Dzindzimo 59
59
Nombelo nya gulombe gu tshudziswa
(1 Samuweli 19:11)
Ga muthangeli nya tsawa nya vaembeleli. Khu maembelo nya ndzimo yi gu, khiyo: “U nga pfhungumuli.” Ndzimo ya Dhavhidhe gikhati Sawule a nga ruma vathu gu ya randrela nyumba yaye gasi va mu songa
1Uwe Nungungulu wangu, nyi vbulugise
ga valala vangu;
nyi vbanyise ga ava va nyi tshanisago.
2Nyi emele ga ava va girago esi nya guvivbe,
nyi vbulugise ga sighevenga.
3Nungungulu wangu, wona avo va nyi dembelago mazinga,
va wugela hefemulo wangu;
va nya dzitshivba va gu nyi wugela,
nya sa ghoha gilo.
4Ambari nyi ngamba ghoha gilo,
avo va gu nyi tela khu gututuma ni matshari mandzani;
delu u ta wona, u nyi phasa!
5Uwe Pfhumu Nungungulu nya Tshivba Yatshavbo,
Uwe Nungungulu wa Israyeli;
wuga u ta tsayisa va nya mayigo vava;
u nga pweli wusiwana vakanganyisi vava.
6Matshigu yatshavbo va gu wuya silambosile,
na va gu huhula kha nga dzimbwa,
va dzuwulugela lidhoropa latshavbo.
7Va gu gamba liguvi nya ndzilo nya matshari khu maganani gwawe,
na va gu alakanya gukhavo: “Mwalo muthu a va pwago.”
8Aholu uwe Pfhumu Nungungulu,
u na va hega vathu nya guralo;
uwe u ngu va hega va nya mayigo.
9Eni nyi na emedwa khuwe Nungungulu wangu,
khuwe muvhikeli ni wuthavelo wangu.
10Khu wuhindzi waye Nungungulu a nata gwangu
ata nyi wonisa gupadwa ga valala vangu.
11Uwe Pfhumu u nga vbedzi valala vangu khu gu va songa,
aholu va vbedze tshivba va pepetega ni mayigo,
gasi vathu va na gyathu va si divali guvivba gwawe.
12Magana ma dugago khu kanani gwawe khya gu ghoha,
va na konwe khu gu dzi gugumugisa gwawe
kholu va guti gu lipha ni gu valana basi!
13Va vbedze, va fuvise khu likhulo lago!
Gasi va fuve tigoni
khavbo va na dzitigo gukhavo
Khu Nungungulu a fumago Israyeli,
wufumu waye wu ngu enedza litigo latshavbo!
14Valala vangu va gu wuya vbakari nya wutshigu
na va gu huhula kha nga dzimbwa,
va dzuwulugela lidhoropa latshavbo.
15Va gu legalega dhoropani nga dzimbwa
va vbweta gilo nya guhodze
va huhula nyamba mana guhodza nya guenele,
va gu dzuwulugela wutshigu watshavbo.
16Aholu, eni nyi na embelela tshivba yago;
dzimindrudzile nyi na khusa lito khu gutsaka nyi dhumisa lihaladzo lago,
kholu uwe u khade wuthavelo wangu,
nyi thavelago avbo matshigu nya sigaradzo.
17Eni nyi na gu dhumisa khu gu embelela ga uwe Nungungulu wangu,
kholu u muvhikeli wangu, ni wuthavelo wangu,
uwe khuwe Nungungulu nya gutumbege u nyi haladzago.
Currently Selected:
Dzindzimo 59: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
