Dzindzimo 73
73
LIBHUKU NYA WURARU
(Dzindzimo 73—89)
Tshatshazelo nya esi nya sadi nesi nya guvivbe.
Ndzimo ya Asafi
1Khu lisine, Nungungulu khwadi ga vathu va Israyeli,
ga vale va agidego myonyo.
2Gasi eni, migondro yangu yi di hadza gu kwiriga;
vbadugwana nyi di vbweta gu ndreya nyi thega.
3Kholu eni nyi di gu girela lidiwo va nya gu dzi khusedza,
khu gu wona gukheni silo sawe sa gu duga gwadi.
4Va nya guvivba va mwalo sigaradzo
va gu ena va vbanya gwadi.
5Guvbanyani gwawe va mwalo sigaradzo,
Kha va saniseki kha nga vambe vathu.
6Va gu ambala matshandza kha nga karara,
va fenengela dzihanyi kha nga libhadzi.
7Maho yawe ma simbide khu mafura;
myonyoni gwawe gu tade khu maalakanyo nya guvivbe.
8Va gu gola gu poyila ni gu ganelela sihonohono;
va gu dzi gugumugisa va gira gikungo nya gutshanise.
9Va gu khusedza magana va vala Nungungulu wa ndzadzini,
lidimi lawe la gu nava li vala va mafuni gwatshavbo.
10Khu guralo, vathu vawe va gu va zundza
va va yingisa gwadi va si woni gwawe guvivba.
11 # Wona gambe: Dzind 10:11; Sof 1:12. Va ganela, khavo: “Nungungulu kha na nga siti!”
Ina uye a Khusegidego ngudzu a na si wona, gani?
12Khidzo kharato ga nya guvivba;
va khadzisegide,
va gu wungedzela dzithomba.
13Khu guralo, kha ga phasa gilo gu agisa monyo wangu,
gu vbweta guvbanya gwadi
ni gu dzi agisa nyi si giri gighoho.
14Kholu nya gu simama gutshaniseka gikhati gyatshavbo
gugya ni gugya nya gu tsayiswa.
15Nari pwani nyi di landrisela maganelelo yawe,
na nyi khulugiside vathu vago.
16Nyi zamide gu vbweta gu pima silo sesi,
aholu si di nyi garadzela ngudzu;
17kala nyiya bela wulangani nya guage wa Nungungulu
khavbo nyi ngaya pima mahegiselo ya va nya guvivba.
18Khu lisine u va vegide wulangani nya gukwirige
u va rindrividzela gumbembani.
19Va na thedwa hwanga va mbembiswa khu githugedza,
va vbiyedwa va fuviswa.
20Kha nga ndroro a lorago muthu a gu wuga a yi divalago,
uwe nuwe Pfhumu wa gu wuga va divale ni giyemo gyawe.
21Avbo monyo wangu wu nga vbisega
wu khunguvanyega hefemulo wangu,
22nyi di khala gipumbu nyambati gilo,
kholu nyi di vbindrugedzide nyi khala girengo nyambana mapimo.
23Ambari khu guralo, eni nyi womo gumogo nago
u nyi pharide khu libogo langu la nyamudye.
24Khuwe u nyi gimbidzisago khu nayo wago
Khu guhegisa u na nyi hakha gambe khu wuzundzo.
25Khu mani mumbe nyi gu naye eni ndzadzini, vbavbandze gwago?
Mafuni momu, nya gu gola gu khala nago basi.
26Ambari mili ni hefemulo wangu sa gu vbela tshivba,
Nungungulu likhokhola nya monyo wangu
khuye thomba yangu nyamba vbela.
27Avo va dzi pambulago gwago, va nafa;
uwe u ngu fuvisa vatshavbo avo va si khodwigo gwago.
28Gasi eni nya gu gola gu khala vbafuvbi ni Nungungulu;
uwe Pfhumu Nungungulu khuwe wuthavelo wangu,
nyi na huwelela sigiro sago satshavbo.
Currently Selected:
Dzindzimo 73: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
