Dzindzimo 79
79
Va na Israyeli va ngu lomba guphaswa khu Nungungulu
Ndzimo ya Asafi
1 # Wona gambe: 2 Dzipf 25:8-10; 2 Dzik 36:17-19; Jer 52:12-14. Uwe Nungungulu, tigoni gwago gu bede va nya mayigo
va nyenyezisa nyumba yago nya guage,
lidhoropa la Jerusalema va li giride marumbi.
2Va digide sirumbi sa vathu vago
si hodzwa khu sinyoni sa damboni
ni sirumbi sa sihathwa sago si hodzwa khu sirengo sa khabini.
3Novba wa vathu vago va wu vbaladzide kha nga mati
malangani gwatshavbo ga Jerusalema,
mwalo a nga tshalago gasi gu va dzinga.
4Hi khade gihegiso ga vaakelane vathu,
vale va nga hi randrela va hi hega ni gu hi tsorodzela.
5 Pfhumu Nungungulu, likhulo lago li na simama kala lini?
Ina likhulo lago li na simama li khondra kha nga nilo, gani?
6Wugela mayigo ma si khodwigo gwago,
ni mifumo yi si khozeligo lina lago.
7Kholu khavo va nga saselago vathu va Jakobe
va fuvisa dzindranga dzawe.
8U nga hi tsayisi khu kotani nya sighoho sa vababe vathu;
vbiredza u ta hi pwela wusiwana
kholu hi vbede tshivba.
9Hi phase Nungungulu muvbanyisi wathu,
khu wudhumo nya lina lago,
hi tshudzise u hi tsetselela siwono sathu,
khu lihaladzo nya lina lago.
10Kholu mayigo ma na wudzisa, khayo:
Womo hayi Nungungulu wawe?
Yeyedza vathu vovo hi wona
gu phodzela nya novba
wa vathu vago va nga wu vbaladza.
11Yi na vbohe iyo gwago huwa nya sibotshwa;
va vbanye khu tshivba nya wugulu wago
vale va konedwego gufa.
12Pfhumu, tsayisa vaakelane vathu
khu guwuyelela guvbindra livbandre na guvili,
khu kotani nya sighoho va gu giredego.
13Gasi ethu hi gu vathu vago, dzinvuta nya tshambi wago
ethu ni livelego lathu hi na gu dhumisa,
hi embelela hi gu bonga kala gupindruga.
Currently Selected:
Dzindzimo 79: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
