Dzindzimo 58
58
Nombelo nya gulombelele gu tsayiswa va nya guvivba
Ga muthangeli nya tsawa nya vaembeleli. Khu maembelo nya ndzimo yi gu, khiyo: “U nga pfhungumuli.” Ndzimo ya Dhavhidhe
1Enu vafumeli, ina khu lisine
mu ngu lamula khu gululama, gani?
Mu ngu lamula milandru ya vatshavbo khu fanelo yi vbwetegago, gani?
2Malipha! Enu mwa gu alakanya guvivba basi,
thumo wanu khu gu wusa dzinyimbi tigoni.
3Va nya guvivba va gu ghoheka va ngari ndrani,
va nya malipha va dzimede va si gu velegwi.
4Va na ni wuhungu nga dzinyoga;
va fanana ni nyoga yi dzi girago givbwiri,
yi tshika dzindzeve,
5gasi gumba pwa litembo ambari gu yingisa lito
la wule a girago masalamuso.
6Nungungulu, gulela magwaha yawe,
u hatshulela sihaya nya singhalana sesi, Pfhumu Nungungulu!
7Va na mwalalege kha nga mati nya guvbalage;
va gu khwandra sighalala sawe, si na fanyegele.
8Va na nyivilige kha nga khudzu
yi tshiyago heha basi;
kha nga gyanana nya mimba nya guhamuge,
va nafe nyamba wona wenengedzo nya lidambo.
9Dzikhali dzawe dzi na vidziswe khu dzikhuni nya gunagane;
ni edzi nya gubange,
nyama yi si gu vidzwi yi na dzudzugwe hwindzo khu gipupwane.
10Muthu nya gululame a na nengela
a gu wona na va gu phodzedwa va nya guvivba;
a na hamba migondro novbani gwawe.
11Vatshavbo va na, khavo:
“Bayi furi! Muthu nya gululame a ngu tshatshazedwa!
Khu lisine, womo Nungungulu a lamulago litigo!”
Currently Selected:
Dzindzimo 58: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
