Dzindzimo 50
50
Wukhozeli nya lisine
Ndzimo ya Asafi
1 Pfhumu Nungungulu nya Tshivba Yatshavbo, ganede,
a ramba vathu gukhugela Khugadambo kala Pfoladambo.
2Gukhugela Siyoni, wulanga nya gumbure ngudzu,
Nungungulu a ngu ngangamela.
3Nungungulu wathu a nguta, kha nata degula;
mbeli gwaye wu ngu dzura nilo nya guvbise;
randredwe khu phuvbo nya gingulu.
4Khu vbatshani a ngu ramba sivangwa sa ndzadzini ni mafuni,
gasi guta lamula vathu vaye.
5“Tombanisani va nya guaga vangu,
vale va nga hunga gidzumeledzwano ni eni khu miphaso.”
6Ndzadzini gu na tivisa gululama gwaye,
kholu khuye mune Nungungulu a lamulago.
7“Yingisani, enu vathu vangu! Nyi ngu vbweta gu ganela nanu;
gasi gu gu konisela uwe Israyeli.
Eni kheni Nungungulu, Nungungulu wago.
8Kha nyi gu kawuki khu kotani nya miphaso yago nya dzimhamba,
mwendro miphaso yago nya guvbiswe u nyi girelago gikhati gyatshavbo.
9Kha nyi na hakha ni gikuzyana gimwegyo gya ndrangani gwago,
ambari phongo, nya tshambi wago.
10Kholu sirengo satshavbo nya likhabi khyangu
ni sirengo si guromo umo nya mazanazana nya sigomo.
11Nyi ngu siti sinyoni satshavbo sa musigomoni,
ni sirengo satshavbo sa khabini sa gu lumba eni.
12Nari pwani nya gupwa ndzala, khandruwe nyi nga hadza gu gu embela,
kholu litigo ni satshavbo si guromo umo khyangu.
13Ina kamwe eni nya gu hodza nyama nya dzimombe, gani?
Ina nyi ngu sela novba nya dziphongo, gani?
14Ningela ga Pfhumu phaso nya gubonge,
u landrisa sisambanyo u giridego ga Uye a Khusegidego ngudzu;
15Nyi rane litshigu nya sigaradzo;
eni nyi na gu vbanyisa, uwe u na nyi dhumisa.”
16Aholu, ga muthu nya guvivbe Nungungulu wari, khuye:
Gu na gu phasa ginani gu ganelela sileletelo sangu
ni gu huwelela gidzumeledzwano gyangu,
17nari gu uwe u ngu nyenya sihevbudzo sangu,
ni gu vengela magana yangu, gani?
18Uwe wa gu wona mbafa wa gu ya hengela nayo
u thangana wupari ni sibhayi.
19Wa gu tula likana lago gasi gu ganela guvivba,
lidimi lago la gu vbaha malipha.
20Uwe wa gu khala gasi gu lemba ndriyago
ni gu ganela guvivba khu gyanana gya mayi wago.
21U giride silo sesi, aholu eni nyi di degula;
u di gu pimisa gukhuwe eni nya gufanane nago;
aholu eni nyi na gu lamula nyi gu ninga nandru.
22Khu guralo, pimisani esi, enu mu divalago Nungungulu,
gasi nyi si mi vbadzuleli,
mu hamuga ni muthu nya gu mu vbulugise.
23Wule a nyi ningago phaso nya gubonge,
uyoyo a ngu nyi rungudza;
wule a dongiselago ndzila yaye,
nyi na mu nonedza guvbanyisa ga Nungungulu.
Currently Selected:
Dzindzimo 50: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
