Dzindzimo 62
62
Nungungulu khuye basi a gu muvbanyisi
Ga muthangeli nya tsawa nya vaembeleli. Khu maembelo ya Jedhutumi. Ndzimo ya Dhavhidhe
1Hefemulo wangu wa gu mana gurula ga Nungungulu basi;
guvbanyiswa gwangu gwa guta khiyo gwaye.
2Khuye basi a nyi vbanyisago ni gu nyi vhikela,
kha nyi na padwa kholu khuye wuthavelo wangu.
3Gasi enu mwatshavbo mu na kala lini na mu gu wugela muthu,
gasi mu fela gu mu khungumula,
a fanana ni ndzari yi khuyugago
mwendro libhiyo li vbwetago gu thega, na?
4Va gu dwanela gu nyi tshisa vbavbatshi,
va nengela khu gu nyi kanganyisa,
va gu rungudza khu magana basi,
aholu va vala khu myonyoni gwawe.
5Hefemulo wangu wa gu khevisela Nungungulu basi,
kholu gutumba gwangu gwa guta khavbo gwaye.
6Khuye basi a nyi vbanyisago ni gu nyi vhikela,
kha nyi na padwa kholu khuye wuthavelo wangu.
7Guvbanyiswa ni wudhumo wangu womo ga Nungungulu;
khuye muvhikeli wangu nya tshivba,
wulanga nyi thavelago avbo.
8Enu vathu tumbani Nungungulu gikhati gyatshavbo;
mu embeledzeleni mabala ya monyoni gwangu,
kholu, uye khuye wuthavelo wathu.
9Vathu vatshavbo, sisiwana ni sitetema;
va gu fanana ni furugedzo;
va gu pimwa mugikaloni,
va gu manega vasiri gilo,
va gu vbevbuga guvbindra furugedzo.
10Mu nga tumbini tshivba,
mu nga dzi gugumugisi khu gu gira guvivba;
mwa gu fuma dzithomba nya gutale,
mu nga vegini avbo myonyo yanu.
11Nungungulu a di ganela gumogo basi,
eni nyi mupwa guvili, khuye: “Tshivba ya gu lumba uye,”
12 # Wona gambe: Job 34:11; Jer 17:10; Mat 16:27; Rom 2:6; Gutu 2:23. Lihaladzo la gu lumba Pfhumu
kholu a gu bweledzela ga muthu ni muthu
gukhedza khu mithumo yaye.
Currently Selected:
Dzindzimo 62: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
