Dzindzimo 69
69
Gugaradzega ga Mesiya.
Ga muthangeli nya tsawa nya vaembeleli khu ndzimo yi gu, khiyo: “Senge.” Ndzimo ya Dhavhidhe
1Uwe Nungungulu nyi vbulugise,
kholu nyi ngu vbweta gu langaladzwa khu mati.
2Nyi ngu dzama phalani nya maraga,
gu mwalo ni wulanga nya gugandre;
nyi rinyidwe nandwani nya mati nya guete,
mati ma ngu nyi langaladza nyi ngu ndrindrwa khu mwedzi.
3Nyi garade khu gu lila,
ngolo wangu wu bangide;
maho yangu ma vbede tshivba
khu gu khevisela Nungungulu wangu.
4 # Wona gambe: Dzind 35:19; Joh 15:25. Avo va nyi vengelago, nyambana nandru,
vangi ngudzu guvbindra ndzudzu wa hungoni gwangu;
vambembisi vangu va na ni tshivba ngudzu,
vale va dzi girago valala vangu nyambana fanelo;
va gu nyi singedza malipha, va nyi gurumedza gu bweledza iso nyi ngamba ba.
5Uwe Nungungulu u ngu wuti gwadi wupumbu wangu,
ni sihoso sangu kha si gu sihaleli.
6Avo va tumbago uwe va nga khali dzitshoni khu kotani gwangu,
uwe Pfhumu Nungungulu nya Tshivba Yatshavbo;
ambari vale va gu vbwetago, va nga tandregi khu mahungu yangu,
uwe Nungungulu wa Israyeli.
7Khu kotani nya lihaladzo nyi gu nalo khu uwe,
nyi ngu vadwa, khovbe yangu yi fenengedzwa khu dzitshoni.
8Nyi khade nombo ga vandriyangu
nyamba tidwa khu sanana sa mayi wangu.
9 # Wona gambe: Joh 2:17; Rom 15:3. Khu lihaladzo nyi gu nalo khu nyumba yago,
ndrani gwangu gu ngu vbya khu nilo, avo va gu valago va gu vala eni.
10Kholu ambari nyi lila ni gu hala,
isoso si ngu nyi wusela gihegiso.
11Ambari nyi ambala saku
nyi khade gyombo nya gihegiso gwawe.
12Va gu ganela khu enu dzinyangwani nya lidhoropa,
vamaleveni va gu nyi hega, va nyi poyila.
13Gasi eni, Pfhumu Nungungulu, nya guta gwago khu nombelo;
nyi hakhe uwe Nungungulu khu wuhigo wago nya wukhongolo;
nyi vbulugise kha nga u nyi tumbisidego,
14nyi vbulugise maragani,
gasi nyi si dzami;
nyi vbulugise ga avo va nyi vengago,
u nyi nula guetani nya mati.
15Nyi nga ndrindrwi khu mati nya nondrwa,
u nga nyi digi nyi midzwa khu liphala nya guete,
u nga dzumeli gukhuwe likana nya nambo li segega vbatshani gwangu.
16Uwe Pfhumu Nungungulu, nyi hakhe,
kholu lihaladzo lago khyadi ngudzu;
nyi wone khu wuwadi wago nya wungi.
17U nga siheli khovbe yago eni githumi gyago, kholu nyi vbede tshivba;
nyi hakhe khu guvbiredza.
18Hidzimela vbafuvbi gwangu u nyi vbulugisa
mandzani ga valala vangu.
19Uwe u ngu dziti gukhuwe nyi ngu vadwa,
u nguti gambe ni dzitshoni nyi thedwago;
valala vangu vatshavbo u ngu vati.
20Va nyi vade kala ni monyo wangu wu vbisa,
nyi vbela tshivba;
nyi vbwetide nya gu nyi pwele wusiwana,
aholu kha nya mu mana;
kha nya mana ni moyo nya gu nyi tangadzise.
21 # Wona gambe: Mat 27:48; Mark 15:35; Luk 23:26; Joh 19:28-29. Va nyi thelede guhodza nya guthedwe wuhungu nya gusonge,
na nyi gupwa lidora va nyi ninga ginageri.
22Guhodza gwawe gu na vbindrugedze gu khala naphwi avbo gwawe,
gu songa gumogo ni livelego lawe.
23 # Wona gambe: Rom 11:9-10. Ma na pfhupele maho yawe, gasi ma si woni;
mihwambo yawe yi na ndrendremele gikhati gyatshavbo.
24Va na fenengedzwe khu likhulo lago,
va na vbohedwe khu likhulo lago nya guvbise.
25 # Wona gambe: Mit 1:20. Lizumboni gwawe gu na khale giwula,
gambe gu nga manegi ni moyo nya guvbanye mitshatshani gwawe.
26Kholu va gu tshanisa muthu u mu bayisidego,
va engedzela wuvi wa oyu
u mu tsayisidego.
27Va engedzele milandru yawe,
u nga va dzumedzisi va mana gu tsetseledwa.
28 # Wona gambe: Eks 32:32; Gutu 3:5; 13:8; 17:8. Va fute libhukuni gwago nya womi
u nga va pati tengoni ga va nya gululama.
29Gasi eni nyi vbisegago ni gutshaniseka,
nyi wuse u nyi vbanyisa, uwe
Nungungulu u gu wuthavelo wangu.
30Nyi na embelela nyi dhumisa lina la Nungungulu khu dzindzimo,
nyi mu khusedza khu ndzimo nya gubonge.
31Khiso esi si na gu tsakisago Pfhumu Nungungulu,
guvbindra dzimhamba nya dzikuzi ni simombyana si gu ni dzikheho ni samba.
32Avo va sanisekago va na si wone va nengela khiso;
gasi enu mu vbwetago Nungungulu, myonyo yanu yi na tsake
33kholu Pfhumu Nungungulu a ngu yingisa dzikhulungu
kha divali vale va tshaniswago mapasoni.
34Enu ndzadzini ni mafuni, dhumisani Nungungulu,
yiphwa ni satshavbo si vbanyago umo.
35Kholu, Nungungulu a na vbanyisa Siyoni,
a vbahedza madhoropa ya Judha,
va na khala umo va bwelo khavbo va ma fuma.
36Ni livelego la sithumi saye, li na khala thomba yawe,
kholu, avo va mu golago va na vbaha umomo.
Currently Selected:
Dzindzimo 69: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
