Bheni Siraki 10
10
Gu gimbidzisa vafumeli
1Mulamuli nya guti a gu laya
vathu vaye,
ni mufumo wa muthu nya ndruda
wu na tiya.
2Muthangeli nya vathu, gu wonega
khu ga vathu va thumago naye;
ni mwamangulu nya lidhoropa,
gu wonega khu ga vavbanyi va dhoropani.
3Mufumeli nyambana mapimo a na
khala mumbembisi wa vathu vaye,
ni lidhoropa la gu vbahwa khu tshivba nya
wugengeli wa vathangeli vaye.
4Mufumo wa tigoni womo mandzani gwa
Pfhumu Nungungulu,
Uye a na wusa khu gikhati gi yelago
oyu a fanelago.
5Gudugelela ga muthu gomo mandzani gwa
Pfhumu Nungungulu,
khuye a ningago wuzundzo ga oyu
a hungago milayo.
Matshandza
6Divala wa guvadwa khu
muakelane wago,
u nga tshuki u gira gilo khu dzihanyi.
7Matshandza ma nyenyezide mbeli ga Pfhumu ni
ga vathu,
vatshavbo va ngu nyenya wukalaveli.
8Mufumo wu ngu duswa ga litigo wu ya ga
limbe litigo,
khu kotani nya wudambane, dzihanyi ni
dzithomba,
kholu mwalo a vivbidego
guvbindra mugundreli,
a dzi kodzago ambari gu rengisa
ni hefemulo waye wurumba.
9Khu ginani a dzi girago matshandza
muthu nya mafu ni nguma,
a tadego khu guhina mahembeni
na ngu gu vbanya?
10Ngumbe nya gumba hawuluga
ya gu tseketsela nyanga,
kharato nugo, uye a gu pfhumu muhuno,
mindru a nafa.
11Muthu a gufa, thomba yaye khu sirengo
nya gukhwirire khu lididi, sirengo nya gusonge ni
siwungu.
12Guphela nya matshandza nya muthu,
khu guhambana ni Pfhumu Nungungulu,
ni gu ndreyisa monyo waye hwindzo ni
Muvangi;
13kholu litshina nya matshandza khu gighoho,
ni wule a gu nagyo, a gu swaya ndrwadza.
Khidzo kharato Pfhumu Nungungulu a mu
vetidego khu ngumbe nya guthise,
a mu mbembisela muphelo.
14Pfhumu Nungungulu a ngu khungumulela
sikhalo nya wufumu nya sitetema,
wulangani gwawe a khadzisa vanyagusolega.
15Pfhumu Nungungulu a ngu sigula mikhamba
nya mayigo
wulangani gwawe, a yala va nya gudzinogisa
16Pfhumu Nungungulu pfhungumude litigo
la va nya mayigo,
a va mbembisa kala ni giseketeloni gwawe.
17A di ma sigula a bwelo khavbo a ma mbembisa,
a ma fuvisa ma si dundrugwi gambe mafuni.
18Matshandza kha ma vangedwa gu girwa khu vathu,
ambari ni likhulo ga avo va velegwago
khu nyamayi.
Githawo ga Nungungulu khuwo wuzundzo nya lisine
19Khu levbini lifumbu li zundzegago?
Khu Lifumbu nya vathu.
Khu levbini lifumbu nya guzundzege?
Khu avo va ningago githawo Pfhumu
Nungungulu.
20Khu levbini lifumbu li nyenyezidego?
Khu Lifumbu nya vathu.
Khu levbini lifumbu nya gunyenyeze?
Khu avo va ndragago Nayo.
21Githawo ga Pfhumu Nungungulu,
givangelo nya guye hakhwa gwadi,
gasi guyeyisa ni matshandza, givangelo
nya gudigwe khu Nungungulu.
22Gani gitetema nya guthavisege, gani
gisiwana,
wuzundzo wawe khu
githawo ga Pfhumu Nungungulu.
23Khandri gwadi gunyenya gisiwana nya
mapimo,
gambe kha gu yeli gu khusedzwa
gighohi.
24Khongolo nya muthu, mulamuli ni gitetema,
va ngu ningwa wuzundzo,
aholu mwalo a gu khongolo guvbindra
uye a thavago Pfhumu Nungungulu.
Wuzundzo wa gisiwana ni gitetema
25Vathu va tshulegidego, va na dzi ningela
va fumedwa khu githumi nya guti,
gasi muthu a si pimago, kha garadzegi khiso.
26Wa gu bani u gira thumo wago,
u nga dzi zundzi khu guti,
ambari gu dzi khusedza gikhatini nya wuvi.
27I tshukhwana ngudzu uye a thumago
a mana talo nya dzithomba,
guvbindra uye nya gughwire, nari mwalo
guhodza.
28Mwanangu, u ngu dzi kodza gu dzi khusedza
khu mavbanyelo nya yadi,
u nga vbweti wuzundzo nya guvbindre uwo wu
gu yelago.
29Khu mani a na lamulago uye a dzi ghohelago
abune?
Khu mani a na gu zundzago wule a dzi poyilago
abune?
30Gisiwana gya gu zundzwa khu guti gwaye,
gasi gitetema gya gu zundzwa khu dzithomba
dzaye.
31Wule a zundzwago mu wusiwanani,
thomba yaye yi na bani na yiri yingi ngudzu,
gasi uye a gumba zundzwa mu dzithombani,
a na khala ngudzu gisiwana nya mahegiso.
Currently Selected:
Bheni Siraki 10: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.