Bheni Siraki 12
12
Mithumo nya wuhindzi
1Wa gu gira wuwadi, zama guti
khu mani u mu girelago,
u na bongwa khu mithumo yago nya yadi.
2Girela silo nya sadi muthu a thavago
Nungungulu
u na mana tshatshazelo.
Wa gumba wu mana gwaye,
u na wu mana ga Uye a Khusegidego Ngudzu.
3Gi mwalo gi mu dugelago gwadi
wule a pharisago mithumoni gwaye nya guvivbe,
a si dzumeli gu ninga zomola.
4Ninga ga muthu a thavago Nungungulu,
aholu u nga vhikeli gighohi.
5Girela silo nya sadi muthu nya gurule,
u nga ningi gilo ga muthu nya guvivbedwe
khu monyo;
bomba, u nga mu ningi guhodza,
gasi a si vbindrugedzi a mana
tshivba nya yikhongolo gu gu vbindra;
kholu u na mana guvivba nya guvbindrise
khu satshavbo nya sadi u na gu mu
girelago.
6Uye a Khusegidego Ngudzu a ngu
nyenya sighohi,
ni avo nya guvivbedwe khu monyo a ngu va
ninga tsayiso.
7Ninga muthu nya wadi,
aholu u nga phasedzeli gighohi.
Dziwonele ga valala
8Pari u nga yi mani khu gu si mana,
ni nala kha sihalegi
vbakari nya sigaradzo.
9Gikhati muthu a nengelago,
valala vaye va gu swihala;
aholu mu sigaradzoni gwaye, ambari
pari yaye kha yi manegi vbafuvbi.
10U nga tumbi nala wago,
kholu mithumo yaye nya guvivbe,
ya gu fanana ni pfhurelo wu hodzago sugu.
11Ambari a gu dzi nogisa vbavbatshi,
a gira gukhwatshi a gu dzi ningela,
mu khedze gwadi, u dzi wonela gwaye.
Dzi gire kha nga musayisi nya mabona
u na tugula gukhuwe kha
vbedzi gikhati nya gingi na nga tiyide.
12U nga mu hidzimisi vbafuvbi gwago,
a nga gu thesa vbavbatshi a
dzega gikhalo gyago.
U nga mu khadzisi khu nyamudye gwago,
a nga wandra wulanga wago,
u nga dandza nu vbide,
khu hwane nya gikhati, u keta khu gu
bani wa sa landrisa gululeka gwangu.
13Khu mani a na pwelago gisiro
muthu nya dzimbangulo,
a gu hodzwa khu nyoga,
ni avo va hidzimelago vbafuvbi nya sirengo
nya wurena?
14Khidzo kharato ga muthu a vbanyago gumogo
ni sighohi,
a dzi diga a bela musighohoni gwawe.
15Nala a na khala nago gikhati gidugwanana basi,
aholu wa gu khuyuswa, kha
na nga gu ninga libogo a gu phasedza.
16Khanani ga nala gu lombela,
aholu monyoni gwaye a gu demba milaphwi,
afela gu gu thesa phalani.
Nala a na ni marongo mahoni,
aholu a gu mana gikhati nya gyadi, gima
kha na kodwa khu novba
17Wa gu dugedwa khu mhango, uye a na
bani ari vbafuvbi gasi gu gu pfhadza
gukhwatshi a guta gu lamulela,
gasi a gu vbweta guta gu tshunganisa.
18A na kutsunga hungo a khwakhwata mandza,
a ngurangura ngudzu,
a vbindrugedza khovbe.
Currently Selected:
Bheni Siraki 12: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.