi kodze gu mu bonga?
Kholu uye khu lisine giride silo nya
gusamadzise vbakari ga vathu vaye.
10Khu mani a lingidwego a simama gu manwa na lulamide?
Esi si na mu gira a mana wuzundzo!
Khu mani oyu nya gu, na gu dzi kodza gu ndraga nayo,
a sa wu ndragago,
ni gu gira guvivba, aholu a sa gu girago?
11Dzithomba dzaye dzi na vegedzwa,
ni tshangano nya vathu wu na huwelela
wuwadi waye.
Mibuzo
12U khade vbamezatunu yi vegedzedwego satshavbo?
U nga tuli likana gasi gu zundza, gambe
u nga ganeli, khuwe:
“Idzo yi tadego khidzo khu mandzandzandza.”
13Dundruga nya gukhuwe makhedzelo nya
lidiwo, gilo nya tshanisa.
Khu gevbini gilo nya guvivbe nya nga
makhedzelo nya lidiwo?
U ngu dzi kodza gu lidziswa khu gilo nyamba phasa gilo.
14Umo uye a khedzago, u nga thawuludzi libogo,
u nga tutumi gumogo naye gasi guya hodza mbiya yamweyo.
15Khu misuwo yago hevbulela guti eyi ya muakelane wago,
satshavbo iso u girago, phela khu gu si alakanyela.
16Iso va gu ningago, si hodze nga muthu nya
guti gu dzi pimela,
gasi u si dzi vangeli livengo khu gu hodza ngudzu.
17Khala uwe nya guphele khuwe gu vbedza guhodza,
giyeyedzo nya gupwani u hevbudzidwe gwadi,
dzi vhikele gumba hodza u vbindrisa pimo,
gasi u si swiri muthu.
18Wa gu bani u manide gikhalo vbakari nya
vathu nya vangi,
u nga pheli khuwe guthawuludza mandza u
bedza mbiyani.
19Ambari nari sidugwana, singi ga muthu a
hevbudzidwego gwadi!
Kharato wa guya dawutunu, u naya lala nu tengide.
20Muthu a hodzago gudzipimela, a gu lala
ligovbe nya gutenge,
a gu wuga dzimindrudzile, a gu dzipwa na
khalegide gwadi.
Gasi uye nyamba mana ligovbe, nyambapwa
gwadi ni guvbisa ndrani, handro wa muthu
nyamba kodza gudzipimela.
21Va gu bani va gu gurumedzide gu hodza ngudzu,
khuga uya gosa; isoso si na gu vbevbugisela.
22Mwanangu nyi yingise, u nga nyi kanyisi.
Guhegisani u nati lisine nya magana yangu;
mithumoni gwago gwatshavbo, khala nu
pangamide,
yi mwalo mhango yi na gu gu dugelelago.
23Vathu nya vangi va na
kategisa wule a ningago guhodza na tshulegide,
va bwelo khavbo va gira wufakazi khu wuwadi waye.
24Lidhoropa latshavbo li na ngurangura, li
vbenyela wule a ningelago guhodza na sa tshulega,
wufakazi nya ligungo laye wu na bani wuri wa lisine.
25Wa gu sela wadwa u nga khali bewudzi,
kholu wadwa wu ngu luzisa nya vangi.
26Gutiya nya dzisimbi, gwa gu lingwa niloni,
kharato niyo myonyo ya vanya dzihanyi
ya gu tugudziswa khu wadwa gikhati va ganedzisanago.
27Wadwa ga vathu
wu ngu fanana ni womi,
wa gu wu sela khu nongameto.
Mavbanyelo muni a gu navo muthu a
hamugago wadwa?
Wadwa wu di girwa gasi gutsakisa vathu.
28Litsako nya monyo ni gunengela nya hefemulo,
khu wadwa wu sedwago khu gikhati gyaye
nidzo gu vbwetegago khidzo.
29Wadwa guvava nya hefemulo ni gu pwisa wuvi,
wa gu sedwa guvbindra pimo.
30Guleva gwa gu engedzela dzihanyi ga
muthu nya guvivbedwe khu monyo aya
gudzimelani gwaye,
wu ngu vbungula tshivba, bwelo khavbo wu thela silondra.
31Vbakari nya gu bani gu hodzwa ni gu sedwa wadwa,
u nga kawuki muthu kwanu ambari gu mu hembulula.
Mulitsakoni gwaye u nga mu poyili ambari
gu ganela magana nya gu mu paye.
Currently Selected:
Bheni Siraki 31: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.