Bheni Siraki 30
30
Gulaya sanana
1Uye a golago gyanana gyaye, a ngu gi tsayisa
gikhati gyatshavbo,
gasi gi kodza guta nengela khiso khu matshigu
ma ngu gutago.
2Uye a layago gyanana gyaye a na khala
na tsakide,
a na zundzega vbakari ga avo a tidwago
khavo.
3Wule a hevbudzago gyanana gyaye, a na
girisa lidiwo nala waye, a na khusega vbakari
nya dzipari dzaye khu kotani gwaye.
4A gufa babe, gu na gira gukhwatshi kha fa gilo,
kholu hwane gwaye, a na tshala uye nya
gufanana naye.
5Na nga gu vbanya, a di tsaka khu gu wona gyanana,
a gufa, kha na nga vbisega.
6Tshide ndrangani gwaye muvhikeli nya
gudwane ni valala vaye,
ni muthu a na gu bweledzelago gubonga ga dzipari dzaye.
7Wule a henago sanana saye, a na si sayisa silondra,
ni yevbini huwa va na gu ketago, yi na
kutsunga mahembe yaye.
8Kavalu ya gumba hevbudzwa, kha yi fuyegi,
ni gyanana gya gu digwa nyamba kawukwa
gya gu khala muthu nyambana githawo.
9Dzumeledzela gyanana gyago ga iso gi si
vbwetago,
gi na gu resela mahungu,
wa gu hagana nagyo, igyo gi na gu pwisa
wuvi.
10U nga hegeleli nagyo, gasi u si mani gu tshaniseka
khu kota nya isoso,
gasi u si hegisi khu gu khukhurusa magwaha.
11U nga mu dandrisi na ngari lidzaha,
u sega maho wa gu wona sihonohono a girago.
Mu guruvedze gu nogisa thamo wudzahani gwaye,
12na ngari gyanana mu pitse hwamboni,
a nga tshuka a banga hungo a khala muthu
nyamba yingisa, a gu pwisa wuvi.
13Laya gyanana gyago, dzi garadze khu gu gi
hevbudza,
gasi gi si gu pwisi wuvi khu mavbanyelo
yaye nya dzitshoni.
Womi
14Gu na ni lisima ngudzu gisiwana gi vbanyago
gwadi giri ni womi ni tshivba,
guvbindra gitetema nya guwondre, nya
gutaledwe khu madwali.
15Womi ni tshivba, si na ni lisima ngudzu
guvbindra ndralama yatshavbo ya tigoni;
givili nya gutshinge, gi na ni lisima ngudzu,
guvbindra thomba nya yingi.
16Yi mwalo thomba yi gu yikhongolo
guvbindra womi nya givili,
ambari nya gyadi nya gikhongolo guvbindra
gutsaka nya monyo.
17I tshukwana gufa, guvbindra guvbanya khu gutshaniseka,
ni guhefemula nya mahegiso, guvbindra
tshanisa nyamba vbela.
18Talo nya guhodze nya gunone gu vegidwego
vbalikanatunu li segidwego,
gu fanana ni miningelo nya guhodze yi
vegidwego vbathowotunu.
19Wa gu phasa ginani ningelo wu
ningedwago ga gifananiso?
Kholu igyo kha gi na wu hodza ambari gupwa
mahema nya gunungele.
Kharato nugo, gu na girega ga wule a gu ni
dzithomba aholu a si dzi kodzi gu dzi thumisa.
20Uye a gu dzi wona khu maho a keta,
gufana ni thenwa a wugarelago mbiri nya likendzi a hefemudzega,
kharato nugo ga uye a vbwetago gu tiyisa
gulamula khu tshivba.
Litsako
21U nga digi hefemulo wago
wu khala mugugaradzegani,
u nga dzi theli wabune hwanga khu gupimisa gwago.
22Guvbanya ga muthu, khu gunengela nya monyo,
ni gutsaka ga muthu gu ngu laphisa matshigu
yaye nya guvbanye.
23Tiyisa hefemulo wago, u tangadzisa monyo wago,
ndreyisa mbeli gwago guvbisega nya monyo,
kholu guvbisega nya monyo gu ngu songa nya vangi,
gambe ugo gu mwalo giphaso.
24Lidiwo ni likhulo, li ngu humbisa matshigu nya guvbanye,
ni guvbisega, gu ngu gumbisa muthu gi
si gu vbohi gikhati.
25Monyo nya wadi, womo mibuzoni gikhati gyatshavbo,
uwo wa gu sayisa guhodza gwaye.
Currently Selected:
Bheni Siraki 30: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.