Dzindzimo 45
45
Gihathwa gya Nungungulu ni mwangadzi waye
Ga muthangeli nya tsawa nya vaembeleli. Ndzimo ya sanana sa Kore. Ndzimo nya lihaladzo
1Monyo wangu wu ngu vbalagela khu magana nya gutsakise.
Ndzimo yeyi nya gu yi embelela ga Mufumeli;
lidimi langu tenga wa mulovi nya gusamadzise.
2Uwe khuwe nya gumbure ngudzu vbakari nya sanana nya vathu;
wuhigo wu ngu duga khu kanani gwago;
khu guralo, Nungungulu a ngu gu kategisa kala gupindruga.
3Hunga litshari giwununi gwago, uwe ndrena;
kholu u ngu zundzega ni guthavisega!
4Khilela kavalu nya gupale,
u ya dwanela lisine ni gululama;
libogo lago la nyamudye li na gu hevbudze gu gira siliwugiso.
5Siholoma sago si lodzidwe,
si ngu hekha monyo wa valala va Mufumeli;
mayigo yatshavbo ma nguta khoza avbo gwago.
6Uwe Nungungulu, gikhalo gyago nya wufumu
gi ngu simama kala gupindruga;
ndronga nya gululame, i ndronga nya wufumu wago.
7 # Wona gambe: Hebh 1:8-9. U ngu gola gululama, u nyenya guvivba;
khigyo gi nga girago Nungungulu wago
a gu todza khu mafura nya gunengele,
guvbindra vatshavbo u palisanago navo.
8Guambala gwago gwatshavbo gu ngu bhumudziswa khu mafura
nya mira, haluwe ni kasiya.
Dzindzimo nya guembeledwe khu sitendre dzi ngu tsakisa
dzinyumbani ga vafumeli, nya gugirwe khu magwaha nya dzindzofu.
9Vbakari ga vanyamayi va nyumbani nya wufumu
somo sanana nya dzimbiri dza vafumeli,
nyamudye gwago yi emide pfhumugadzi yi mburisedwego
khu ndralama nya guhutwe ya Ofiri.
10Upwa, nyamahegyane; wona u yingisa gwadi;
diga vathu vago, u va divala gumogo ni ndranga ya babe wago.
11Khu wumburi wago, Mufumeli a vbede mapimo yaye yatshavbo;
noga mbeli gwaye; kholu uye khuye mune wago.
12A nata gwago nyamahegyane wa dhoropani ga Tiro
a resa dzisagwati;
avo va fumidego va nata gu luva gasi u kodza gu va girela wuhindzi.
13Nyamahegyane nya gumbure ngudzu, gyanana gya Mufumeli
a ngu bela nyumbani nya wufumu;
na ambade guambala nya gumburisedwe khu ndralama.
14Va ngu mu yisa mbeli ga Mufumeli na ambagisidwe
dzingandzu nya gulugedwe;
a ngu vbelegedzwa khu dzimbiri dzikwawe nya makendzi,
va di bela vatshavbo.
15Va ngu bela nyumbani ga Mufumeli;
na va gu kulungela ni gutsaka.
16Wulangani wa vavelegi vago, u na velega sanana nya singi,
u na si gira vafumeli nya litigo latshavbo.
17Lina lago nyi na li gira li alakanywa khu mimela ni mimelana,
mayigo ma na gu rungudza gikhati gyatshavbo kala gupindruga.
Currently Selected:
Dzindzimo 45: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
