Dzindzimo 52
52
Gulamudwa ga muthu nyambasi wadi
(1 Samuweli 22:9-10)
Ga muthangeli nya tsawa nya vaembeleli. Ndzimo ya Dhavhidhe a embidego gikhati Dhowegi, muedhomi a nga ta tivisa Sawule, khuye: “Dhavhidhe bede nyumbani ga Abhimeleki.”
1Khu ginani u dzi zundza khu mithumo yago nya guvivbe,
uwe u gu ni tshivba?
Kholu wuwadi wa Nungungulu wu ngu simama kala gupindruga.
2Lidimi lago la gu luga makungo nya guvivbe;
kha nga ngala nya gulodzwe, la gu luga wukanganyisi.
3Wa gu gola ngudzu guvivba guvbindra wuwadi,
wa gu gola malipha guvbindra lisine.
4Wa gu tsakiswa basi khu magana nya gumbembise,
uwe u gu ni lidimi nya wudambane.
5A nuye Nungungulu a na gu mbembisa kala gupindruga;
a na gu dzega a gu tutumisa nyumbani gwaye
a gu fuvisa tigoni nya vathu nya guvbanye.
6Va nya gululama va na wona satshavbo soso,
va na thava, ni gu mu hega, khavo:
7“Wonani muthu a ngamba tumba Nungungulu
kha nga muvhikeli waye;
aholu a nga bani a tumba talo nya dzithomba dzaye,
a dzi tiyisa khu wukanganyisi waye!”
8Gasi eni, nyi na gira kha nga ngure nya gunyuge,
Nyumbani ga Nungungulu;
nyi ngu tumba wuhindzi wa Nungungulu
matshigu yatshavbo kala gupindruga.
9Nyi na gu bonga gikhati gyatshavbo,
khu satshavbo nya sadi u nyi giredego;
mbeli nya sihathwa sago nyi na rungudza lina lago,
kholu lina khyadi ngudzu.
Currently Selected:
Dzindzimo 52: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
