Dzindzimo 74
74
Nombelo nya gulombe gutshulega nya vathu
Ndzimo nya sileletelo sa Asafi
1 # Wona gambe: Dzind 10:1. Uwe Nungungulu, khu ginani u hi digelago muphelo?
Khu ginani u wuselago likhulo dzinvuta nya tshambi wago?
2Dundruga vathu vago, avo u va hathidego khu gale,
u va tshudzisidego gasi va khala
lihundzu nya thomba yago;
alakanya gigomo gya Siyoni, u khalago avbo.
3Delu u ta wona marumbi yaya nyamba hegisa,
valala va khungumulede satshavbo
si nga bani siri nyumbani gwago nya miphaso.
4Valala va di ghiya, va embelela, va tsaka
nyumbani gwago nya miphaso.
Va di ghwimba umo dzingavbya dzawe,
va yeyedza gupala.
5Va gu gira kha nga vakoki nya dzikhuni
va khusedzago sibhewula sawe,
gasi gu koka misimbo khabini.
6Va di khungumulela khu sibhewula ni sighomba,
sombo satshavbo nya guvatwe.
7Va rothide nilo nyumbani gwago nya miphaso;
va gu nyenyezisa, va thesa vbavbatshi nyumba nya lina lago.
8Khu myonyoni gwawe va di ganela, khavo:
“Hongoleni hi va fuvise khu gumogo basi.”
Va di vbisa malanga yatshavbo
nya gukhozele umo Nungungulu tigoni gwathu.
9Olu kha hi woni gambe siliwugiso;
gu mwalo gambe vaprofeti,
kha hi dziti gukhethu kala lini.
10Ama Nungungulu, valala vathu va na hi poyila kala lini?
Ina avo va na simama gu vala lina lago gikhati gyatshavbo, gani?
11Khu ginani u dusago gyandza gyago gya nyamudye?
Khu ginani u khumbaranago mawogo?
12Uwe Nungungulu, Mufumeli wangu
gukhugela matshigu ya gale;
khuye a hi vbanyisago omu tigoni.
13 # Wona gambe: Job 9:8; Dzind 89:9; 93:3; 104:6; 148:7; Eks 14:21. Uwe u kabaniside yiphwa khu tshivba yago,
u pfarela mihungo nya sirengo nya sikhongolo sa linene.
14U vbadzulede mihungo ya mwamilambo (Levhiyatane),
u ningela givili gyaye gi hodzwa
khu sirengo sa giwulani.#74:14 Girengo nya gikhongolo gi nga bani gi yeyedza tshivba nya guthele pfilupfilu ni wuvivbi (Job 3:8; Dzind 104:26).
15Uwe u tude sifefe ni mitsongo,
u bangisa mitsongo nya yikhongolo.
16Wutshigu ni mihani sa gu lumba uwe,
u vegedzela malangani yawe:
Lidambo, ngima ni dzinyeledzi.
17U vegide mivbingano nya litigo,
u gu gira maronga ni girame.
18 Pfhumu Nungungulu, dziti gukhuwe
valala vago va ngu gu vala,
vathu nya sipumbu va ngu ganela guvivba khu lina lago.
19U nga ningeli ga givaga hefemulo nya lituva lago,
ambari gu divala muphelo mihefemulo ya vathu vago va tshanisekago.
20Alakanya pwanano u giridego,
kholu womo wughevenga malangani gwatshavbo
nya gidema tigoni.
21U nga digi oyu a saniswago a khala dzitshoni,
mutshaniseki ni muhamugi, va na dhumise lina lago.
22Wuga, uwe Nungungulu, u dwanela fanelo yago,
dundruga idzo gipumbu gi gu valago khidzo gikhati gyatshavbo!
23U nga divali dzihuwa dza valala vago,
ni ligwaha va li girago matshigu yatshavbo
avo va gu wugelago.
Currently Selected:
Dzindzimo 74: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
