Bheni Siraki 24
24
LISIMA NYA LIKHONGOLO NYA IGUTI
(24:1—42:14)
Tumbunugo ni lisima nya guti.#24:0 Gipimo 24 khilo litshina ni mongo nya libhuku latshavbo la Bheni-Siraki la gu hi sasamedzela khu gu tshingisela gwadi gihevbudzo gyatshavbo khu mahungu nya Guti. Guti gwa gu bikedwa ga ethu kha nga Lito la Nungungulu a nga vanga khilo silo satshavbo a si vegedzela gwadi malangani gwawe; Lito gambe la gu bikedwa kha nga Gutuledwa ga Israyeli; khugo Guti gu nga dzi gira Lito li ganela khu ga Vaprofeti, li hevbudza kala li gu dzi gira Muthu khu ga Jesu Kristo, a gu Uye Guti gwa Nungungulu. Wona Joh 1:1.14; 1Kor 1:20-24.30.
1Guti gwa gu dzi zundza gwabune,
gu dzi dhumisa vbakari nya vathu vaye.
2Ugo gu na ni lito tshanganoni wa
Oyu a Khusegidego Ngudzu,#24:2 Tshangano wa Uye a Khusegidego Ngundzu: Guthudwa Tshangano watshavbo nya vathu va na Israyeli. Wona Dhet 23:2-4; 1 Kor 28:8.
gu ngu dzi dhumisa vbakari nya mabutho
ya Pfhumu, khugo:
3“Nyi dugide khu kanani gwa
Uye a Khusegidego Ngudzu;
Kha nga lipfhi nyi di fenengedza mafuni.”
4Nyi vbanyide malangani nya
gukhugege ngudzu,
gikhalo gyangu nya wufumu gyomo
vbatshani nya mapfhi nya gutale.
5Eni nyenga nyi dzundrulugede
ndrengelenge watshavbo wa ndzadzini,
nyi bede guetani nya milondrwa.
6Eni nyi di gu fumela vbatshani nya mavimbi ya linene
ni mafuni gwatshavbo,
ni vbatshani nya mafumbu ni mayigo yatshavbo.
7Vbakari ga satshavbo sesi, nyi
di vbweta wulanga nya
guhefemule avbo,
ni thomba nya guyele guya
vbanya avbo.
8Khavbo avbo, muvangi nya silo satshavbo
a di nyi ninga milayo,
wule a nga nyi vangago a dita
tsitsa tshatsha wangu,
a nyi embela, khuye: “Vbanya
tigoni gwa Jakobe,
u dzega Israyeli, a khale thomba yago.”
9Uye a nyi vangide gukhugela
guhegulani na gu si manegi sikhati satshavbo,
gambe nyi na simama khu gupindruga ni gupindruga.
10Nyi thumide mbeli gwaye thumo wangu,
Tshatshani nya Guage,#24:10 Tshatshani nya Gwage: Bheni-Siraki a gu wona wuphaselo wa Nyumbani ya Nungungulu ya Jerusalema kha nga thumo nya Guti gwa Nungungulu kholu wu tiyisidwe khu Nayo. Guti ni Nayo si patanide si gira gilo gimwegyo basi. Guti gwa Nungungulu gu di romo khu gale Tshatshani nya Tshangano nya Guage wa mugiwulani. Wona Eks 25-28.
khu guralo, nyi di vbaha gigomoni gya Siyoni.
11Uye a di nyi hefemudza dhoropani
nya gugolege,
tshivba yangu yomo Jerusalema.
12Nyi navide mikhamba vbakari
nya vathu nya guzundzege,
gipandre gi lumbago Pfhumu
vbakari nya thomba yaye.
13Nyi di khusega gu fanana ni
simbo nya sedhari wa Libhanoni,
nyi fana ni simbo nya ndzire
sigomoni sa Herimoni.
14Nyi dandride kha nga ngindru wa
Engwedhi,#24:14 Engwedhi khidzosaye ni gupwani Jeriko, litigo li khalago vbafuvbi ni Yiphwa nya Gufe, vbakari nya giwula, gu na ni misimbo ni likhabi nya gukhume.
nga misimbo nya senge ya Jeriko,
kha nga olivha nya wumburi panini,
nyi dandride kha nga simbo nya senge.
