Dzindzimo 44
44
Gulomba tshivba ga Nungungulu
Ga muthangeli nya tsawa nya vaembeleli. Ndzimo ya sanana sa Kore
1Nungungulu, hi pwide,
ethu habune na va gu ganela,
vababe vathu va hi embeledzede,
siliwugiso u giridego matshiguni yawe ya gale.
2Uwe khu mandza yago u tutumiside mayigo u fela gu emisa vababe vathu;
u tshaniside mahundzu,
gasi gu dandrisa vababe vathu.
3Khandri khu tshivba nya matshari va nga wandra khiyo litigo,
gambe khandri mawogo yawe ma nga va ninga gupala;
aholu khu libogo lago la nyamudye,
ni wenengedzo nya khovbe yago, kholu u di gu va gola.
4Nungungulu, uwe khuwe Pfhumu yangu,
ninga Jakobe gupala.
5Khu tshivba yago hi vetide valala vathu;
khu lina lago hi gandredzela khu migondro vatshanisi vathu.
Avo va nga bani va hi wugela.
6Kha nyi tumbi wulaho wangu,
ambari litshari langu khandrilo li nyi vbanyisago.
7Kholu khuwe u nga hi vbanyisago ga valala vathu,
u va fenengedza khu dzitshoni avo va hi vengago;
8Ethu gikhati gyatshavbo ha gu dzi khusedza tshivbani ga Nungungulu,
hi na simama gu rungudza lina lago.
9Gasi olu, uwe u hi tsukude u hi thela dzitshoni,
khu dugi gambe u thangela dzinyimbi dzathu.
10Wa gu hi diga hi tutuma mbeli ga valala vathu,
valala vathu va gu hi phanga khu edzi va dzinago khidzo.
11Uwe u hi ningede kha nga dzinvuta nya guye gusindzwatunu
u hi phalalegiside vbakari nya mayigo.
12Wa gu rengisa vathu khu tengo nyamba phasa gilo,
gi mwalo u wuyedwago khigyo avbo nya tengo yoyo.
13Wa gu hi gira givalo ga vaakelane vathu,
avo va hi randrelago va ngu hi hembulula, va hi hega;
14U ngu hi gira tekatekane ga va nya mayigo,
vathu va gu hi wona va gu khiniga mihungo.
15Matshigu yatshavbo nya gu wona dzitshoni dzangu;
nyi fenengedzwa khovbe yangu khu dzitshoni,
16khu kotani nya magana nya givalo ni gu hembulula,
mbeli ga nala ni muphodzeli.
17Satshavbo sesi si dugelede, aholu kha hi gu divali,
ambari gu yeyisa gidzumeledzwano gyago.
18Monyo wathu kha wa bwelela hwane,
migondro yathu kha ya ndreya ndzilani gwago,
19gasi gu hi pfara avbo yi vbanyago migehe,
u hi fenengedza khu gidema nya lufu.
20Naripwani hi di divala lina la Nungungulu wathu,
hi khusedza mandza hi lombelela ga nungungulu nya mayigo,
21ina Nungungulu a sa hi tugula gani,
uye a yitigo misihalo ya myonyoni, gani?
22 # Wona gambe: Rom 8:36. Aholu khu kotani nya gu gu haladze,
hi ngu songetedwa matshigu yatshavbo,
va hi gira kha nga dzinvuta nya guye gusindzwatunu.
23Wuga! Khu ginani u lalago, Pfhumu?
Wuga! U nga hi nyenyi kala mahegiso!
24Khu ginani u sihago khovbe yago,
u divala sisaniso ni wusiwana wathu?
25Kholu hi vetidwe hi thega vbavbatshi hi khala kudzudzwane,
hi khwirira vbavbatshi khu lididi.
26Khuga u ema;
gasi u hi phase!
Hi dzegise khu lihaladzo nya wuwadi wago.
Currently Selected:
Dzindzimo 44: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
