Dzindzimo 72
72
Nombelo nya gulombelele mufumeli
Ndzimo ya Solomoni
1Nungungulu, hevbudza mufumeli nya litigo malamulelo yago,
ninga gululama gwago gyanana gya mufumeli.
2Gasi a lamula vathu vago khu lisine,
ni gu sayisa sisiwana sago khu gululama.
3Sigomo si na rese gurula ga vathu,
sigomwana niso si na gu resa khu gululama.
4Mufumeli a na lamule sisiwana khu gululama,
a phasa sisiwana a gandredzela vatshanisi.
5Uye a na vbanye matshigu nya gulaphe
kha nga lidambo ni ngima,
a wona situgulwana ni situgulwana.
6Mufumeli a na khale nga ndzadzi yi wago wulimeni,
a fanana ni ndzadzi yi thelago thomwa mafuni.
7Gu na manege gululama matshiguni nya gufume gwaye,
gurula gu na manege kala ngima wu si wonegi.
8 # Wona gambe: Zak 9:10. Mufumo waye wu na khugele linene kala linene,
gukhugela tsongoni wa Ewufrate,
kala mahegiso nya litigo.
9Va na noge mbeli gwaye vathu va khalago giwulani,
valala vaye va na dzi these mafuni migondroni gwaye.
10Vafumeli va Tarisisi ni va sidwani
va na rese miningelo nya gu mu luve;
vafumeli va Sabha ni va Sebha, va na mu resele miningelo.
11Vafumeli vatshavbo va na khidzime mbeli gwaye;
mayigo yatshavbo ma na mu thumele.
12Kholu uye a ngu bavbula marongo ya gisiwana gi lilago
ni khulungu yi gu mwalo waye.
13Uye a ngu pwela gisiro wule a vbedego tshivba,
a vbanyisa womi wa sisiwana.
14A ngu tshula wugumbini avo va tshaniswago ni gu ghevengwa,
kholu novba wawe wu na ni lisima gwaye.
15A na vbanye mufumeli, a na hakhe ndralama ya Sabha;
va na mu girele milombelo khavbo gu si vbeligo,
matshigu yatshavbo a kategiswa khu Nungungulu.
16Tigoni gu na fumwe dzimbewu,
dzi fenengedza kala vbatshani nya sigomo,
si tala khu dzimbewu kha nga esi sa Libhanoni,
avo va vbanyago madhoropani va na rumbuge
kha nga mwasi wu fenengedzago thembweni.
17Lina la mufumeli li na simame kala gupindruga
ndruma yaye yi na pwale, yi na simame vbavbatshi nya lidambo;
khavbo gwaye va na kategiswe vathu vatshavbo,
mayigo ma na mu rane oyu a kategidego.
18A na bongwe Pfhumu Nungungulu,
Nungungulu wa Israyeli,
kholu khuye basi a girago sisamadziso.
19Lina laye nya wudhumo,
li na simame kala gupindruga,
wudhumo waye wu na tadze litigo latshavbo!
Amen! Amen!
20Avba khu mahegiso nya milombelo ya Dhavhidhe mwamana wa Jese.
Currently Selected:
Dzindzimo 72: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
