Dzindzimo 76
76
Nungungulu mukhozisi
Ga muthangeli nya tsawa nya vaembeleli khu sitendre. Ndzimo ya Asafi
1Nungungulu a ngu tidwa gwadi tigoni ga Judha;
lina laye li zundzegide tigoni ga Israyeli.
2Nyumba yaye nya miphaso yomo Jerusalema,
uye a gu khala gigomoni gya Siyoni.
3Khavbo vbale uye a nga fanyeledzela sighalala nya wulaho,
siholoma, sitshangu ni matshari.
4Uwe Nungungulu, u zundzegide ngudzu,
wudhumo wago wukhongolo guvbindra sigomo nya silo nya guphangwe.
5Dzindrena dzawe dzi wandredwe matshari;
va nya tshivba kha va dzi kodza gu gira gilo.
Olu va lade ligovbe nya mahegiso,
yi mwalo ndrena ni mweyo yi nga tshalago,
gasi gu thumisa matshari yawe.
6Avbo u nga va thusa, uwe Nungungulu wa Jakobe,
u di emisa dzikareta ni dzikavalu dzawe.
7Uwe wa gu goroga u ngu thisa,
khu mani a tiyago gu ema mbeli gwago?
8Khu ndzadzini yoyo u tiviside gulamula gwago,
litigo li di tsekatseka, li degula,
9gikhati Nungungulu a khugidego gasi gu lamula
ni gu vbanyisa vatshavbo vale va tshaniswago tigoni.
10Ambari likhulo nya muthu li na gu rungudza;
ni mitshaledwa yi nga vbulugago yi na gu girela buzo.
11Ningani Pfhumu Nungungulu wanu esi mu mu tumbisidego,
mayigo yatshavbo ya vbafuvbi,
ma na rese miningelo yawe
vata yi bikela ga Nungungulu
a yelago gu ningwa githawo.
12Uye a ngu thesa vbavbatshi tshivba ya sanana sa vafumeli;
sa gu dzi gugumugisa;
a ngu thela hwanga vafumeli nya litigo.
Currently Selected:
Dzindzimo 76: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
