Dzindzimo 80
80
Nombelo nya gulombe guvbahedzwa Israyeli
Ga muthangeli nya tsawa nya vaembeleli. Khu maembelo nya ndzimo nya “senge,” gialakanyiso gya Asafi
1 # Wona gambe: Eks 25:22. Uwe muhavisi wa Israyeli, tula ndzeve, u yingisa,
uwe u gimbidzisago va na Josefa kha nga tshambi wago;
uwe u khadego vbagiluvelotunu, vbatshani nya dzikerubhimi,
nonedza guwonegela gwago.
2Yeyedza wugulu wago ga lihundzu la Efrayimi,
la Bhejami ni la Manasi, delu u ta hi vbanyisa.
3 Uwe Nungungulu, hi wusedze;
ngangamedzisa khovbe yago, hi na vbanya.
4Uwe Pfhumu Nungungulu nya Tshivba Yatshavbo,
kala lini u na gorogelago nombelo wa vathu vago?
5U hi thelede wusa nya marongo hi hodza,
u hi ninga khokho nya gutale khu marongo hi sela.
6U hi giride dzikhumbi, vaakelane vathu va ngu dwanisana khu kotani ya ethu,
ni valala vathu va ngu hi hega.
7 Uwe Nungungulu nya Tshivba Yatshavbo hi wusedze;
ngangamedzisa khovbe yago, hi na vbanya.
8U wuyiside litshina nya wuvha khu tigoni ga Egipito,
u tutumisa va nya mayigo u li yala tigoni gwawe.
9U dongisede wulime gasi gu li yala umo,
mikhamba yaye yi tsitside vbavbatshi nya mafu,
li navide li enedza litigo latshavbo.
10Li fenengedzide sigomo khu mutsa waye,
matamo yaye ma vbindride gulapha nya sedhari wa Nungungulu.
11Matamo yaye ma di nava kala phwani,
ni mathungedwa ma di vboha kala tsongoni nya wukhongolo.
12Khu ginani u nga khungumula libhiyo laye?
Olu, vavbindri nya ndzila va gu bela va hava dziuvha.
13Khumbakhabi ya gu li gandredzela khu migondro yaye,
si hava umo sirengo satshavbo nya likhabi.
14Uwe Nungungulu nya Tshivba Yatshavbo,
hi ngu gu lomba wuya nyaluphye,
khedzisa khu ndzadzini, u wona, u vhikela uvha yoyu;
15Sayisa litshina leli u nga li yala khu mandza yago ya nyamudye,
gibuga gegi u nga gi dandrisa.
16Valala vathu va li kokide va li vbisa.
Wona vathu vava, u va mbembisa khu likhulo lago.
17Vhikela muthu wago u mu hathidego khu libogo lago la nyamudye,
mwamana wa muthu u nga mu dandrisago.
18Olu kha hi na hambana gambe nago;
sayisa guvbanya gwathu, ethu hi na dhumisa lina lago.
19 Uwe Pfhumu Nungungulu nya Tshivba Yatshavbo,
hi wuyise nyaluphye,
ngangamedzisa khovbe yago, hi na vbanya.
Currently Selected:
Dzindzimo 80: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
