Dzindzimo 42
42
LIBHUKU NYA WUVILI
(Dzindzimo 42—72)
Gililo gya mukhodwa a guromo hwindzo ni Nungungulu
Ga muthangeli nya tsawa nya vaembeleli. Khu gitendre. Ndzimo nya sihevbudzo sa sanana sa Kore
1Gufanana ni yisya yipwago lidora yi tutumela tsongoni nya mati,
hefemulo wangu wu ngu gu suva Nungungulu wangu.
2Hefemulo wangu wu na ni lidora la Nungungulu,
Nungungulu a vbanyago;
lini nyi na guta nyi ta wonega
mbeli nya khovbe ya Nungungulu?
3Marongo yangu ma gu khala guhodza gwangu
wutshigu ni mihani,
litshigu ni litshigu na va gu nyi embela, khavo:
“Womo hayini Nungungulu wago?”
4Nya gu alakanya silo sesi; hefemulo wangu wa gu lila na nyi gu alakanya
gukheni nyi di gu gimbila kharini ni gidzemo;
nyi gi thangela Nyumbani ga Nungungulu,
khu magana nya litsako gumogo ni gu dhumisa;
gidzemo gi sayisago matshigu nya simotse.
5Uwe monyo wangu, khu ginani u khuvekidego?
Wa gu vbisega khu ginani ndrani gwangu?
Tumba Nungungulu, kholu nyi nga na gu mu rungudza,
uye khuye muphasi ni Nungungulu wangu.
6Hefemulo wangu nya gu wupwa na wu gu vbisega ndrani gwangu;
khu guralo, nyi ngu gu dundruga, tigoni ga Joridhani
ni gigomoni gya Herimoni
ni gigomwanani gya Mizari.
7Gueta gwa gu rana gumbe gueta
gupwala guzindzani nya mabara;
mavimbi yatshavbo ni sivimbyana
si di vbindra khu vbatshani gwangu.
8Aholu Pfhumu Nungungulu litshigu latshavbo a na nyi rumela lihaladzo laye,
gasi nyi mu dhumisa vbawutshigutunu khu ndzimo,
nyi gira nombelo ga Nungungulu a nyi ningago guvbanya.
9Nya gu vbweta gu mu embela, kheni: “Uwe Nungungulu, muvhikeli wangu,
khu ginani u nyi digidego?
Khu ginani nyi na gimbilago na nyi gu vbisega ni gu tshaniswa
khu valala vangu?
10Khu ginani nyi tshanisekago kharati?
Valala vangu va gu nyi vala,
gikhati gyatshavbo va gu nyi wudzisa, khavo:
Womo hayi Nungungulu wago?”
11Khu ginani hefemulo wangu wu vbelago tshivba?
Nya gu vbweta gutumba Nungungulu gambe nyi na mu rungudza.
Uye khuye Nungungulu wangu ni muvbanyisi wangu.
Currently Selected:
Dzindzimo 42: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
