Bheni Siraki 23
23
Nombelo nya gudwane ni gighoho
1Pfhumu Nungungulu, Babe ni mune nya
guvbanye gwangu,
u nga nyi digi nyi fumedwa basi khu gulaya gwa
kanani gwago,
gambe u nga dzumedzisi gukhuwe gu nyi gira nyi
vbela tshivba.
2Khu mani a na tsayisago mipimiso yangu,
khu mani a na kawukago monyo wangu khu sihevbudzo nya guti,
gasi nyi si vbevbugisedwi sihosoni gwangu,
ambari gumba tsetseledwa sighoho saye, na?
3Gasi sihoso sangu si si engedzelani
ni milandru yangu yi si tali;
gasi eni nyi si thegi mbeli
ga vale va nyi wugelago,
nyi gu hegwa khu nala wangu,
kholu uye mwalo gitumbo nya wuhindzi wago.
4Pfhumu, Baba ni Nungungulu nya guvbanye gwangu,
u nga nyi ningi maho nya gudzikhusedze.
5Dusa avbo gwangu gunavela gwatshavbo nya nyama.
6Nyi nga fumedwi khu wudogodogo nya wubhayi ni limidzo,
gambe u nga nyi ningeli ga manavelo
nya gu gu ghohele.
Gu dzi vegedza muguganelani
7Vanavangu yingisani milayo nyi mi
ningago;
uye a na gu nengelago khiyo, kha na
thega mugihosoni.
8Gighohi gi na modwa khu magana yaye,
muvali ni muthu nya gudzikhusedze
va na tshunganiswa khu sihofu sawe.
9U nga oloveli gu sambanya khu likana lago,
gambe u nga oloveli gu rana Lina nya Guage.
10Kholu kha nga khumbi yi ghadhwago
gikhati gyatshavbo,
yi gumba vbuluga dzimboma,
kharato nugo kha na vbuluga gu mana
gighoho, uye khu silo nya nyalidede,
a sambanyago khu lina la
Nungungulu.
11Muthu a sambanyago gikhati gyatshavbo
a na taledwa khu gughoha,
dzimhango kha dzi na duga ndrangani gwaye.
A gu hosisa, gighoho gyaye gi na thegela
hungoni gwaye;
a gu siha, a na ghoha guvili.
A gu sambanya malipha, kha na mana wufakazi,
ndrangani gwaye gu na taledwa khu sitsayiso.
12Momo maganelelo ma yisago
gufani,
gambe kha ma yeli gu pwidwa vbakari
nya livelego la Jakobe;
kholu ma gu yela gu khala hwindzo ni vale
va gu ni githawo ni Nungungulu,
va gumba yela gubela mu wughevengani momo.
13U nga olovedzi gu dusa magana nya gunyenyeze
khu kanani gwago,
kholu gyomo gikhati ma ningago wulanga gighoho.
14Wa gu khadziswa vbakari nya sitetema,
u nga divaledwi khu babe ni mayi wago;
kholu gu nga girega gu u va divala mahoni gwago,
u sengwa khu giolovedzo
nya wulongo wawe, u gira iso nyamba yela,
kala u vboha avbo u dogorelago gukhuwe,
tshukhwana wa sa velegwa,
u vala litshigu u nga velegwa khilo. 15Muthu a olovelago gu yuyutela,
gima kha na kodza gambe gudzi laya
guvbanyani gwaye gwatshavbo.
Gudwana ni gunavela nya gughohe
16Mafumbu mavili nya vathu ma gu andrisa sighoho,
gasi eli nya wuraru, la gu dzi resela gumbembiswa.
17Gutshaniseka nya monyo wu vbisago, gu fanana
nilo wu dzurago,
wu si dzidziligo kala wu gu tshimedwa;
muthu a ghohelago mili waye,
kha na gu mana gurula nilo wu si gu tshimegi;
Ga muthu nya wudogodogo, guhodza gwatshavbo gutshamba,
kha garali kala gufa.
18Mwama a ghohelago mwangadzi waye,
a gu ganela khu monyoni gwaye, khuye:
“Khu mani a nyi wonago?
Nyi randredwe khu gidema, nyi sihwa khu dzindzari,
mwalo a nyi wonago. Nyi na thava mani?
Uye a khusegidego ngudzu kha na alakanya
sighoho sangu.”
19Uyoyo a gu thava maho nya vathu basi,
a hangwa khu gukhuye maho ya Pfhumu
ma gu wenengedza mazanazana guvbindra lidambo,
ma ngu wona dzindzila dzatshavbo nya vathu,
ma gu bela kala malangani nya gusihalege ngudzu.
20Kholu kha nga olu Nungungulu a tigo silo satshavbo
na si gu si vangi,
kharato gambe olu, hwane nya gu bani a si vangide,
a ngu si wona satshavbo.
21Mwama yoyu a na tsayiswa vbakari nya vathu
mitendrelani ya dhoropani,
a na manwa malangani a ngamba ma lirela.
22Kharato nugo, a nafa nyamayi watshavbo a digago
mwama waye,
a mu ninga kha nga muhodzi nya thomba gyanana nya guvelegwe
wubhayini.
23Guhegulani, uye a di yeyisa Nayo wa Uye
a Khusegidego Ngudzu;
nya wuvili, a di ghohela mwama waye;
nya wuraru, a di gira wubhayi,
a velega sanana ni mumbe mwama.
24Nyamayi yoyu a na yiswa tshanganoni nya vathu,
aya giredwa khwepa nya gulamudwe khu kotani
ya sanana saye.
25Sanana saye kha si na thela mikhamba,
ni matamo yawe kha ma na velega mihandro.
26A na tshiya gialakanyiso nya givalo,
wuvivbi waye gima kha wu na futega gambe.
27Vatshavbo vale va nga gu vbanyago,
va na dziti nya gukhavo gimwalo nya gyadi
guvbindra guthava Nungungulu,
ni gukhavo gimwalo gimbe gilo gi tshambago guvbindra
gu landrisa sileletelo saye.
28Wudhumo nya wukhongolo khu gulandrela
Pfhumu.
Wa gu hakhwa khuye u na vbanya matshigu nya
gulaphe.
Currently Selected:
Bheni Siraki 23: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.