Dzindzimo 89
89
Pwanano wa Nungungulu ni Dhavhidhe
(1 Dzipfhumu 4:31)
Ndzimo nya sileletelo sa Etani, wa Ezira
1Oh Pfhumu Nungungulu, nyi na embelela lihaladzo lago kala gupindruga;
gikhati gyatshavbo nyi na tivisa gutumbega gwago ga mimelana yatshavbo.
2Nyi di huwelela kheni lihaladzo lago
li ngu simama kala gupindruga;
gutumbega gwago gu mwalo mahegiso kha nga ndzadzini.
3Uwe u di khuwe: Nyi giride gidzumeledzwano ni gihathwa gyangu,
nyi sambanya ga Dhavhidhe, githumi gyangu, kheni:
4 # Wona gambe: 2 Sam 7:12-16; 1 Dzik 17:11-14; Dzind 132:11; Mith 2:30. “Nyi na tiyisa melego wago kala gupindruga
nyi na pharisa ndronga nya wufumu situgulwana sago.”
5 Pfhumu Nungungulu, sivangwa satshavbo sa ndzadzini
si na dhumise sisamadziso sago,
si embelela gutumbega gwago tshanganoni nya sihathwa.
6Kholu khu mani a guromo ndzadzini
nya gufanane ni Pfhumu Nungungulu?
Vbakari nya sivangwa sa ndzadzini,
khu mani a fananago ni Pfhumu Nungungulu?
7Khu lisine Nungungulu a ngu thavisega
tshanganoni nya sihathwa;
a ngu thavisega guvbindra sivangwa satshavbo si mu randredego.
8 Pfhumu Nungungulu nya Tshivba Yatshavbo,
khu mani a gu ni tshivba kha nga uwe Pfhumu Nungungulu?
Tshivba ni gu tumbega gwago si gu randrede.
9 # Wona gambe: Job 9:8. Khuwe u fumelago tshivba nya linene;
u rudzisa tshivba nya mavimbi ma gu gugumuga.
10U gandredzede Rahabhi, #89:10 Girengo nya guthise Rahabhi; a diri girengo nya tshivba gi nga bani gi gira pfilupfilu ni wuvivbi. nyoga nya yikhongolo ya linene u yi songa,
khu gyandza gyago nya tshivba u phalalegiside valala vago. #89:10 Muembeleli a gu thumisa gifananiso nya wuthokozeli nya gupale ga Nungungulu girengo gyogyo nya guthise, gasi gu yeyedza gukhuye uye Nungungulu a gu ni tshivba yatshavbo. Wona gambe: Job 9:13.
11Ndzadzi ni mafu sa gu lumba uwe,
u giride litigo ni satshavbo si guromo umo.
12Uwe u giride Wuronga ni Marandzi;
sigomo sa Tabhori ni Herimoni si ngu womba
mikulungwane si dhumisa lina lago.
13U na ni libogo li tiyidego
mandza yago ma na ni tshivba,
wa gu khusedza libogo lago la nyamudye wa gu pala.
14Wufumu wago wu tiyisidwe khu gululama ni lisine,
lihaladzo ni gutumbega somo mbeli gwago.
15Va kategide vathu va gu khozelago khu lisine gu wombela mikulungwane,
va vbanyago mbeli ga Pfhumu Nungungulu,
gungangamelani nya khovbe yaye.
16Matshigu yatshavbo va gu nengela khu kotani yago,
va nengela khu gululama gwago,
17kholu uwe khuwe wuzundzo nya tshivba yaye,
khu wuhindzi wago u ngu khusedza tshivba yathu.
18Kholu gitshangu nya gu hi vhikele
gyomo mandzani ga Pfhumu Nungungulu,
ni mufumeli wathu a gu lumba oyu a Agidego wa Israyeli!
19Gale u ganede khu ndroro ga sithumi sago nya gukatege, khuwe:
Nyi ningide tshivba ndrena mweyo,
nyi fumiside lidzaha nyi nga li hathago vbakari nya vathu vangu.
20 # Wona gambe: 1 Sam 13:14; Mith 13:22; 1 Sam 16:12. Nyi mane githumi gyangu Dhavhidhe;
nyi mu todzide hungoni khu mafura yangu nya gukatege.
