Dzindzimo 68
68
Nungungulu a ngu pala valala vaye
Ga muthangeli nya tsawa nya vaembeleli. Gizimba gya Dhavhidhe. Ndzimo
1Nungungulu a gu khuga; va gu phalalega valala vaye;
avo va mu nyenyago, va gu thava va tutuma mbeli gwaye.
2Uwe wa gu va phalalegisa kha nga wutshi;
wu mwalalegago ndrengelengeni.
Va nya guvivba va gu mbemba mbeli gwago
va nyiviliga kha nga mafura vbanilotunu.
3Aholu va nya gululama va ngu nengela ngudzu,
va ngu hana mbeli ga Nungungulu khu gutsaka.
4Embani ga Nungungulu,
mu dhumisa lina laye khu dzindzimo;
tulelani ndzila oyu a khiledego vbatshani nya mapfhi.
Lina laye khu Pfhumu Nungungulu,
nengelani mahoni gwaye.
5Nungungulu a vbanyago nyumbani gwaye nya guage,
khuye babe nya dzikhulungu
ni muvhikeli nya dzinoni.
6Nungungulu a ngu ninga wulanga sisiwana,
a tshula ava va hungeledwego, a va ninga wurendra;
aholu avo va mu wugelago va na vbanya giwulani.
7Uwe Nungungulu, litshigu u dugidego ni vathu vago,
u tsemakanya navo giwula,
8litigo li di kutsungwa; ndzadzini gu di tulega
guwa ndzadzi mbeli gwago,
Gigomo gya Sinayi gi di ndrendremela mbeli gwago,
uwe Nungungulu wa Israyeli.#68:8 Va na Israyeli gu dugani gwawe khu Egipito na va gu hongola tigoni ga Khanani Nungungulu a di dzi wonegisa gwawe ndzilani gigomoni gya Sinayi. Wona gambe: Eks 19:16-25.
9Uwe Nungungulu, u wiside ndzadzi nya yingi;
u wusedza litigo lago li nga bani li vbede tshivba.
10Vathu vago va vbahide tigoni momo dzindranga dzawe;
uwe Nungungulu khu wuhindzi wago,
u ningide sisiwana esi si vbwetegago.
11Pfhumu a ningede lito,
vanyamayi nya vangi va di huwelela, khavo:
12“Vafumeli ni mabutho yawe, ndrivale,
va ngu tutuma va gu thava!”
Gaya, vanyamayi va di ya kabanelana silo
nya guphangwe ga valala.
13Sifananiso nya matuva ni mambapi nya parata,
ni mitenga yakone nya gukhedzige nga ndralama.
Khu ginani vambe va varamago phandroni nya dzinvuta
litshigu nya gudwane nyimbi?
14Gikhati Nungungulu nya Tshivba Yatshavbo,
a padego vafumeli, a va phalalegisa
gu di thega hunguva gigomoni gya Salimoni.
15Gigomo gya Nungungulu khu Bhasani,
gigomo nya gulaphe ni sigomwana nya gutale gigomo gya Bhasani.
16Enu sigomo nya gulaphe ngudzu,
khu ginani mu girela lidiwo
gigomo Nungungulu a gi hathidego
gasi gu vbanyela umo?
Pfhumu Nungungulu a na vbanya umo kala gupindruga.
17Nungungulu khugide khu gigomoni gya Sinayi,
nari ni mazanazana nya dzikareta nya nyimbi,
aya bela makhuvini nya Nyumba yaye nya guage.
18 # Wona gambe: Efes 4:8. Uwe u gwede gigomoni nya gulaphe,
u dzegide sibotshwa nya singi;
u hakhide miningelo ga vathu,
ni ava va gu wugelago navo va reside miningelo yawe,
Pfhumu Nungungulu a na vbanya vbakari gwawe.
19A na rungudzwe Pfhumu, muvbanyisi wathu,
a dzegago mirwalo yathu litshigu ni litshigu.
20Nungungulu wathu, Nungungulu a vbanyisago;
Pfhumu Nungungulu a ngu hi tshula wugumbini nya lufu.
21Nungungulu a na pfara mihungo ya valala vaye,
mihungo ya vale va simamago gu ghoha.
22Pfhumu ganede, khuye: “Nyi na bweledza valala vanu
khu tigoni ga Bhasani,
nyi na va bweledza, guetani nya linene.
23Mu na hamba migondro yanu novbani wa valala vanu,
dzimbwa dzanu dzi na dandzela novba wawe.”
24Uwe Nungungulu, vatshavbo va ngu wona magimbilelo yago, magimbilelo ya Nungungulu, Mufumeli wangu
na gubela nyumbani gwaye nya guage.
25Vaembeleli nya dzindzimo va thangide mbeli,
khu hwane va landrela vawombi nya sitendre,
khu vbakari si fode sagadzyana nya makendzi,
na si gu womba mitandrandra.
26Enu mwatshavbo rungudzani Nungungulu,
Tshangano watshavbo wa Israyeli rungudzani Pfhumu Nungungulu.
27Mbeli gu thangide Bhejami, nyumba nya yidugwane ga Israyeli,
gu landrela dzindruna dza Judha ni gikwata gyawe,
khu hwane guta dzindruna dza Zebhuloni ni dza Nafitali.
28Yeyedza tshivba yago Nungungulu,
tshivba yile u yi thumisago gu hi phasedzela khiyo.
29Gukhugela Nyumbani gwago ya Jerusalema,
iyo va tago vafumeli vata gu luva khu miningelo.
30Kawuka Egipito a fumago mayigo,
a khalago kha nga girengo gya khabini
kala vatshavbo vata khoza gwago va gu luva;
khu mitshambi nya dzimombe, simombyana na si lemedwe khu parata.
Phalalegisa mayigo ma golago gu wusa dzinyimbi.
31Khu Egipito dzi nata dzindruna;
Vaetiyopi va na khozela Nungungulu na va khusedzide mandza.
32Enu mifumo ya tigoni, embani dzindzimo ga Nungungulu,
zundzani Pfhumu khu dzindzimo.
33Uye a guromo khu gale vbatshani ndzadzini;
yingisani, uye a ngu pwadza lito laye, a gu lito nya tshivba.
34Tivisani vathu gukhenu Nungungulu a na ni tshivba;
wugulu waye wu ngu fenengedza Israyeli,
a gu fuma nari khu vbatshani ndzadzini.
35Uwe Nungungulu u ngu samadzisa nu khade nyumbani gwago nya guage;
Nungungulu wa Israyeli, a ngu ninga
tshivba ni wufumu vathu vaye.
A na rungudzwe Nungungulu!
Currently Selected:
Dzindzimo 68: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
