Dzindzimo 49
49
Dzithomba khandri gilo
Ga muthangeli nya tsawa nya vaembeleli. Ndzimo ya sanana sa Kore
1Upwani enu vathu nya mahundzu yatshavbo,
tulani dzindzeve mupwe enu mu vbanyago tigoni,
2Nya gu ganela ga enu va nya gusolega ni va nya gu khalega,
sitetema ni sisiwana mwatshavbo gumogo.
3Likana langu li na ganela guti,
khu monyoni gwangu gu na duga mipimiso nya gugengele.
4Nyi na neredza dzindzeve dzangu nyipwa gihevbudzo,
nyi na tula sihalo wangu na nyi gupwa gitendre.
5Khu ginani nyi na thavago matshigu nya guvivbe,
gikhati sighevenga si nyi randrelago?
6Avo va tumbago dzithomba dzawe
va gu dzi zundza khu talo nya wufumu wawe.
7Muthu kha dzi kodzi gu dzegisa ndriyaye,
ambari gu livba tengo waye ga Nungungulu;
8kholu gu vbanyisa womi waye i tengo nya wungi ngudzu;
muthu gima kha wu kodzi gu wu enedza,
9a gu vbweta gu laphisa guvbanya gwaye
a vbuluga gufa.
10Wonani, va nya guti va ngufa
siphuguphugu niso si ngufa gumogo ni maphuphulu,
va tshiya dzithomba dzawe ga vambe vathu.
11Lithowo lawe li na khala dzinyumba dzawe,
va na vbanya umo khu mimela ni mimelana.
Ambari na va ningide lina mayigo yawe.
12Aholu muthu nya gitetema kha simami gu vbanya mafuni;
aholu, a gu fanana ni sirengo sifago.
13Gupimisa gwawe khwa wupumbu;
ni avo va va landriselago
va gu tsakiswa khu magana yawe.
14Va gu fanana ni dzinvuta dzi dongisedwago lithowo;
muhavisi wawe khu lufu,
va na vbiredza gu relela thowoni
avbo givili gyawe gi na guya tsagudzedwa;
avo va na vbanyela thowoni.
15Aholu, Nungungulu a na dzegisa hefemulo wangu
a nyi tshula mandzani nya lufu,
a nyi wugarela.
16U nga dzi garadzi, wa gu wona muthu na gu khala gitetema,
wa gu wona guandra dzithomba nya ndranga yaye;
17kholu gufani gwaye gimwalo ni gimwegyo basi a na dzegago,
wukhudhudhu waye kha wu na relela thowoni.
18Na gu vbanya a di dzi tsakisa abune, khuye:
“Va ngu gu zundza kholu silo sago satshavbo
si ngu gimbila gwadi,”
19a na ya patana gumogo ni vababe vaye,
avo va gumba wona gambe wenengedzo.
20Muthu a tadego khu dzithomba aholu na si pimisi,
a gu fanana ni sirengo sifago.
Currently Selected:
Dzindzimo 49: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