21Nyi na vega gwaye tshivba yangu,
nyi na mu tiyisa khu libogo langu.
22Valala vaye gima kha va na mu wugela,
ni va nya guvivba gima kha va na mu pala.
23Nyi na tshigira valala vaye na gu va wona,
nyi songa vatshavbo va mu vengago.
24Nyi na tiyisa gwaye gutumbega ni lihaladzo langu;
khu lina langu nyi na dandrisa mufumo waye.
25Nyi na andrisa wufumu waye kala vbatshani nya yiphwa,
ni libogo laye la nyamudye kala vbatshani nya mitsongo.
26Uye a na nyi embela, khuye: “Uwe u babe wangu,
u Nungungulu wangu, u muvhikeli ni muvbanyisi wangu.”
27 # Wona gambe: Gutu 1:5. Eni nyi na mu phara kha nga gyanana gyangu nya matiwula,
nyi mu khusedza vbatshani ga vafumeli nya litigo.
28Lihaladzo langu li na simama gwaye,
ni gidzumeledzwano gyangu naye gi na tiya kala gupindruga.
29Lihundzu lawe li na simama kala gupindruga,
mufumo waye wu tiya kha nga ndzadzini.
30Aholu, sanana sago sa gumba landra milayo yangu,
sa gu diga gu landrisa sileletelo sangu,
31sa gu yeyisa milayo yangu,
si si giri gugola gwangu,
32nyi na tsayisa guyeyisa ni guvivba gwawe khu lipitso;
33ambari ulo nyi na sayisa lihaladzo langu ga Dhavhidhe,
gutumbega gwangu gu na simama gwawe.
34Kha nyi na funya pwanano wangu,
mwendro gu vbindrugedza mahungu nyi ganedego khu kanani gwangu.
35Nyi sambanyide gwawe khu guaga gwangu,
kheni gima kha nyi na liphela Dhavhidhe.
36Situgulwana saye si na vbanya kala gupindruga,
gikhalo nya wufumu waye gi na simama mbeli gwangu
kha nga lidambo,
37gi na tiya kha nga ngima kala gupindruga,
a gu fakazi nya gutumbege vbatshani damboni!
38Aholu uwe u digide gihathwa gyago,
u gi nyenya u gi reda phuvbo!
39U fanyide pwanano u hungidego ni githumi gyago;
u nyenyeziside gihugu gyaye u gi rinya vbavbatshi.
40U thesede mabhiyo yawe yatshavbo,
ni makhokhola yawe u ma giride marumbi!
41Vatshavbo vavbindri nya ndzila va gu bela va phanga iso va sinago;
khade givalo ga vaakelane vaye.
42U khusedzide libogo la nyamudye la valala vaye,
u nengedzisa valala vaye vatshavbo.
43U lambiside matshari yaye,
u mu diga a padwa nyimbitunu.
44U tshipiside wudhumo waye,
u thesa vbavbatshi gikhalo gyaye nya wufumu.
45U mu vbungulede myaga yaye nya guvbanye,
u wuya u mu thela dzitshoni.
46Uwe Pfhumu Nungungulu,
ina u na hi sihalela kala gupindruga, gani?
Likhulo li khondra gikhati gyatshavbo kha nga nilo, gani?
47Dundruga gukhuwe womi wangu wu rode,
muthu u mu wumbidego kha vbanyi matshigu nya gulaphe.
48Ina khu mani a na gu vbanyago, nyamba fa?
Mwalo muthu a dzi kodzago guya tshula hefemulo waye tshivbani nya gufe.
49Pfhumu, lomo hayini lihaladzo lago nya guphele,
eli u sambanyidego ga Dhavhidhe khu gutumbega gwago.
50Pfhumu, alakanya gukhuwe eni githumi gyago
nyi ngu vadwa ngudzu,
nyi ngu rwala khanani gwangu givalo nya mayigo nya mangi.
51Uwe Pfhumu Nungungulu,
valala vago va ngu vala mufumeli wago,
u mu todzidego mafura yago nya guage,
ni evbini a hongolago va gu mu vala.
52A na rungudzwe Pfhumu Nungungulu kala gupindruga!
Amen ni Amen.
Currently Selected:
Dzindzimo 89: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
