Dzindzimo 71
71
Nombelo wa lidhota nya gukari
1Nyi ngu thavela avbo gwago, Pfhumu Nungungulu;
u nga nyi digi nyi thedwa dzitshoni.
2Nyi phase u nyi tshula kholu uwe u wadi!
Nyi yingise u nyi vbanyisa.
3Khala uwe giwindri nya wuthavelo wangu
u gi dongisedego gasi nyi sayisega ga igyo;
u rumede gukhuwe nyi vbanyiswa,
kholu khuwe giwindri nya likhokhola langu.
4Nungungulu wangu, nyi vbulugise
mandzani ga va nya guvivba,
mandzani ga va nya guvivba ni vatshanisi.
5Kholu uwe Pfhumu Nungungulu,
khuwe gitumbo gyangu,
nyi tumbide uwe gukhugela wananani wangu.
6Khuwe u nyi dusidego khu ndrani ga mayi wangu,
khuwe u nyi phasedzelago gukhugela guvelegwani gwangu,
eni nyi na gu dhumisa gikhati gyatshavbo.
7Nyi gihegiso ga vathu nya vangi,
aholu uwe khuwe wuthavelo wangu.
8Nyi na gu dhumisa wutshigu ni mihani
nyi embelela wudhumo wago.
9U nga nyi nyenyi olu nyi gumbidego;
u nga nyi dzudzugi olu nyi vbeledwego khu tshivba.
10Kholu valala vangu va gu ganela guvivba khu eni;
vale va vbwetago gu nyi songa va gu tshangana va luga gikungo,
11va ganela, khavo: “Nungungulu a mu digide;”
mu lundreni hi mu mola,
kholu mwalo nya gu mu vhikele.
12Nungungulu, u nga khali hwindzo ni eni,
Nungungulu wangu, vbiredza u ta nyi phasa.
13Va na thedwe dzitshoni va padwa avo va nyi wugelago
avo a gu valala nya hefemulo wangu;
va na poyidwe va thedwa dzitshoni
vale va golago gu nyi wona na nyi gutshaniseka.
14Aholu, eni nyi na vega gwago gutumba gwangu,
nyi na simama gu gu dhumisa gikhati gyatshavbo.
15Wutshigu ni mihani khu guvbanyisa gwago
nyi huwelela mithumo yago nya gululame
ambari nyi gumba wuti tengo waye.
16Nyi na wonegisa mithumo ya
tshivba yago Pfhumu Nungungulu;
nyi huwelela gukheni uwe basi khuwe u gu wadi
17U nyi hevbudzide uwe Nungungulu,
gukhugela wananani wangu;
kala na muhuno nyi ngu tivisa siliwugiso sago.
18Ambari olu nyi gumbidego na nyiri ni dzinvi,
u nga nyi digi Nungungulu wangu;
kala nyi huwelela tshivba yago ga melego yoyu,
ni ga oyu wu nga gutago.
19Gululama gwago, Nungungulu,
gu ngu khusega kala ndzadzini.
Uwe Nungungulu U giride silo nya sikhongolo ngudzu,
khu mani nya gufanane ni uwe?
20Uwe u nyi vbindriside khu vbakari nya sigaradzo
ni mabango nya gutale,
u na nyi vbanyisa nyaluphye,
u nyi dusa vbakari nya lufu.
21U na engedzela wugulu wangu,
u bwelo khavbo u nyi tangadzisa nyaluphye.
22Gasi eni nyi na gu dhumisa khu gitendre,
nyi embelela gululama gwago uwe Nungungulu wangu;
nyi embelela dzindzimo khu gitendre,
uwe u Agidego wa Israyeli.
23Nyi na womba mikulungwane,
nyi embelela khu dzindzimo Hefemulo wangu wu na ghiya kholu u wu dzegisidego.
24Wutshigu ni mihani nyi na ganela khu wuwadi wago;
kholu avo va nga vbweta gu nyi songa,
va poyidwe ni gu thedwa dzitshoni.
Currently Selected:
Dzindzimo 71: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