15Nyi swayide mahema nya gunungele gwadi nya kinamomo,
ni mafura nya gunungele nya
gutsakise,
nyi tola mafura nya gupepemele
nya nga nya mira nya guhathedwe,
nya nga galibhano, onikisi ni mira,
kha nga gunungela nya libani ndrani nya Tshatsha.
16Nyi navide matamo yangu kha nga
terebhitu;
matamo yangu ma na ni wumburi ni wugulu.
17Eni nyi di fanana ni litshina nya wuvha,
nyi bugisa lithungedwa nya
wumburi,
ni senge sangu sa gu dusa mihandro
nya wuzundzo ni wufumu.
18Nyi mayime nya lihaladzo nya
ladi, nya githawo,
nya mapimo ni gu lirela khu
gitumbo.
Nyi ningedwe ga sanana sangu
gukhugela guhegulani,
ga avo va vegisedwego khuye.
Mihandro ni siningwa nya guti
19Deluni gwangu, enu mwatshavbo mu nyi
vbwetago
khurani khu mihandro yangu,
20kholu gu nyi alakanyela
gu ngu tshamba ngudzu guvbindra wulombe,
gu nyi mana gu ngu lombela ngudzu guvbindra gipapu nya wulombe.
21Vale va nyi hodzago, va na simama
gupwa ndzala,
ni vale va nyi selago va na simama gupwa
lidora nya eni.
22Wule a nyi yingisago kha na kanganyisega,
ni avo va vbanyago khu eni, kha va na ghoha.
23Esi satshavbo humbiselelo nya Libhuku nya
Gidzumeledzwano gya Nungungulu a Khusegidego Ngudzu,
khuwo Nayo hi ningidwego khu Mosi,
a gu thomba ga linyangwa la Jakobe.
24Mu nga garali khu gu khala na mu tiyide mbeli ga Pfhumu,
namarelani avbo gwaye gasi uye a kodze
gu mi tiyisa.
Pfhumu nya Tshivba Yatshavbo, khuye basi
a gu Nungungulu,
vbavbandze gwaye, mwalo mumbe muvbanyisi.
25Nayo wa gu goga khu guti gu fanana ni tsongo wa Pisoni,
gu fanana ni tsongo wa Tigre vbanangotunu
nya mihandro nya yiphya.
26Uwo wa gu goga khu mapimo nya wugengeli
gu fanana ni tsongo wa Ewufrate,
gu fanana ni tsongo wa Joridhani vbanangotunu
nya guvbwere.
27Khuwo wu guhulago wugengeli kha nga tsongo
wa Nilo,
Gufanana ni Giyoni vbanangotunu nya guhavele
dziuvha.
28Uye nya guhegule kha muti gwadi,
ambari ni uye nya guhegise nuye,
khu magirelo ya mamowo, kha mu tugula.
29Maalakanyo yawe ma anamide ngudzu
guvbindra yiphwa,
ni gugola gwawe gu etide ngudzu guvbindra nondrwa.
30Eni nya gu fanana ni sele wu dugelago
tsongoni,
kha nga sele wu ndrindrago mati guya theledzela thembweni,
31wu ganela, khuwo: “Nyi na theledzela
dzimbewu dza thembweni gwangu,
nyi khurisa khu mati wulime wangu.”
Wona nya gukhuwe sele wangu nya mati
wu vbindrugedzide wu khala tsongo,
ni tsongo wangu wu vbindrugedzide wu
khala yiphwa.
32Nyi na ngangamedzisa wugengeli
nga Wuronga,
nyi na wu gira wu wenengedza hwindzo
ngudzu.
33Nyi na simama guphalalegisa sihevbudzo
sangu nga giprofeto,
nyi na si tivisa ga mimela yi nga gutago.
34Wonani nya gukhenu kha nya dzi thumela
wurumba wangu basi,
aholu nyi di thumela vatshavbo avo
va vbwetago guti.
Currently Selected:
Bheni Siraki 24: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.