Dzindzimo 96
96
Nungungulu mufumeli nya litigo latshavbo
(1 Dzikoronika 16:23-33)
1Embani ga Pfhumu Nungungulu ndzimo nya yiphya;
embani ga Pfhumu Nungungulu, enu vathu vatshavbo va tigoni;
2embani ga Pfhumu Nungungulu, mu dhumisa lina laye;
tivisani guvbanyisa gwaye matshigu yatshavbo.
3Pwadzani wuzundzo waye vbakari nya mayigo,
ni mithumo yaye nya guliwugise ga vathu vatshavbo.
4Kholu Pfhumu Nungungulu khongolo fanede gu dhumiswa,
fanede gu ningwa githawo guvbindra vanungungulu vatshavbo.
5Kholu vanungungulu vatshavbo va nya mayigo,
khandri vanungungulu sifananiso basi,
aholu, Pfhumu Nungungulu, giride ndzadzini.
6Wudhumo ni wugulu somo mbeli gwawe,
tshivba ni wumburi, somo nyumbani nya guage.
7Dhumisani Pfhumu Nungungulu enu mafumbu nya vathu,
dhumisani Pfhumu Nungungulu khu tshivba ni wuzundzo waye.
8Khusedzani Pfhumu Nungungulu khu wuzundzo nya lina laye,
resani miphaso mu bela siluveloni gwaye.
9 # Wona gambe: Dzind 29:1-2. Khozelani Pfhumu Nungungulu na mu ambade guaga,
ndrendremelani mbeli gwaye enu vathu va tigoni.
10Ganelani vbakari nya mayigo, khenu: “Pfhumu Nungungulu a ngu fuma.”
A ngu tiyisa litigo, ilo kha li khuyugi,
a ngu lamula mayigo khu gululama.
11Gu na tsake ndzadzini, mafuni gu nengela,
Gu na dzume linene ni satshavbo si guromo ga ilo.
12Mikova yi na nengele ni satshavbo si guromo umo,
yi na kulungele misimbo yatshavbo ya khabini,
13mbeli ga Pfhumu Nungungulu atago,
kholu a nguta, ata lamula litigo;
a na lamula litigo ni vathu khu gululama,
gukhedza khu gutumbega gwaye.
Currently Selected:
Dzindzimo 96: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
