Bheni Siraki 11
11
U nga tumbi wuzundzo wa vbavbandze basi
1Muthu nya gurule a ngu khusedzwa
khu guti gwaye,
a khala vbakari nya vathu nya guthavisege.
2U nga zundzi muthu khu giyemo gyaye nya
wumburi,
ambari gu nyenya muthu khu kotani nya
giyemo gyaye.
3Nyosi ya gu dinganiswa ni sinyoni si vbuvbago,
yi dugwana,
aholu handro waye, khuwo nya guhegule khu
gulombela.
4U nga dzi zundzi khu dzingandzu
u ambalago,
ambari gu dzi khusedza litshigu u
zundzwago,
kholu mithumo ya Pfhumu yi ngu samadzisa,
aholu sihalo avbo nya vathu.
5Manganagana nya mangi ma khade vbavbatshi,
muthu nyamba tidwa a di ambala
gihugu
nya wufumu.
6Sitetema nya singi si poyidwe ngudzu,
ni vathu nya guthavisege va ningedwe mandzani
ga vambe vathu.
Gu dzi vegisa umo nya guganele
7U nga lamuli muthu nu si gu embedwi nandru
waye,
phela khu gu pimisa, khu hwane
u kawuka.
8U nga hakhi gilo nyamba phela khu gu yingisa;
u nga segi likana muthu na nga guganela.
9U nga dzi bedzedzeli ga silo si si gu lumbigo,
ambari guya khala vbakari nya mayunga nya
sighohi.
Gululama mithumoni
10Mwanangu, u nga dzi bedzedzeli
mithumoni nya gutale,
kholu wa gu tadzela mithumo,
gima khu na vbuluga gu mana gihoso.
Wa gu tadza mithumo ya yingi,
khu na nga yi kodza gu yi enedza,
ambari u dzi garadza khu gu thuma,
khu na dzi kodza guvbuluga, u na hegisa khu
gu thava.
11Womo a thumago, a vbiredza,
ni uye a khalago hwanga, a tshala hwane.
12Womo uye a gu gisiwana ni muhamugi
khu gumbana waye,
a hamugago satshavbo,
a ghanyidego khu wusiwana basi;
aholu Pfhumu a gu mu wona khu maho nya
wuhindzi,
a mu dusa muwusiwanani gwaye,
13a mu khusedza.
Nya vangi va mu wona va
mu samala.
Wusiwana ni wufumu.
14Wuwadi ni tshanisa, guvbanya
ni gufa,
wusiwana ni gu ghanya, satshavbo sesi sa
guta khu ga Pfhumu Nungungulu.
15Guti, mapimo ni wugengeli nya guti Nayo,
sa guta khu ga Pfhumu Nungungulu;
khavbo Gwaye, gu buga lihaladzo ni mithumo
nya yadi.
16Gihoso ni gidema si vangidwe
khu sighohi,
avo va tsakelago silo nya guvivbe,
va na gumba muguvivbani.
17Giningwa gya Nungungulu gya gu simama
ga vale va mu ningago githawo,
wuwadi waye wu na simama kala gupindruga.
18Womo a ghanyago khu tshivba nya
mithumo ni ligungo,
khuwo tshatshazelo wu mu lumbago, 19aholu, a gu ganela, khuye:
“Olu nya guvbweta gu hefemula, nyi hodza
nyenga silo sangu,”
kha pimi gikhati u na si digago afa,
si tshala si hodzwa khu vambe.
20Tsarama u tiya gu landrisa fanelo yago,
dzi phasele avbo gwaye, u gumba
mithumoni gwaye;
21u nga dogoreli mithumo nya gighohi,
aholu vega gutumba gwago ga Pfhumu
Nungungulu,
u tiya thumoni gwago,
kholu mahoni ga Pfhumu kha gu garadzi
gu ghanyisa gisiwana khu githugedza.
22Pfhumu Nungungulu, a gu tshatshazela
khu makategwa vale va mu ningago githawo,
Uye khu gikhati gidugwana, a ngu dzi kodza
gu tadzisa makategwa yaye.
23U nga ganeli, khuwe:
“Ginani nyi gi vbwetago, eni?
Dzithomba muni nyi na dzi lirelago
ga matshigu ma nga gutago?”
24U nga ganeli, khuwe: “Nyi naso nya gu
nyi enelele,
olu mhango muni nyi yelago gu yi thava?”
25Litshiguni nya gutsake, u ngu divala
gukhuwe gomo gutshaniseka;
gasi litshigu nya wuvi, mwalo a alakanyago
gukhuye, gomo gutsaka.
26Kholu, litshiguni nya gufe,
Nungungulu kha hweli gutshatshazela muthu,
gukhedza khu mithumo yaye.
27Wuvi nya gikhati gegi, wu ngu gira
muthu a divaledwa khu gutshamba a gu vbanyidego
matshigu hwane,
gufani nya muthu khavbo yi tugudwago
mithumo yaye.
28U nga zundzi muthu nasi gufi,
kholu muthu a gu tidwa khu mahegiso nya guvbanye gwaye.
Gu dziwonela guhakhani nya vapfhumba
29U nga hakhi muthu nyamba muti gaya gwago,
kholu milaphwi nya mano nya vathu, yingi ngudzu.
30Kha nga ginyoni gi segedwego mugikayelani,
kharato nuwo monyo wa muthu
nya matshandza;
kha nga musoli, uwo wa gu holelela gumbemba
gwago;
31wa gu vbindrugedza esi nya sadi khu guvivba,
wu gu riyela milaphwi,
wu thedzela dzinoda umo nya silo si agidego.
32Tshahe mweyo, yi ngu dzi kodza gu rotha luvbya
nya likhongolo;
kharato nuye muthu nya guvivbedwe khu monyo,
a gu demba milaphwi gasi gu vbaladza novba.
33Dzi wonele ga muthu nyambasi wadi a lugago
guvivba,
gasi u si fenengedzwi khu dzitshoni nyamba vbela.
34Wa gu hakha muthu nyamba muthu,
kha na hwela gu vbindrugedza guvbanya gwago,
a gu hambanisa ni valongo vago.
Currently Selected:
Bheni Siraki 11: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.