Bheni Siraki 13
13
Dzipari nyamba dzadi
1Uye a kuhago nyedzi a na nyenyeza,
ni uye a pwanago ni muthu nya matshandza,
a na khala nuye matshandza nga uye.
2U nga dzi rwegi rwalo nya gulemele ngudzu,
ambari guvbanya ni muthu nya gitetema ni
tshivba gu guvbindra.
Pwanano muni wu na manegago ga khali nya
libumba ni khali nya dzisimbi?
Dza gu ghumana, eyi nya libumba yi na pandrega.
3Gitetema gi na ni lunya, bwelo khavbo gi na
ni dzihanyi;
gisiwana gya gu poyidwa bwelo khavbo gi lomba
divalelo.
4Wa gu bani nu ngari ni tshivba,
uye a na gu londrola khu gu gu thumisa;
a gu wona gukhuye u vbede tshivba,
a gu diga.
5A gu gu wona gukhuye u na ni silo,
a gu vbanya nago,
aholu, a na gu wandrela nyamba gu pwela gisiro.
6A gu dzi kodza, a na gu gukanganyisa;
u mu tumba khu gu wona mahego yaye;
a gu wonga khu magana nya gutsakise, khuye:
“Ginani u gi vbwetago?”
7A na gu sengedzela khu mibuzo yaye,
kala a gu vburumula silo sago satshavbo,
guvili mwendro guraru;
guhegisani a na gu tsoredzela a gu diga,
a kutsunga hungo, a gu hembulula.
8Dzi wonele, u nga dzi digi u sengedzedwa,
gasi u si poyidwi khu kotani nya
guhandruge gwago.
9Wa gu ranwa khu gitetema,
u nga thani, dugela phuvbo,
uye a na simama a wuyedzela gu gu rana khu tshivba.
10U nga khali wa gu thanga mbeli,
gasi va si gu ndreyisi phuvbo,
aholu u nga khaleli hwindzo, gasi
va si gu divali.
11U nga ganeli khu guphikhizana ni gitetema,
ambari gu wongwa khu magana yaye nya
mangi,
kholu khu guganela gwaye nya gutale,
uye a na gu gira u ganela ngudzu
u hegelela, a gu doma, a gu linga.
12Mwalo gisiro muthu a
vegedzago magana yatshavbo monyoni gwaye,
gambe kha na gupwela gisiro gu
gu tshanisa ambari gu gu bedza pasoni.
13Dzi wonele, u tula gwadi
dzindzeve,
kholu wa gu longoloka ni mumbembisi
wago.
14Avbo upwago esi, khendzuga khu
ligovbeni gwago;
guvbanyani gwago gwatshavbo, gola
Nungungulu,
u mu lomba guvbanyiswa gwago.
Gupwela wusiwana ni gumba pwela wusiwana
15Sivangwa satshavbo si vbanyago si ngu
golana,
muthu watshavbo a ngu gola muakelane
waye.
16Sirengo satshavbo sa gu patana ni iso
nya lifumbu likwawe,
ni muthu watshavbo a gu hengela ni uye a
a fananago naye.
17Wuhengeli muni wu na manegago ga
lisolwa ni nvuta?
Kharato nugo ga gighohi ni muthu a
a ningago githawo Nungungulu.
18Wupari muni wu na manegago ga
nyadugwi ni yimbwa?
Mwendro pwanano muni wu na manegago
ga gisiwana ni gitetema?
19Buru nya likhabi, pfimba nya nghala giwulani;
kharato niso sisiwana mahawo nya
sitetema.
20Kha nga olu gudzinogisa a gu manyala
ga muthu nya matshandza,
kharato gambe gisiwana gilo nya gunyenyeze ga
gitetema.
21Gitetema gya guvbela tshivba, gu
phasedzedwa khu dzipari dzaye,
aholu muthu nya nyalidede, a gu thega,
ni dzipari dzaye dza gu mu nyenya.
22Gitetema gya gu ghoha gya gu vhikedwa
khu vathu nya gutale,
gya gu ganela malipha, va gu gi emela.
Aholu muthu nya nyalidede a gu phazama,
va gu mu konisela;
ambari a gu ganela khu mapimo nya guti,
kha va theli kota khuye.
23Gya gu ganela gitetema, vatshavbo va gu
degula,
magana yaye va ma khusedza kala
mapfhini.
Gasi gya gu ganela gisiwana, avo vari, khavo:
“Khuye mani uye?”
A gu tshunganela va gu mu reda a thega.
Mathumiselo nya yadi nya dzithomba
24Thomba khyadi, mandzani ga
muthu nyambana gighoho,
wusiwana gilo nya guvivbe,
kanani ga muthu nya guvivbedwe khu monyo.
25Monyo nya muthu, wu ngu vbindrugedza
ni khovbe yaye,
yi khala nya yadi mwendro yi vivba.
26Giwonegiso nya monyo wu tengidego,
khu khovbe yi yeyedzago litsako;
aholu guganela mavingu
gu lomba gupimisela gwadi.
Currently Selected:
Bheni Siraki 13: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.