Dzindzimo 40
40
Nombelo nya gubonge ni gu lomba giphaso
(Dzindzimo 40:13-17; 70:1-5)
Ga muthangeli nya tsawa nya vaembeleli. Ndzimo ya Dhavhidhe
1Nyi tumbide Pfhumu Nungungulu khu monyo wangu watshavbo;
Uye a di noga a nyi yingisa
gikhati nyi nga lomba giphaso.
2A nyi duside phalani nya lufu,
seleni mule nya maraga;
a emisa migondro yangu vbatshani nya giwindri,
a tiyisa mawundru yangu.
3Vegide kanani gwangu ndzimo nya yiphya,
ndzimo nya gurungudze Nungungulu wathu;
nya vangi va na si wona silo soso, va na thava
ni gu tumba Pfhumu Nungungulu.
4Kategide muthu wule a tumbago Pfhumu Nungungulu,
kha thendregedzi a khedzisa va nya matshandza,
gambe kha vbweti avo va landrago malipha.
5U hi girede siliwugiso nya singi,
Uwe Pfhumu Nungungulu wangu,
mwalo muthu a fananago ni uwe,
khu makungo u giridego nya guphasedzele ethu;
eni nya gu gola gu ma pwadza nyi ma tivisa,
aholu ma tade ngudzu nyamba kodza ni gu sayedwa.
6Uwe khwa vbweta miphaso ni miningelo,
aholu u nyi tude dzindzeve;
khwa lomba miphaso nya sirengo nya guvbiswe,
gasi gu handza sighoho sathu.
7Eni nyi di, kheni: “Nyi womo avba,
kha nga gu lovidwego libhukuni khu kotani yangu.”
8 # Wona gambe: Hebh 10:5-7. Nyi ngu tsaka khu gu gira guhaladza gwago,
Nungungulu wangu; ndrani nya monyo wangu
womo nayo wago.
9Nyi tiviside nayo wa Pfhumu Nungungulu
vbakari nya tshangano nya khongolo;
kha nya degula likana langu, u ngu dziti gwadi uwe Pfhumu Nungungulu.
10Kha nya siha gululama gwago monyoni gwangu,
aholu nyi tiviside gutumba ni guvbanyisa gwago;
kha nya siha lihaladzo ni lisine lago,
vbakari nya tshangano nya khongolo.
11 Pfhumu Nungungulu, u nga bombi gu nyi girela wuhindzi,
nyi na vhikedwe gikhati gyatshavbo khu wuhigo ni wuwadi wago.
12Nyi randredwe khu dzimhango nyambana tengo;
mithumo yangu nya guvivbe yi nyi gamide
nyamba kodza ni gu hapfhula nyi wona,
yingi ngudzu guvbindra ndzudzu wa hungoni gwangu,
nya gu dzipwa na nyi vbede tshivba.
13Nyi vbulugise Pfhumu Nungungulu;
vbiredza Pfhumu Nungungulu u ta nyi phasa!
14Va na tale khu dzitshoni avo va golago gukhavo nyi nafe;
va na bwelele hwane va khala dzitshoni
avo va golago gu nyi wona na nyi gu fenengedzwa khu sigaradzo.
15Va na degule khu dzitshoni
avo va nyi hegago khavo, khavbo gwadi.
16Va na nengele va tsaka khu uwe
vatshavbo avo va gu vbwetago;
avo va golago guvbanyisa gwago
va na nengele gikhati gyatshavbo, khavo:
“A na khusedzwe Pfhumu Nungungulu.”
17Gasi eni nyi gisiwana ni muhamugi, nyi khulungu,
aholu Pfhumu a ngu nyi sayisa.
Uwe khuwe giphaso ni guvbanyiswa gwangu;
Nungungulu wangu, u nga hweli!
Currently Selected:
Dzindzimo 40: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
