Bheni Siraki 21
21
Guthava gighoho
1Mwanangu, u ghohide? U nga ghohi gambe.
Lomba divalelo nya sighoho sago u giridego matshigu hwane.
2Thava gighoho nga idzo u thavago khidzo nyoga,
kholu wa gu yi hidzimelela yi na gu hodza.
Magwaha yaye ma gu fanana ni aya nya nghala
yi songago vathu.
3Gighoho gyatshavbo gya gu fanana
ni litshari nya gulodzwe eno ni eno;
gilondra li dusago khya likhoro nyamba vbola.
4Guthusedzela ni wuwugeli sa gu
pfhungumula dzithomba,
yi na mbembiswa kharato ndranga
ya muthu nya matshandza.
5Nombelo wu dugago khu kanani ga gisiwana,
wa gu khusedzwa kala dzindzeveni ga
Nungungulu,
uye a na dzegela gulamudwa.
6Uye a gumba dzumela gu kawukwa,
a gu landrisela ndzila nya sighohi,
gasi wule a ningago githawo Pfhumu,
a na vbindrugedza khu monyo
waye watshavbo.
7Muthu nya lidimi nyambana githawo,
gu dzegela gu mu tugula na ngari
hwindzo,
aholu muthu nya guti, a ngu siti
sihoso saye.
8Uye a vbahago nyumba yaye
khu tshivba nya wukanganyisi,
a gu fanana ni uye a wungedzelago
siwindri gasi gu furumedzwa khiso
vbagirametunu.
9Tshangano nya sighohi, wa gu fanana
ni litala nya mavivi,
mahegiso gwawe, khu gu thedwa niloni vavbya.
10Ndzila nya sighohi yi londridwe khu siwindri nya guhandzegedwe,
guhegisani ya gu va yisa phalani nya
guete ga Hayidhesi.
Muthu nya guti nuye nya gipumbu
11Uye a vegedzago Nayo, a ngu fumela
mipimiso yaye;
guti khugo mahegiso nya guninge githawo
Nungungulu.
12Wule a gu mwalo gupima, kha na
hevbudzwa,
aholu gomo gupima gu tadego khu wuvi.
13Gupima ga muthu nya guti, gwa gu
vbalagela kha nga mati ma gogago,
ni wusingalagadzi waye wa gu simama kha
nga nambo nya womi.
14Monyo wa muthu nya
gipumbu
wa gu fanana ni kanvu wu gu ni lufa,
kha wu dzi kodzi gu
vegedza guti.
15Muthu nya gululame, a gupwa
magana nya guti,
a gu ma yingisa, bwelo khavbo, a engedzela
gilo nya gukari;
aholu a gu mapwa ma si phasi gilo,
a gu ma dzudzuga a ma pfhurarela.
16Magana ya muthu nya guvivbedwe
khu monyo ma gu fanana ni rwalo wa muendri,
aholu khu kanani ga muthu nya
gululame gu duga magana nya wuhigo.
17Mawonelo ya muthu nya gugengele,
khayo ma vbwetwago umo nya mitshangano;
magana yaye ma gu alakanyedwa ngudzu
monyoni.
18Guti gwa gu wonwa khu muthu nya
guvivbedwe khu monyo,
kha nga nyumba nya
guhagale;
ni wugengeli wa muthu nyambana
mapimo, wa gu bwelela wu khala
magana nyamba phasa gilo.
19Ga muthu nya guvivbedwe khu monyo
sihevbudzo sa gu fanana ni makhetshe migondroni,
mwendro ni dzitshinga mandzani ya nyamudye.
20Muthu nya guvivbedwe khu monyo
a gu hega a gu khusedza lito,
aholu muthu nya guti a gu mwayegela vbavbatshi.
21Ga muthu nya gugengele, sihevbulo
simburiselo nya ndralama,
kha nga gibhandryana bogoni gwaye ga
nyamudye.
22Ngondro wa muthu nya guvivbedwe khu monyo,
wa gu tutumela gubela nyumbani ga muakelane waye
gasi muthu a layidwego a gu bela khu githawo.
23Muthu nya guvivbedwe khu monyo, a guya
ema khu vbamwanyatunu, a khevisela
nyumbani gwatshavbo,
aholu muthu a layidwego gwadi a gu simama
gu ema vbavbandze.
24Gilo gi vivbidego ngudzu gu yingisela khu vbamwanyatunu,
muthu a layidwego a ngupwa dzitshoni gu gira
isoso.
25Magana ya vathu nya guganele ngudzu
ma gu bweledzela guganela magana ya vambe;
aholu magana ya vathu nya guti ma gupimwa
vbagikalotunu.
26Monyo wa vathu nya
sipumbu, womo kanani gwaye,
aholu monyo wa muthu nya guti, khu likana
laye.
27Muthu nyambasi wadi a gu hembulula Sathane,
a gu dzi himbulula abune,
28muthu nya milembo a gu dzi nyenyezisa
abune
a ngu nyenywa vbakari ga vatshavbo.
Currently Selected:
Bheni Siraki 21: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.